Ɓalɔma 2

Asɔɓɨɨ akio mʉkɔmbʉ

1Ʉwɛ, ngɨa wakio mʉkɔmbʉ ngʉwɔ mangɛ, ɓio anɨ kʉndʉ anɨ, ɓangɔkwananamʉ nɔwɛ anɨnɨa ikoko kʉɓanɨ. Dɔ, ngbinga ngɨa wa-ɔɔ akio mʉkɔmbʉ ngʉwɔ mangɛ, wakiono kʉ nɔ ʉwɔsɔɔ, dɔ ʉwɛ, wakɔkɨa yaka ngbanga kʉndʉ ɨyɛnɛnɨ. 2Isu, tanɨmbɨa iɗo ɓɔ mʉkɔmbʉ ngʉwa Asɔɓɨɨ akʉʉ ɓombi ngʉɓa ɓakɨa ɨkananja yɔ yaka ngɨyɛnɛnɨ, wa ngbingbii. 3Ʉwɛ, wa ndɨ atunguo ɓɔ waɓwanaka akɔ mʉkɔmbʉ wɔ Asɔɓɨɨ ɓwanakani? Ʉwɛ, ngɨa wakio mʉkɔmbʉ wɔ ɓombi ngʉɓa ɓakɨa ɨkananja yɔ yaka ngɨyɛnɛnɨ, yakamɛngana, ʉwɛ wa ɓata akɨa ngbanga kʉndʉ ɨyɛnɛnɨ. 4Asɔɓɨɨ a iɗo nɔgbɛ, nɔ a kʉ nɔ mʉtɨma wɔta ʉta nɔgbɛ, kʉ nɔ mʉtɨma wɔ pɛya yaka nɔgbɛ. Ʉwɛ, wa ndɨ anɨna yaka ngɨyɛnɛnɨ ta ɓʉtʉʉ? Wangɔmʉ anɨmbɨa ɓɔ iɗo iɗo ngɨangɔ, yakwanana nɔwɛ asalɨa anicho mʉtɨma ta nɔ ingono? 5Yakamɛngana, ʉwɛ, wa mʉtʉ ɓumu, nɔ, wangɔmʉ akʉnda anecho mʉtɨma. Kʉɓanɨ, wamɔmanaka mʉkɔmbʉ wɔta ʉja, aɓisi ngʉɓa Asɔɓɨɨ apananiso sinani-ɔɔ, ʉnganga ngʉwangɔ, nɔ, kio mʉkɔmbʉ ngbingbii. 6Ya ɓanɨ dɔ, Asɔɓɨɨ e꞊njo sina mombi nɔ mombi mʉkaya akpatanakɨa kʉ nɔ yaka ngɨangɔ a꞉ɨkɨa. 7Asɔɓɨɨ e꞊njo sina uɓei ngʉwɔ mago nɔ mago, akɔ ɓombi ngʉɓa ɓenjono akɨa yaka iɗo sɔkɔmʉ nɔ bɔmbana, nɔ ahata ʉbɨba, nɔ ɨbɨba, nɔ yaka ngɨyɛ yangɔmʉ nɔ mupipio. 8Yakamɛngana, akɔ ɓombi ngʉɓa ɓa ɨɓɔ ahata ta ɓʉkɨa ngʉɓeɓo, nɔ, ɓɔyaa yaka yɔ ingono, nɔ, ɓɔɓio akpataka ta yaka yɛta ɓɨɓɨ, ʉnganga wɔta ʉja ngʉwa Asɔɓɨɨ wɛ꞊ka sina akʉʉ eɓo. 9Mombi muɓomu ngɨa amati ɔ ɓʉɓɨɓɨ, a꞊dya sina ikoko, nɔ ɓʉkaɓʉkaɨ, apʉnganɨa nɔ Ɓayuda, mbise ɔngɔ tɨa ɓombi ngʉɓa ɓangɔmʉ Ɓayuda. 10Yakamɛngana, mombi muɓomu ngɨa akɨa angu akɔɓio amati kyananaka yɛta iɗo, Asɔɓɨɨ a꞊minjo sina ʉbɨba, nɔ ɨbɨba, nɔ majɨɔ akɔpʉnganɨa nɔ Ɓayuda, mbise ɔngɔ dɔ tɨa akɔ ɓombi ngʉɓa ɓangɔmʉ Ɓayuda. 11Dɔ, Asɔɓɨɨ angɔnapiokomʉ ɨyɔ ɓombi nɔ mababa.

12Kʉɓanɨ, mombi muɓomu ngɨa akɔkɨa ɓʉɓɨɓɨ, ɛmbɨenimʉ mapanʉ kɔ Musa, a꞊yanaka sina, sɔkɔmʉ nɔ mapanʉ ngʉkɔnanɨ. Nɔ Ɓayuda ngʉɓa ɓakɔkɨa ɓʉɓɨɓɨ, ɓɔɓieni anɨmbɨa mapanʉ kɔ Musa, ɓa꞊kio sina mʉkɔmbʉ ngʉweɓo, kʉ nɔ mapanʉ ngʉkɔnanɨ. 13Yaɓanɨ dɔ, sɔkɔmʉ ɓombi ngʉɓa, ɓanʉka mapanʉ ta nɔ machwei akɛ, ɓa ngbingbii apɛɨ ɔ Asɔɓɨɨ. Yakamɛngana, ya ɓombi ngʉɓa ɓakyananakɨa ʉpanʉ. 14Ɓombi ngʉɓa ɓangɔmʉ Ɓayuda, ɓangɔmʉ ɨɓɔ nɔ mapanʉ kɔ Musa. Yakamɛngana, ngbinga ngɨa ɓa-ɔɔ akɔkyananakɨa mapanʉ ngʉkɔnanɨ, akɔkpatanakɨa ta nɔ mʉtɨma ngʉweɓo, ɨyɛnɛnɨ yasugo ɓɔ, ɨɓɔ, ɓa tɨta nɔ ʉpanʉ nga weɓo ɓɔ kpɛ. 15Dɔ, ɓakɔpananiso ɓɔ yaka ngɨyɛ ya amati ɔ mapanʉ, ya ndʉ ɓa꞉ɨtɛndakɨa amati ɔ mɨtɨma ngɨyeɓo. Nɔ, mɨtɨma ngɨyeɓo inani amati, yanaɓɔ kʉ akɔpana ɓɔ yaka ngɨyɛ ɓakɔkɨa ya ingono. Itungwio ngɨyɛ ya amati ɔ mʉtɨma, yɔɓio naɓɔ kʉ akɔɓɨa ɓɔ ɓakɔkɨa yaka yɛta iɗo. Nɔ, itungwio ngɨyeɓo yɔɓio naɓɔ kʉ agɔgaka, nɔ kʉ akɔɓɨa ɓɔ ɓakɔkɨa yaka yɛta ɓɨɓɨ. 16Yaka ngɨyɛnɛnɨ, yɛ꞊nɨanɨa sina aɓʉmba akɔ ɓisi ɓɔ mʉkɔmbʉ. Ɨngbaa akɔ Yeso Klisito, Asɔɓɨɨ a꞊kio sina mʉkɔmbʉ wɔ yaka yɔ ɓaɗi ɓaɗi ngɨyɛ ɓombi ɓakɔkɨa, ngbanga ndʉ aka Ɨsaʉ yɛta iɗo ngɨyɛsɛmɨ ya-ɔɔ akɔsugo.

Ɓayuda ɓɔɓundo mapanʉ

17Ʉwɛ, ngɨa wanɨsokonio ɓɔ Muyuda, nɔ, wɔnapɨana mʉtɨma akʉʉ mapanʉ nɔ, wɔɓio ayɛngɨa Asɔɓɨɨ. 18Ʉwɛ ngɨa, wanɨmbɨa ɓʉkʉnda ɓɔ Asɔɓɨɨ, nɔ yaka ngɨyɛ wanɨna ndʉ yanɔ dada, dɔ ɓa꞉napanɨa mapanʉ panɨanɨ. 19Ʉwɛ ngɨa, wanɨmbɨa iɗo ɓɔ wakɔkyɛndakiso ɓombi ɓɔ mamɔmɔ, nɔ wa ndʉ ʉwanga akɔ ɓombi ngʉɓa ɓa amati ɔ umomo, 20nɔ, mʉpananakɨa wɔ ɓombi ngʉɓa ɓa ndʉ lijangi, nɔ kʉ mʉpananakɨa wɔ ɓana. Dɔ ʉwɛ, wanɨmbɨa mapanʉ, nɔ, wanɔ nɨmbɨmbanaka iɓomu, nɔ, wɛmbɨa yaka iɓomu ngɨyɛ ingono. 21Ʉwɛ ngɨa, wa mʉpananakɨa wɔ ɓangɛ, dɔtanɨ wangɔmʉ akɔkyananakɨa mapanʉ kɔngɔ? Ʉwɛ ngɨa, wakyɔtʉɓakɨa suo ɓɔ yɔkwananamʉ aniɓo. Yakamɛngana ʉwɛ, wa kʉ aniɓo! 22Ʉwɛ ngɨa, wasigio ɓangɛ ɓɔ yɔkwananamʉ kɨa ɓuso, yakamɛngana ʉwɛ, wa kʉ akɔkɨa ɓuso! Ʉwɛ ngɨa, wasɨka ɓamʉngʉ ɓɔ majɛjɛ ndʉ ɔpɛ, yakamɛngana, ʉwɛ, wɔɓio ɓata kʉ akɔponyoko ɓayaka amati ɔ lɨkáá lɔ ɓamʉngʉ ɓɔ majɛjɛ! 23Ʉwɛ ngɨa, wabɨbana ga wɛmbɨa mapanʉ, yakamɛngana, wanunokio Asɔɓɨɨ ɨngbaa akɔɓuɗo mapanʉ! 24Mabii kakɔsugo ɓɔ: «Ya akʉʉ ɔ mʉkyananakɨa ngʉweno, inu Ɓayuda, ɨyɛ ɓombi ngʉɓa ɓangɔmʉ Ɓayuda, ɓa-ɔɔ akɔyapakiso ino yɔ Asɔɓɨɨ»#popoko Isa 52:5 25Gbali ɔ kiiso ɨgʉnɨ akɔ Ɓayuda, anɔ dada ta ambɔ mombi akɔkyananakɨa mapanʉ. Yakamɛngana, mombi ɔɗɛeni mapanʉ, aɓio ngbanga ndʉ mombi ngɨa angɔkiisomʉ ɨgʉnɨ. 26Nɔ, yɔɓieni ɓanɨ ɓɔ mombi angɔkiisomʉ ɨgʉnɨ, yakamɛngana, akyananakɨa mapanʉ, Asɔɓɨɨ angɔmʉsɨka ndɨ ndʉ ɓɔ a꞉kiiso ɨgʉnɨ kiisoni? 27Mombi ngɨa angɔkiisomʉ ɨgʉnɨ, yakamɛngana, akyananakɨa mapanʉ, ɨyɔ akɛ, a꞊kio sina mʉkɔmbʉ ngʉwɔsɔɔ, ʉwɛ, ngɨa wakɔɗɛa mapanʉ. Ɨnadɔ, ʉwɛ wanɨmbɨa mapanʉ ngʉka ka꞉tɛndanakɨa, nɔ, wa꞉kiiso kʉ nɔ ɨgʉnɨ. 28Kʉɓanɨ, Muyuda wɔ ingono, wangɛmbɨanɨamʉ ta ɨngbaa akɔnɨnɨanɨa yɔ ndʉtʉ ɓʉtʉʉ, ga pɔ ɓɔ dɔ a꞉kiiso ɨgʉnɨ, ɨyɛ, yɔ ndʉtʉ ɓʉtʉʉ. 29Yakamɛngana, Muyuda wɔ ingono, ya mombi ngɨa a Muyuda amati angɔ ingainga. Nɔ, ɨgʉnɨ ngɨyɛ ingono ya ɨyɔ mʉtɨma, nɔ, yakɨanɨa nɔ Mʉtɨma wɔta Tu, sɔkɔmʉ nɔ mʉkyananakɨa wɔ mapanʉ ngʉka, ɓa꞉kʉtɛndakɨa. Ɨyɔ, Muyuda ngɨananɨ, sɔkɔmʉ ɓombi aɓɛ ɓamʉbibiso, yakamɛngana, ta Asɔɓɨɨ kʉ nangana.

Currently Selected:

Ɓalɔma 2: buuN

Highlight

Copy

Compare