Ɓalɔma 12
12
Akɔkyananakɨa Asɔɓɨɨ nɔ ingono
1Inu ɓanduku, Asɔɓɨɨ a꞉tɨnɨa ikoko yɛta ɨja nɔgbɛ. Kʉɓanɨ, nanenu akɔnɨta ɓɔ, minjeni uɓei ngʉweno ndʉ mutebii ngʉwɔ wanapɨanɨa akɔ Asɔɓɨɨ, nɔ ʉwa, wamɨkataa. Ɨngbaa yɔ ingono ngɨyɔ bibiso Asɔɓɨɨ, ɨyɛnɛnɨ. 2Inu, nátɨkpatakenimʉ mʉkyananakɨa wɔ dɔdɔ ngɨa. Yakamɛngana, mʉsɨeni Asɔɓɨɨ nenu anacho, nɔ nenu aninjo itungwio yɔ ɨtakɨtakɨ. Kʉɓanɨ, nákwanana pemiso ɓʉkʉnda ɓɔ Asɔɓɨɨ, ʉɓa ɓa ɓuɗo, ʉɓa, ɓamɨkataa, nɔ ʉɓa, ɓɔkwananɔ. 3Akpatanakɨa nɔ ɨjɨɔ ngɨyɛ Asɔɓɨɨ a꞉napananiso, nanenu asigio inu ɓaɓomu ɓɔ: mombi atɨsɨkanamʉ aɓio tɨa nɛkʉʉ nɔgbɛ, achana aka ɔsisekio pɛngɛ-ɔɔ aɓio. Yakamɛngana, ɓieni ta nɔ itungwio yɔ nɨmbɨmbɨanaka, mombi nɔ mombi akpatanakɨa nɔ báya ngɨyɛ Asɔɓɨɨ a꞉minjo.
4Amati ɔ ndʉtʉ ngɨyeso, lɨsɨgɨsɨgɨ la lɨja. Lɨsɨgɨsɨgɨ liɓomu ngɨlɛnɛnɨ, lanɔ ɓatɛa di di di. 5Tɨa kʉɓanɨ, isu ɓaɓomu ta tɨta ndʉtʉ mɛngana amati ɔ Klisito, gʉtʉ ndʉ ta ambaja ata mʉja. Nɔ ati eso nangana nangana, tɔɓio tɨa kʉ ɨkyɛmʉ mɛngana, ndʉ lɨsɨgɨsɨgɨ lɔ ndʉtʉ mɛngana.
6Asɔɓɨɨ a꞉tɨpakɨa nɨmbɨmbɨanaka di di di akɔ ɨjɨɔ, akɔ isu nangana nangana. Mombi ɔɓieni nɔ nɨmbɨmbɨanaka ayaka ndʉ ɨgbɛ yɔ Asɔɓɨɨ, ɨyaka akpatanakɨa kʉ nɔ báya ngɨyeso ɓaɓomu. 7Mombi ngakɔmɔ ɔɓieni nɔ nɨmbɨmbɨanaka akyananakɨa ɓangɛ, ɨkɨa tɛa yɔngɔ ta kɨanɨ, gwa ngɨa ɛmbɨa panɨa, ɔkwananɔ ta panɨa. 8Mombi ngɨa anɔ nɨmbɨmbɨanaka aninjo ɓangɛ iguegue, ɨɓinjo pɨ iguegue ta injoni. Gwa ngɨa enjekenekio ɓangɛ, iɓio ɨyɔ ɨkɔndɔ ta kpala. Ɨya, akyɛndakiso ɓangɛ, ɨkɨa tɛa yɔngɔ nɔ angu. Ɨya, anɔ ɓʉkʉnda anɨnɨa ɓangɛ ikoko, ɨkɨa tɛa yɔngɔ nɔ ɨgyagya.
9Ɓʉkʉnda ngʉɓeno ɓiɓio ta nɔ ingono. Yaɛni ɓʉɓɨɓɨ, nɔ potoneni nɔ yaka yɛta iɗo. 10Kʉndaneni ati eno ta mʉtɨma mʉngana ndʉ ɓanduku, nɔ, kumoneni ati eno kʉ kumononi. 11Ɓieni nɔ kpekeɓu akɔ tɛa, nɔ nátɨɓiomʉ ɓadɔɓa, Kyananakɨeni Makwɔɓɨɨ nɔ mʉtɨma wɔ kɛkɛɛ nɔgbɛ. 12Kweni ɨgyagya akʉʉ ɔ yaka ngɨyɛ nánapɨana-ɔɔ mʉtɨma. Ɓieni nɔ mʉtɨma wɔta ʉta, amati ɔ ɓʉkaɓʉkaɨ, nɔ ɨteni Asɔɓɨɨ sɔkɔmʉ nɔ bɔmbana. 13Ɓieni ta asalakɨa ɓombi ɓɔ Asɔɓɨɨ ngʉɓa amati angɨɔ, nɔ, tɛtɨeni ɓabika kʉ nɔ ɨgyagya.
14Ɨteni Asɔɓɨɨ anukiokio ɓombi ngʉɓa, ɓanenu akɔkyananaka. Mɨteni naɓɔ anukiokio, nɔ, sɔkɔmʉ naɓo akɔgbanga. 15Kweni ɨgyagya ɨhɔ nɔ ɓombi ngʉɓa ɓanɨkwa ɨgyagya. Nɔ, Ndɨeni ɨhɔ nɔ ɓombi ngʉɓa ɓandɨa. 16Ɓieni nɔ nʉkana ati eno. Nátɨsɨkanamʉ ndʉ ɓombi ɓɔta ɓakpɔkpɔ, yakamɛngana, bayeni aɓio ta ndʉ ɓombi ɓɔta ɓʉtʉʉ. Nátɨsɨkanamʉ ndʉ ɓombi ɓɔ nɨmbɨmbɨanaka.
17Nátɨtosiomʉ mombi ɓʉɓɨɓɨ akɔ ɓʉɓɨɓɨ. Kɨeni angu akɔɓio nɔ mʉkyananakɨa wɔta uɗo, apɛɨ ɔ ɓombi ɓaɓomu. 18Kɨeni iɓomu ngɨyɛ yanɨtanɨa akɨa, iɗo ambɔ ɓieni nɔ majɨɔ nɔ ɓombi ɓaɓomu. 19Inu, ɓanduku ɓɔ ɓʉkʉnda, inu, ɓakwɔngɔ, nátɨtosiomʉ ɓʉɓɨɓɨ akɔ ɓʉɓɨɓɨ. Yakamɛngana, sɨeni ta ʉnganga wɔ Asɔɓɨɨ akɨa tɛa. Dɔ, Amati ɔ Mabii, Makwɔɓɨɨ a꞉sugo ɓɔ:
«Ɨmɨ akɛ na꞊tosio ikosi,
ɨmɨ akɛ, na꞊ɓutosio ɓʉɓɨɓɨ ngʉɓa ɓakɔkɨa!»#popoko Tngw 32:35
20Yakamɛngana, ɓa꞉matɨa ɓata kʉ ɓɔ:
«Mʉyaa ngʉwɔsɔɔ wɔɓieni nɔ taa,
minjo idyo.
Nɔ, ɔɓieni nɔ mʉsasa wɔ mipo,
minjo mipo!
Dɔ, akɨa ɓanɨ, ya ndʉ wiɓio nayɔ
anutuo nɔ makɔka kɔ dyaa amʉtʉ.»#popoko Mɨgb 25:21-22
21Watɨsɨanamʉ ɓʉɓɨɓɨ nɔwɛ anɨfa ɓubaya, yakamɛngana, ʉwɛ, nagaaka ɓʉɓɨɓɨ nɔ mʉkyananakɨa wɔta uɗo.
Currently Selected:
Ɓalɔma 12: buuN
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc.
