Matayɔ 18
18
Anɨ a mombi ata mʉja aƁʉngama ngʉɓa akʉʉ ɔ ɓisi
(Mlk 9:33-37; Luk 9:46-48)
1Ta akɔ angbinga ngɨananɨ, ɓakpata ngʉɓɔ Yeso ɓɛ꞉ka nayɔ aɓokuo ɓɔ: «Amati ɔ Ɓʉngama ngʉɓɔ akʉʉ ɔ ɓisi, anɨ akɛ, a mombi ata mʉja akɔnagaaka ɓangɛ?»
2Yeso e꞉soko ta mwana ata bele, nɔ ɔ꞉mimaiso ati eɓo ga gba. 3Ga ɨyɔ naɓɔ ɓɔ: «Ɨmɨ, nanenu asigio ta ingono, mombi ɔkɔtɛtɨenimʉ Ɓʉngama ngʉɓa Asɔɓɨɨ, ngbanga ndʉ mwana ata bele, a꞊ngɔkumonio sina amati ɔngɔ pɔ bele. 4Akɔ Ɓʉngama ngʉɓa akʉʉ ɔ ɓisi, mombi ngɨa a mʉja anagaaka ɓangɛ, ya gwa ngɨa anudisoniso, nɔ, ɔnatana aɓio ngbanga ndʉ mwana ngɨa. 5Mombi muɓomu ngɨa atɛtɨa mwana ndʉ ɨya, aino yɛsɛmɨ, ambɔ ɔnatɛtɨɔ ta ɨmɨ ɓɔ kpɛ.
Kanganɨeni akɔkwisiso ɓangɛ aɓʉɓɨɓɨ
(Mlk 9:42-48; Luk 17:1-2)
6Yakamɛngana, ndʉ mombi akwisiso mʉngana ɔ ɓana ngʉɓa ɓa꞉nabaya ɨmɨ, ya gɔ pɛngɛ iɗo nɔgbɛ ɓɔ, ɓɔmunjenjo ikopi yɛta ɨja akɔ ɨmɨyɔ ɓɔ dɔɔ, nɔ ɓɔsa nayɔ agiso amati ɔ ɨmba yɔ lisini ga chuu. 7Ikoko akɔ dɔdɔ, akʉʉ ɔ kwisiso ɓombi aɓʉɓɨɓɨ! Ɨkananja yɔ yaka ngɨyɛnɛnɨ, yangɔɓijanga sina pɔ bele. Yakamɛngana, ikoko akɔ mombi ngɨa akwisiso mangɛ aɓʉɓɨɓɨ!
8Yɔɓieni ɓɔ ɨkɔndɔ, ga pɔ mʉtɨndɨ ngʉwɔsɔɔ, wanɔwɛ akwisiso aɓʉɓɨɓɨ, ukio ta kio, nɔ, wɔʉgiso! Ya gɔ pɛngɛ iɗo akɔ ʉwɛ, akumonio akɔ uɓei ngʉwɔ ingono, wɔɓieni nɔ ɨkɔndɔ mɛngana, ga pɔ mʉtɨndɨ mʉngana, sɔkɔmʉ pɛpɛ ɓɨnagiso amati ɔ dyaa yɔ mago nɔ mago, wɔɓieni nɔ lɨkɔndɔ, nɔ mɨtɨndɨ kʉ ɓepini. 9Yɔɓieni ɓɔ isó ngɨyɛsɔɔ, yanɔwɛ akwisiso aɓʉɓɨɓɨ, ɨchweiso ta chwɛiso, nɔ, wɔɨgiso ta giso! Ya gɔ pɛngɛ nɔ ɨjangɨa akɔ ʉwɛ akumonio akɔ Ɓʉngama ngʉɓa akʉʉ ɔ ɓisi, wɔɓieni nɔ isó mɛngana, sɔkɔmʉ ɓɔ ɓɨnagiso amati ɔ dyaa yɔ mago nɔ mago, wɔɓieni nɔ mesu kapɨnɨ.
Isisenio yɔ kɔndɔlɔ ngɨa ɛngɛtɨa
(Luk 15:3-7)
10Kanganɨeni iɗo! Mombi atɨyɛndamʉ mwana pɔ mʉngana ati ɔ ɓana ngʉɓa! Dɔ, nanenu asigio ɓɔ ɓamalaika ngʉɓa ɓaɓʉpɛmakɨa ɨɓɔ, ɓa angbinga muɓomu apɛɨ ɔ Aba ngɨasɛmɨ, a akʉʉ ɔ ɓisi. [ 11Dɔ, Mwana ngɨyɔ Mombi ɛ꞉ka amati ɔ dɔdɔ, akɔheiso ɓiga ngʉɓa ɓa꞉yangaa.]
12Inu, nɛ́nɔ yaka ngɨyɛ tanɨ? Tɨsɨka-sɨ ɓɔ mombi mʉngana, anɔ ɓakɔndɔlɔ ɓangɔ mɨya mʉngana, nɔ, ta mʉngana ɔmʉyangɨa. Mombi ngɨananɨ, angɔkwanana ndɨ asɨa ʉɓɔmɔ ɓatɛkɛɓɛ ɨsaɓɔkʉ nɔ ɨsaɓɔkʉ inani akʉʉ ɔ ɨkpangba, nɔ, ɔsa ahata ɨyakɛ a꞉ɓio ɓɔ, ɔyangaeni?
13Nanenu asigio ta ingono ɓɔ, angbinga ngɨa amɨna-ɔɔ mʉngana ngɨa a꞉ɓio ɓɔ ɔyangaeni, a꞊kwa ɨgyagya nɔgbɛ, anagaaka ɓakɔndɔlɔ ɓatɛkɛɓɛ ɨsaɓɔkʉ nɔ ɨsaɓɔkʉ, ngʉɓa ɓɔyangaɔmʉ. 14Ya ngbanga kʉɓanɨ, Atɔ eno ngɨakɛ akʉʉ ɔ ɓisi angɔbayamʉ pɔ bele ɓɔ, mwana mʉngana ati ɔ ɓana ngʉɓa ɨyangaa.
Ɨngbaa yɔ salɨa nduku ngɨa akɨa ɓʉɓɨɓɨ
15Ndʉ mwana ɔ anʉ anakɨa ɓʉɓɨɓɨ, sa nayɔ agbʉka, nɔ, wɔmʉpananiso ɓʉɓɨɓɨ ngʉɓangɔ aɓʉmba, inu, nayɔ ta ɓapɨnɨ. Ndʉ anɔka, ambɔ nɔtana ngɨyenɔ nayɔ yɔtɔwɔ ɓata-sɨ ta akɔ ɨda. 16Yakamɛngana, ɔnɔkenimʉ, sɨka ɨhɔ nɔwɛ mombi ngakɔmɔ mʉngana, ga pɔ ɓapɨnɨ, dɔ, ya꞉tɛndanakɨa ɓɔ: ‹Yaka iɓomu yɔkwananɔ atambanakɨa ta apɛɨ ɔ ɓadɛmʉ ɓapɨnɨ, ga pɔ ɓaatʉ.›#popoko Tngw 19:15 17Ndʉ ɨyɔ nduku asɔɔ, angɔbayamʉ anʉka ɓadɛmʉ ngʉɓɔnanɨ, wɔ꞊sa aɓɨa kanisa. Ndʉ ayaa anʉka kanisa, mʉsɨka tɨta ndʉ mombi ngɨa angɔbayamʉ Yeso, ga pɔ ndʉ ndɔmbɛ ɔ lipisa manjanja.
18Nanenu asigio ta ingono, yaka iɓomu ngɨyɛ inu, nákpɛgɨa akɔ dɔdɔ aka, ɓaɨkpɛgɨa akʉʉ ɔ ɓisi kʉ kpɛgɨanɨ. Nɔ, yaka kʉ iɓomu ngɨyɛ inu, náɨɓoo akɔ dɔdɔ aka, ya꞊ɓoonokio akʉʉ ɔ ɓisi kʉ ɓoonokioni.
19Nɔ, ɓata nanenu asigio ɓɔ, ɓombi ɓapɨnɨ ati eno adɔdɔ ngɨa, ɓɔbayanɨeni anɨta Asɔɓɨɨ ɨkyɛmʉ iɓomu ngɨyɛ ɓakʉnda, Asɔɓɨɨ Aba ngɨasɛmɨ akʉʉ ɔ ɓisi, aɓinjo ɨyɔ injoni. 20Dɔ, akɔ ɨda ngɨyɛ ɓombi ɓapɨnɨ, ga pɔ ɓaatʉ, ɓɔmɔmanɨɔ-ɔɔ akɔ ino ngɨyɛsɛmɨ, ɨmɨ ingainga, na ta ɨhɔ naɓɔ.»
Isisenio yɔ mombi ɔ tɛa ngɨa ayaa anɨpaakɨa
21Ambise ɔngɔ, Pɛtɛlɔ ɔ꞉mɨsɨnganɨa Yeso, nɔ, ɔ꞉muɓokuo ɓɔ: «Makwɔɓɨɨ! Nduku asɛmɨ ɔnakɨeni ɓʉɓɨɓɨ, nɔsisekio nayɔ anɨpaakɨa machaa mapɨtanɨ? Yaɓio ndɨ machaa mɛɗɨanɛka?» 22Ga Yeso nayɔ ɓɔ: «Nanɔwɛ asigio ɓɔ, sɔkɔmʉ ta machaa mɛɗɨanɛka ɓʉtʉʉ. Yakamɛngana, yaɓio machaa ɓatɛkɛɓɛ mɛɗɨanɛka, machaa mɛɗɨanɛka.
23Kʉɓanɨ, Ɓʉngama ngʉɓɔ akʉʉ ɔ ɓisi, ɓa ngbanga ndʉ ngama mʉngana ngɨa, ɛ꞉soko ɓombi ɓɔ tɛa ngʉɓangɔ, ahata nɨmbɨa yaka yɔ uɓu ngʉwangɔ. 24Ɨyɔ, ta ga a꞉pʉnga pooko ɓɔ, ɓɔ꞉tɔmɨkɨa nɔ mombi ɔ tɛa mʉngana apɛɨ angɔ, ɨya a꞉ɓio nɔ uɓu wangɔ, ɓagyɛgyɛ#18:24 ɓagyɛgyɛ: akɔ ʉɗaɗa wɔ ɓagiliki, ya dada ɔ talata ɛlɔfʉ tɛkɛɓɛ sɔkɔmʉ nɔ ipoye.
25Mombi ɔ tɛa ngɨananɨ, a꞉ɓiomʉ nɔ ɨkyɛmʉ ngɨyɛ atoso nayɔ uɓu ngʉwɔnanɨ. Kʉdɔ, makwangɔ e꞉njo ʉpanʉ ɓɔ, ɓɨmʉgaba ta ɨyɔ ndʉ baya, ɨhɔ nɔ moi angɔ, nɔ ɓana ɓangɔ, nɔ lɨkyɛmʉ ngɨlangɔ liɓomu, atoso uɓu ngʉwɔnanɨ.
26Mombi ɔ tɛa, ɔ꞉kwa nɔ mau apɛɨ angɔ, nɔ, ɔ꞉mukikelekio ɓɔ: ‹Anaɓɛtɨa ɓaka-sɨ ɓɛtɨanɨ, ambɔ ni꞊nenjo lɨkyɛmʉ ngɨlɛsɔɔ ta liɓomu.› 27Kʉdɔ, makwangɔ ɔ꞉mɨnɨa ikoko, nɔ, ɔ꞉mɨpaakɨa uɓu ngʉwɔnanɨ, nɔ, ɔ꞉minjo kyɛnda.
28Angbinga ngɨa mombi ɔ tɛa ngɨananɨ, a꞉ngwɔ-ɔɔ ananɨ, ɔ꞉tɔjono nɔ aɓwangɔ mombi ɔ tɛa ngakɔmɔ, ɨya, a꞉sɨka uɓu wɔ mikpekpe yɔ ɓagyɛgyɛ alɨkɔndɔ langɔ. Ɔ꞉mʉfa ga kwɨ, nɔ, ɔ꞉pʉnga nayɔ anamiyo ɨmɨyɔ, ga ɨyɔ nayɔ ɓɔ: ‹Anjo uɓu ngʉwɔsɛmɨ gbɛgbɛ ta aka!›
29Ɨyɔ, mangɛ ɔ꞉kwa nɔ mau ananɨ apɛɨ angɔ, ɓɔ kpru. Ga ɨyɔ nayɔ ɓɔ: ‹Hii, Anaɓɛtɨa ɓaka-sɨ ɓɛtɨanɨ, ambɔ ni꞊nenjo lɨkyɛmʉ ngɨlɛsɔɔ.›
30Yakamɛngana, ɨyɔ ɔ꞉yaa ta yaa. Ɔ꞉sa afisiso mangɛ aɨkáá yɔ boloko. Ga iɓio inani, akɔɓɔya ta aka, a꞉toso-ɔɔ uɓu ngʉwangɔ. 31Ɨyɛ ndʉ ɓabwaɓangɔ, ɓombi ɓɔ tɛa ngʉɓɔmɔ, ɓɛ꞉na yaka ngɨyɛnɛnɨ, ɓɔ꞉dya ikoko amʉtɨma nɔgbɛ. Kʉdɔ, ɓɔ꞉sa aɓɨa makweɓo yaka iɓomu ngɨyɛ ya꞉kyananakɨa.
32Kʉdɔ, makwangɔ ɔ꞉misoko ɨyɔ mombi ɔ tɛa ngɨananɨ, ga ɨyɔ nayɔ ɓɔ: ‹Wa ta mombi ɔ tɛa ata ɓɨɓɨ! Ʉwɛ ngɨa wa꞉ɓio pɛ nɔ uɓu ʉja nɔgbɛ, ɨmɨ, nɔnɛpaakɨa pɛ ʉwɔ ta uɓomu, dɔ, wa꞉nakikelekio pɛ! 33Ɛɛ! Wɔkumo pɛngɛ anɨnɨa mangɛ ikoko, ngbanga kʉndʉ ɨmɨ, na꞉nɛnɨa pɛ ʉwɛ ikoko dɔtanɨ?›
34Kʉdɔ, makwangɔ a꞉huo nɔ ʉnganga, nɔ, ɔ꞉mufisiso mombi ɔ tɛa aboloko, e꞉njo ʉpanʉ ɓɔ, ɓɨmʉkyananaka akɔɓɔya aka atoso-ɔɔ uɓu ngʉwangɔ ta uɓomu.»
35Yeso ɔ꞉tɔpipio sugo tɨa ɓɔ: «Aba ngɨasɛmɨ, akʉʉ ɔ ɓisi, a꞊nɨkyananaka sina inu, kʉɓanɨ, inu, nɔ́kɛpaakɨenimʉ ɓangɛ nɔ mʉtɨma ta mʉngana.»
Currently Selected:
Matayɔ 18: buuN
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc.