Matayɔ 11
11
Yɔanɨ ngɨa atiɓatisa ɔtʉmɔ ɓombi atɨ Yeso
(Luk 7:18-35)
1Angbinga ngɨa Yeso a꞉pipo-ɔɔ ɓɨakɨa ɓakpata ngʉɓangɔ tɛkɛɓɛ nɔ ɓapɨnɨ yaka ngɨyɛ ɓɔkwananɔ kɨa, kʉdɔ, ɔngwa ananɨ, nɔ, ɔ꞉sa apanɨa, nɔ, ɓɨakɨa ɓombi Ɨsaʉ yɛta Iɗo tɨa amati ɔ ɓagʉlʉ ngʉɓɔ Galilaya.
2Yɔanɨ ngɨa a꞉ɓio aboloko, ɔ꞉tɔka awɨa ɔ yaka ngɨyɛ Klisito a꞉ɓio akɨa. Ɔ꞉tʉma mukpekpe yɔ ɓakpata ngʉɓangɔ, anɨsa aɓokuo Yeso ɓɔ: 3«Ʉwɛ ndɨ akɛ, wɔkwananɔ anɨka, ga pɔ ɓɔ tɨɓɛtɨa ɓata-sɨ, kʉ mombi ngakɔmɔ?»
4Kʉdɔ, Yeso a꞉ɓutosio ɓɔ: «Seni aɓɨa Yɔanɨ yaka ngɨyɛ nánʉka, nɔ ɨyɛ nánɨna. 5Ɓombi ɓɔ mamɔmɔ ɓanɨna, nɔ, ɓombi ɓɔ majangi akyɛndaka, nɔ, ɓakeɓukeɓu agyaɓanakɨa, nɔ ʉɓa, ɓa꞉dɨkpa machwei anʉka, nɔ, mɨnda ajʉkana, nɔ, ɓajanga ɓanʉka Ɨsaʉ yɛta Iɗo. 6Ɨgyagya akɔ mombi ngɨa angɔmʉ anapɨa báya ngɨangɔ akʉʉ asɛmɨ nɔ majɛjɛ!»
7Ɨyɛ ndʉ ɓakpata ngʉɓɔ Yɔanɨ ɓa꞉sa, Yeso ɔ꞉pʉnga tɨa anʉngɨa ambaja ɔ ɓombi yaka akʉʉ ɔ Yɔanɨ asugo ɓɔ: «Nɔ́꞉sɔ anɨna ɨmanɨ inani amukengu? Ʉmbamba ngʉwa mahuo wa ndɨ nawɔ abobiso? Haa! 8Nɔ́꞉sɔ dɔ-sɨ anɨna ɨmanɨ? Akɔnɨna mombi ngɨa apenyonoko manjanja? Haa! Dɔ, ingainga, ɓombi ngʉɓɔ ɓapenyonoko manjanja, ɓakɨa ɨɓɔ aɨkáá yɔ ɓangama! 9Ɛɛ! Nɔ́꞉sɔ dɔ tɨa anɨna ɨmanɨ? Ɨgbɛ ndɨ? Yaɓanɨ, a ɨgbɛ yɔ Asɔɓɨɨ, nɔ, ɔchanɔ kʉ nɔ ɨgbɛ. 10Ɨyɔ, Yɔanɨ ingainga akɛ, ya꞉tɛndanakɨa jɛnɛ akʉʉ angɔ, ɓɔ:
‹Na꞊tʉma titima ngɨasɛmɨ apɛɨ asɔɔ,
dɔ, ɨnatambanakɨa ɨngbaa.›#popoko Mal 3:1
11Nanenu asigio ingono ɓɔ, amati ɔ ɓombi ɓaɓomu ngʉɓa ɓa꞉nɔtanɨa akɔ uɓei, yangɔmʉ nɔ ɨya ata mʉja nɔgbɛ anagaaka Yɔanɨ. Yakamɛngana, mombi ngɨa ata bele amati ɔ Ɓʉngama ngʉɓɔ akʉʉ ɔ ɓisi, ɨyɔ akɛ, a ɓata kʉ mʉja anagaaka Yɔanɨ. 12Anɨngwa akɔ angbinga ngɨyɔ Yɔanɨ, aɓɔya kʉndʉ ɓʉɓʉnʉ, Ɓʉngama ngʉɓɔ akʉʉ ɔ ɓisi ɓachana amati ɔ ɗite lɛta ɓʉmʉ nɔgbɛ. Nɔ, ɓombi ɓɔ angu ɓahata naɓɔ asɨka kʉ nɔ ɓʉkaɓʉkaɨ.
13Dɔ, pɛɨ ngɨa Yɔanɨ ɛ꞉ka-ɔɔ, Mabii maɓomu amati ɔ mapanʉ ngʉkɔ Musa, nɔ amati ɔ lɨtaɓʉ liɓomu ngɨlɔ magbɛ, ka꞉ɓio apanɨa akʉʉ ɔ ngbinga ngɨa Asɔɓɨɨ ɛ꞊maiso sina-ɔɔ Ɓʉngama ngʉɓangɔ. 14Dɔ, nɔ́bayeni yaka ngɨyɛnɛnɨ, Yɔanɨ ingainga akɛ, a Ɛlɨa ngɨa ɓa꞉sugo jɛnɛ ɓɔ a꞊nɨka. 15Mombi ngɨa anɔ machwei kɔ nʉka yaka, ʉka!
16Nasisono dɔ-sɨ ɨfananja yɔ ɓombi ngʉɓɔ ɓʉɓʉnʉ nɔ ɨmanɨ? Ɓa ngbanga ndʉ ɓana ɓiɓio ɓaweleke aibamu, ɨɓɔ akɔtʉɓakɨa ɓangɛ ɓɔ:
17‹Ɨmanɨ ndʉ tɔ꞉nʉpɨɔ vukumbe, sɔkɔmʉ nujo pɔ nujo!
Nɔ, tɔ꞉nɨsʉa ʉmbɔ wɔ didima, sɔkɔmʉ nɨ́njɨlakiso masoi pɔ njɨlakiso!›
18Dɔ, angbinga ngɨa Yɔanɨ ɛ꞉ka-ɔɔ, a꞉taa idyo, ɨhɔ nɔ mwakanaka kʉtaa. Kʉdɔ, ɓombi ɓɔ꞉pʉnga nayɔ asigio tɨa ga anɔ mʉtɨma wɔ idu. 19Angbinga ngɨa Mwana ngɨyɔ Mombi ɛ꞉ka-ɔɔ, a꞉ɓio anɨdya idyo nɔ nɨmwakanaka. Ɓɔ꞉pʉnga nayɔ asigio ɓɔ: ‹Ineni-sɨ ngbuka ngɨa, nɔ kʉ mombi ɔ lɨdamʉ! Nɔ, a kʉ awai ɔ ɓombi ɓɔ lipisa manjanja, nɔ ɓombi ɓɔta ɓɨɓɨ!› Yakamɛngana, yaka ngɨa akɨa yapananiso nɨmbɨmbɨanaka ngɨa Asɔɓɨɨ.»
Yeso ɔgbangɔ ɓagʉlʉ ngʉɓa ɓɔyaɔ abaya
(Luk 10:13-15)
20Tɨa ananɨ, Yeso ɔ꞉pʉnga nyakɨa ɓagʉlʉ ngʉɓa aki a꞉kɨa-ɛɛ ɓʉja ɓɔ ɓakɔkɔ ngʉɓangɔ. Ingainga dɔ, ɓombi ɓɔngɔ ɓa꞉kʉndamʉ nacho mɨtɨma. Ga ɨyɔ ɓɔ: 21«Ikoko akɔ ʉwɛ, gʉlʉ ɔ Kɔlajɨnɨ! Ikoko akɔ ʉwɛ, gʉlʉ wɔ Bɛtɛsaida! Dɔ, na꞉kɨa pɔngɔ ɓakɔkɔ andɛnɔ. Ɨnadɔ, nɔ꞉kɨeni pɔngɔ ɓakɔkɔ ngʉɓɔnanɨ akɔ gʉlʉ wɔ Tilo, nɔ ɨya wɔ Sɨdɔna, ambɔ ɓa꞉nacho jɛnɛ mɨtɨma kʉ ɨjɛnɛ, nɔ, pɛnɨa likonio, nɔ, tono nɔ isupu, apananiso ɓɔ ɓɔnacho mɨtɨma nachoo. 22Kʉdɔ, nanenu asigio ɓɔ, akɔ ɓisi ngʉɓa Asɔɓɨɨ a꞊ɓio sina-ɔɔ akio mʉkɔmbʉ wɔ dɔdɔ, a꞊kio ʉweno ɓʉkaɨ nɔgbɛ, anagaaka ʉwɔ ɓombi ɓɔ Tilo nɔ Sɨdɔna!
23Nɔ ʉwɛ, gʉlʉ ɔ Kapalanaumu! Wa ndɨ ayongo ga ɓanatʉmba akɔɓɔya akʉʉ ɔ ɓisi? Yangɔɓiomʉ ɓanɨ! Yakamɛngana, ɓa꞊nɔdiso nɔgbɛ, akɔɓɔya ta aɓʉbɨɨ! Dɔ, ɓakɔkɔ ngʉɓa na꞉kɨa pɔngɔ andɔɔ, nɔ꞉ɓʉkɨeni pɔngɔ anɔ Sɔdɔmʉ, ambɔ gʉlʉ ngɨananɨ, a-sɨ kʉɔ. 24Nanenu asigio ɓɔ, akɔ ɓisi ɓɔ kio mʉkɔmbʉ, gʉtʉ ta mʉkɔmbʉ ngʉwɔ Sɔdɔmʉ, wa꞊ngɔɓiomʉ ngbanga nɔ ʉweno!»
Yeso ɔpananiso Ɨsɛ
(Luk 10:21-22)
25Akɔ angbinga ngɨananɨ, ga Yeso ɓɔ: «Hii Aba! Ʉwɛ akɛ, wa Mamʉkwɔ ɔ ɓisi nɔ dɔdɔ! Nɔnabibiso, dɔ, wa꞉naya yaka ngɨyɛ, akɔ ɓombi ɓɔ nɨmbɨmbɨanaka, nɔ ʉɓa, ɓeyo balʉa. Yakamɛngana, wɔ꞉ɨmbiiso tɨa akɔ ɓombi ɓɔta ɓʉtʉʉ. 26Hii Aba! Wa꞉baya ɓɔ yɨkyananakɨa ta ɓanɨ.
27Aba ngɨasɛmɨ, a꞉nenjo ɨmɨ yaka ta iɓomu. Nɔ, mombi pɔ mʉngana angɛmbɨa Mwana, yɔɓienimʉ ta Aba ingainga. Nɔ, pɔ mʉngana angɛmbɨa Aba, yɔɓienimʉ ta ɨyɔ Mwana, nɔ tɨa kʉ ɨya, ɨyɔ Mwana akwaisio nayɔ anɨmbiiso ɨyɔ.
28Ikeni andamɨ, inu, ngʉɓa náɓabɔmbɛ nɔ litumo lɛta ɓuto ɓuto! Ɨmɨ, nanihomoniso homonisoni. 29Anabayeni ɨmɨ, ndʉ mombi ngɨa akyɛndakiso uɓei ngʉweno. Ɨmɨ akɛ, niɓio nenu apananakɨa, dɔ ɨmɨ, na iɗo, nɔ kʉ nɔ mʉtɨma wɔ majɨɔ. Nɔ ɨmɨ, nanihomoniso homonisoni. 30Dɔ, nɛmɨ akyananakɨa, yangɔmʉ ɓʉkaɨ, nɔ itumo ngɨyɛsɛmɨ nakʉnda nenu atumbiso yangɔmʉ ɓuto kʉɓanɨ. Yakamɛngana, ya siasia.»
Currently Selected:
Matayɔ 11: buuN
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc.
