Mʉkpanganɨa 46
46
Yakɔɓɔ ɔsɔ nɔ ɨfananja ngɨangɔ anɔ Misili
1Kʉdɔ, Ɨsalaɛlɛ ɔ꞉ngwɨa kyɛnda, nɔ ɓayaka ngʉɓangɔ ta ɓaɓomu, ɓɔ sɛ. Ɨyɛ ndʉ a꞉ɓɔya, anɔ Bɛlɨ-Sɛba, e꞉njo Asɔɓɨɨ ngɨyɛ ɨsɛ Isaka, mutebii. 2Naɓutu ngɨananɨ, Asɔɓɨɨ ɔ꞉yakanaka nayɔ, amati ɔ ɨkyɛmʉ ndʉ lɨwɔtɔ. Ɔ꞉misoko ɓɔ: «Ha Yakɔɓɔ-ee! Yakɔɓɔ-ee!» Ɨyɔ Ɨsalaɛlɛ ɔ꞉mɨsaɓɨa ɓɔ: «Hei! Ɨmɨ ɨya!» 3Ga Asɔɓɨɨ nayɔ aka ɓɔ: «Ɨmɨ na Asɔɓɨɨ, Asɔɓɨɨ ngɨa wɔ atɔ. Watɨkumomʉ anɨsa anɔ Misili, dɔ inani, nabinochiso, nɔ wɛ꞊ka ɨbaba yɔ ɓombi yɛta ɨja. 4Ta ɨmɨ ingainga akɛ, nabi nɔwɛ inani anɔ Misili, nɔ kʉ ɨmɨ akɛ, na꞊tɔwa sina nɔwɛ. Ta Yɛjɛfʉ nɔ lɨkɔndɔ langɔ ɓɔ kpɛ akɛ, abinayɛta suo, lɨgbɛɨ lɔ mesu nɔ mʉdʉʉ.»
5Kʉdɔ, Yakɔɓɔ a꞉ngwa ananɨ anɔ Bɛlɨ-Sɛba. Ɓana ɓɔ Ɨsalaɛlɛ ɓɔ꞉mʉtʉmba ɨsɛ eɓo Yakɔɓɔ, ɨhɔ nɔ ɓoi ɓeɓo, nɔ ɓana ɓeɓo kʉtaa, akʉʉ ɔ mɨtʉka ngɨyɛ ɓapunda ɓakyɔɗuɗuo, ɨyɛ Falaɔ a꞉tʉma naɓɔ akpata. 6-7Ɓa꞉sɨka kʉ nɔ mitunduga yɔ ɓanama ngʉɓeɓo, nɔ ikesi ngɨyɛ ɓɛ꞉nɨanɨa nayɔ anɔ Kanana. Yakɔɓɔ a꞉sa anɔ Misili, nɔ ɨfananja ngɨangɔ ta iɓomu ɓɔ sɛ: ɓana ɓangɔ ngʉɓa ɓegue, nɔ ʉɓa ɓeɓoi, ɓanɔnɔ ɓangɔ ngʉɓa ɓegue, kʉ nɔ ʉɓa ɓeɓoi.
Ɓanɔnɔ ɓɔ Yakɔɓɔ anɔ Misili
8Mano kɔ Ɓaɨsalaɛlɛ, Yakɔɓɔ, ɨhɔ nɔ ɓana ngʉɓa ɓa꞉sa naɓɔ anɔ Misili, ka ɓɔ: Ya-sɨ Lubeni, tapio ngɨyɔ Yakɔɓɔ. 9Ɓana ɓegue nga ɓɔ Lubeni, atɨ Hanɔkɨ, nɔ Palʉ, nɔ Hɛsɨlɔnɨ nɔ Kalamɨ.
10Ɓana ɓegue nga ɓɔ Simoni, atɨ Yɛmʉɛlɨ, nɔ Yamɨnɨ, nɔ Ɔhadɨ, nɔ Yakɨnɨ, Sɔhalɨ, nɔ Saʉlɨ ngɨa mwana ɔ muto Ɓakanana.
11Ɓana nga ɓɔ Lawi, atɨ Gɛlɛsɔnɨ, nɔ Kɔhatɨ nɔ Mɛlalɨ.
12Ɓana ɓegue nga ɓɔ Yuda, atɨ Ɛlɨ, nɔ Ɔnanɨ, nɔ Sɛla, nɔ Pɛlɛsɨ nɔ Jɛla. Yakamɛngana, atɨ Ɛlɨ nɔ Ɔnanɨ ɓa꞉wo ɨɓɔ ta anɔ Kanana. Ɓana nga ɓɔ Pɛlɛsɨ, atɨ Hɛsɨlɔnɨ nɔ Haamʉlɨ.
13Ɓana ɓegue nga ɓɔ Isakali, atɨ Tɔla, nɔ Pʉwa, nɔ Yasʉbʉ nɔ Sɨmʉlɔna.
14Ɓana ɓegue nga ɓɔ Jɛbʉlʉnɨ, atɨ Sɛlɛdɨ, nɔ Ɛlɔnɨ nɔ Yalɛlɨ.
15Ɓana ɓegue ngʉɓa Lɛa a꞉mʉnɔtɨa Yakɔɓɔ anɔ Padanɨ-Alanɨ, ʉɓɔnanɨ, kʉ nɔ mʉsaɨ weɓo Dina. Ɓana ngʉɓɔnanɨ ɓaɓomu nɔ ɓana ɓeɓo, ɓa꞉ɓio ɓombi ɓatɛkɛɓɛ ɓaatʉ nɔ ɓaatʉ.
16Ɓana ɓegue nga ɓɔ Gadɨ, atɨ Sɨfɨɔnɨ, nɔ Hagɨ, nɔ Sʉnɨ, nɔ Ɛsɨbɔnɨ, nɔ Ɛlɨ, nɔ Alɔdɨ nɔ Alɛlɨ.
17Ɓana ɓegue nga ɓɔ Aseli, atɨ Ɨmʉna, nɔ Ɨsɨwa, nɔ Ɨsɨwɨ, nɔ Bɛlɨa dɔ tɨa Sɛla, manye eɓo ngɨa ata moi. Ɓana nga ɓɔ Bɛlɨa, atɨ Hɛbɛlɨ nɔ Malɨkɨɛlɨ.
18Ɓana ɓegue ɨhɔ nɔ ɓanɔnɔ ngʉɓa Jɨlɨpa a꞉nɔtɨa Yakɔɓɔ ɓa꞉ɓio ɓaɓomu tɛkɛɓɛ nɔ mɛɗɨa. Ɨyɔ Jɨlɨpa ngɨananɨ, Labanɨ a꞉minjo jɛnɛ mwana angɔ Lɛa ndʉ mombi ɔ tɛa angɔ.
19Lakeli, moi ɔ Yakɔɓɔ a꞉mʉnɔtɨa swaɨ ɓana ɓegue ɓapɨnɨ, atɨ Yɛjɛfʉ ɨɓɔ nɔ Bɛnjamɛ. 20Asɛnatɨ, mwana ɔ Pɔtɨfɛla ngɨa kumukumu ɔ gʉlʉ wɔ Oni, a꞉nɔtɨa Yɛjɛfʉ inani anɔ Misili, ɓana ɓegue, atɨ Manasɛ nɔ Ɛfalaɨmʉ.
21Ɓana nga ɓɔ Bɛnjamɛ, atɨ Bɛla, nɔ Bɛkɛlɨ, nɔ Asɨbɛlɨ, nɔ Gɛla, nɔ Namanɨ, nɔ Ɛhɨ, nɔ Lɔsɨ, nɔ Mʉpɨmʉ, nɔ Hʉpɨmʉ nɔ Aladɨ.
22Ɓana ɓegue ɨhɔ nɔ ɓanɔnɔ ngʉɓa Lakeli a꞉nɔtɨa Yakɔɓɔ, ɓa꞉ɓio ɓaɓomu tɛkɛɓɛ nɔ ɓɔgɨna.
23Mwana nga wɔ Danɨ ta Hʉsɨmʉ.
24Ɓana nga ɓɔ Nafʉtalɨ, atɨ Yasɛɛlɨ, nɔ Gʉnɨ, nɔ Yasɛlɨ nɔ Sɨlɛmʉ.
25Ɓana ɓegue ɨhɔ nɔ ɓanɔnɔ ngʉɓa Bila a꞉nɔtɨa Yakɔɓɔ ɓa꞉ɓio ɓaɓomu mɛɗɨanɛka. Ɨyɔ Bila ngɨananɨ, Labanɨ a꞉minjo jɛnɛ mwana angɔ Lakeli ndʉ mombi ɔ tɛa angɔ.
26Ɓombi ngʉɓa Yakɔɓɔ a꞉sa naɓɔ anɔ Misili, ta ʉmbɛkɛ ngʉwangɔ ɓɔ kpɛ, ɓa꞉ɓio ɓaɓomu, ɓatɛkɛɓɛ mɛɗɨa nɔ mɛɗɨa, sɔkʉmʉ apoo ɓaneni ɓangɔ. 27Yɛjɛfʉ a꞉nɔta anɔ Misili ɓana ɓapɨnɨ. Ɓombi ɓaɓomu, ngʉɓɔ ɨfananja ngɨyɛ Yakɔɓɔ, ʉɓa ɓa꞉sa inani anɔ Misili, ɓa꞉ɓio ɓombi ɓatɛkɛɓɛ mɛɗɨanɛka.
Yakɔɓɔ ɔɓɔyɔ nɔ ɨfananja ngɨangɔ anɔ Misili
28Yakɔɓɔ a꞉tʉma-sɨ ta Yuda apɛɨ, inani atɨ Yɛjɛfʉ akɔtambanaka kyɛnda anɨsa tɨa anɔ Gɔsɛnɨ. Ga ɨɓɔ anɔ Gɔsɛnɨ, ga buu. 29Yɛjɛfʉ ɔ꞉ɗeto akʉʉ ɔ mʉtʉka ngʉwangɔ, wɔ ɓʉngama, nɔ, ɔ꞉sa anɔ Gɔsɛnɨ, akɔtɛtɨa ɨsɛ Ɨsalaɛlɛ. Ɨyɛ ta Yɛjɛfʉ a꞉mɨna ɓɔ, ga ɨyɔ nayɔ ɓɔ putu, nɔ ɔ꞉ndɨa ɓɔ ndɨɨ, ananɨ aɨmiɔ ngɨyɛ ɨsɛ. 30Ga Ɨsalaɛlɛ nɔ Yɛjɛfʉ aka ɓɔ: «Ha gue! Ɨtakɨtakɨ ngɨyɛ, gʉtʉ nɔweni, yangɔkɨa ɓata ɨkyɛmʉ, dɔ, nɛnɔ mesu kʉsɔɔ, wɔɓieni-sɨ kʉwɔ.»
31Kʉdɔ, Yɛjɛfʉ a꞉sigio ɓamanye, nɔ ambaja muɓomu ngɨa ɔ ɨkáá ngɨyɛ ɨsɛ ɓɔ: «Na-sɨ anɨsa aɓɨa Falaɔ. Nabimusigio ɓɔ ɓanduku ɓɔsɛmɨ, nɔ ɨkáá ngɨa aba iti, anɨngwa anɔ Kanana, ɓɛ꞉kɔ tɨa andamɨ ɨkanɨ. 32Ɨɓɔ, ɓa dɔ ɓapɛmakɨa ɓɔ ɓanama. Kʉ ananɨ, ɓɛ꞉ka-ɔɔ nɔ ɓamɛmɛ, nɔ ɓakɔndɔlɔ, nɔ ɓangɔmbɛ ngʉɓeɓo ta ɓaɓomu ɓɔ sɛ, nɔ ɓayaka ngʉɓeɓo kʉ ɓaɓomu. 33Ɨyɔ Falaɔ ɔnisokeni, nɔ, ɔnɨɓokuo ɓɔ nákyɔkɨa tɛa nga yino tanɨ, 34mutosieni ta ɓɔ: ‹Isu ɓabaya ɓɔsɔɔ, ta ɓapɛmakɨa ɓɔ ɓanama, anɨngwa ta nɨɓwana, tɛa ngɨyɛnɛnɨ ɓaba ɓa꞉tɨsɨa nayɔ.› Kʉ ananɨ, ná꞊wolo-ɔɔ ɨkʉmbʉ anɔ Gɔsɛnɨ. Dɔ, ɓapɛmakɨa ɓɔ ɓanama, ɓa ɔpɛ, akɔ Ɓamisili.»
Currently Selected:
Mʉkpanganɨa 46: buuN
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc.
