Mɨkyananakɨa 2
2
Mʉtɨma wɔta Tu wejeyo ɓombi ngʉɓa ɓɔbayɔ Yeso
1Ngbinga ngɨa ɓisi ɓɔ Patɛkɔtɛ ɓɛka-ɔɔ, ɓombi ngʉɓa ɓa꞉baya Yeso, ɓa꞉ɓio ɓaɓomu ɓamɔmanɨɛ tɨta ɨda mɛngana. 2Ta gagaa ngɨananɨ, mungito mʉngana wɔ꞉ngwa akʉʉ ɔ ɓisi, ndʉ mahuo kɔta maja kiɓio ahuo, nɔ wɔ꞉huo amati ɔ ɨkáá iɓomu ngɨyɛ ɓa꞉ɓio-ɛɛ ɓawele. 3Kʉdɔ, ɨkyɛmʉ mɛngana yɔ꞉chwɛanɨa ndʉ magou kʉ dyaa. Maɗaɗa kɔngɔ kɔ꞉nagbonyonoko nɔ kɔwoloko akʉʉ ɔ eɓo nangana nangana. 4Ɨɓɔ ɓaɓomu ɓɔ꞉huo nɔ Mʉtɨma wɔta Tu, nɔ ɓɔ꞉pʉnga yaka nɔ mɨyakɨa nga yɔmɔ, ngbanga kʉndʉ aka Mʉtɨma wa꞉ɓio-ɔɔ naɓɔ akɔtitio akɔ yaka.
5Ɨnadɔ, anɔ Yelusalɛma amati ɔ makwaa ngʉkɔnanɨ, ya꞉ɓio nɔ Ɓayuda ɓɔ kɛkɛɛ akɔ yaka yɔ Asɔɓɨɨ, ngʉɓa ɓa꞉ngwa akɔ mababa kɔ ɓombi maɓomu ngʉkɔ dɔdɔ. 6Ndʉ mungito ngʉwɔnanɨ wa꞉kɔnɨɔ, ɓombi ɓaja ɓɛka akɔmɔmanɨa ananɨ. Yaka ngɨyɛnɛnɨ, yɔ꞉ɓʉkyaka nɔgbɛ, dɔ, mombi nɔ mombi a꞉ɓio naɓɔ anʉka akɔyaka ta nɔ mʉyakɨa ngʉwangɔ ingainga. 7Yaka ngɨyɛnɛnɨ, ya꞉ɓukiso ʉɓá nɔ yɔɓʉmbangɨa, nɔ, ɓɔ꞉sugo ɓɔ: «Ɓombi ngʉɓa ɓakɔyaka aɓɛ, ɓaɓomu ɓambɨndɨ-sɨ ta Ɓagalilaya? 8Yɔkwɔ dɔ-sɨ tanɨ ɨyɛ mombi nɔ mombi ati eso, a-ɔɔ naɓɔ anʉka ta amʉyakɨa ngʉwangɔ wɔ nʉtanɨa ingainga? 9Ati eso aka ɓɔ yanɔ Ɓapelesi, Ɓamedi, nɔ Ɓaelami. Nɔ, ɓiga ngʉɓa ɓa꞉wolo ɨkʉmbʉ anɔ Mesopotamia, nɔ anɔ Yudɛa, nɔ anɔ Kapadɔkɨa, nɔ anɔ Pɔtɔ, nɔ Ajia, 10nɔ anɔ Filigia nɔ Pamufilia, nɔ Misili, nɔ ihoi ngɨyɛ yɔ Kɨlɛnɛ amati ɔ Libia, ya꞉ɓio kʉ nɔ ʉɓa ɓa꞉ngwa anɔ Lɔma, 11anɔ Kɛlɛtɛ nɔ Alabia. Ati eɓo yanɔ Ɓayuda, nɔ ɓombi ngʉɓa ɓangɔmʉ Ɓayuda, ʉɓa ɓa꞉nacho mʉtɨma akɔ ɨtandɛ ngɨyɛ Ɓayuda. Isu ɓaɓomu, tanaɓɔ akɔnʉka ɓɔɓieni akɔɓɨakɨa yaka yɛta ɨmbangɛ ngɨyɛ yɔ Asɔɓɨɨ!» 12Yaka ngɨyɛnɛnɨ, yɔ꞉ɓukiso ʉɓá nɔ sɔkɔmʉ ɓɛ꞉mbɨa ɓata ɓɔ ɓasugo tanɨ, kʉdɔ, ɓɔ꞉pʉnga yakanaka ati eɓo ɓɔ: «Ɨsɨ yɔ yaka ngɨyɛ ya tanɨ?» 13Yakamɛngana, ɓɔmɔ ɓɔ꞉yapakiso yaka ngɨyɛnɛnɨ yɔ ɓombi ngʉɓa ɓa꞉baya ta yapakiso, nɔ, ɓɔ꞉sugo ɓɔ: «Ɓague ngʉɓa ɓɔ꞉damʉɔ ʉkyɛpʉ kʉ ingono.»
Pɛtɛlɔ ɔngakɨɔ ambaja ɔ ɓombi yaka
14Kʉdɔ, Pɛtɛlɔ a꞉ngwa ɨkʉʉ ɨyɔ ɨhɔ nɔ ɓatitima tɛkɛɓɛ nɔ mʉngana, ɔ꞉pʉnga anʉngakɨa ambaja ɔ ɓombi yaka nɔ iso yɛta ɓʉmʉ, akɔsugo ɓɔ: «Inu Ɓayuda, nɔ inu ɓombi ɓaɓomu ngʉɓa na anɔ Yelusalɛma aka, ukeni nɔ nɔ́pemiso yaka ngɨyɛ nanenu asigio ta iɗo. 15Ɓague ngʉɓa ɓangɔmʉ nɔ ɨdamʉ ndʉ aka na-ɔɔ akɔtunguo, dɔ, ya-sɨ ta saa ɔ ɓeetu ngɨyɔ ikuɓa! 16Yakamɛngana, yaka ngɨyɛ ɨgbɛ yɔ Asɔɓɨɨ Yɔɛlɛ a꞉ngaka jɛnɛ ɨyɛnɛnɨ yakɔkyananakɨa.
17Asɔɓɨɨ akɔsugo ɓɔ:
‹Akɔ ɓisi ɓɔ mupipio,
na꞊to sina Mʉtɨma wɔta Tu ngʉwɔsɛmɨ
akʉʉ ɔ ɓombi ɓaɓomu.
Ɓana ngʉɓeno ɓegue nɔ ʉɓa ɓeɓoi
ɓa꞊kwa sina ɨgbɛ akʉʉ ɔ yaka ngɨyɛ yanɨngwa atɨ Asɔɓɨɨ.
Ɓandambʉ ngʉɓeno ɓɛ꞊na sina yaka ndʉ lɨwɔtɔ.
Likweikwei ngɨleno la꞊takanaka sina.
18Ya ɓanɨ akɔ ɓisi ngʉɓɔnanɨ,
na꞊to sina Mʉtɨma ngʉwɔsɛmɨ
akʉʉ ɔ ɓombi ɓɔ tɛa ngʉɓɔsɛmɨ, ɓague nɔ ɓoi ɓɔngɔ,
nɔ ɓa꞊kwa sina ɨgbɛ anʉngaka yaka ngɨyɛ yanɨngwa atɨ Asɔɓɨɨ.
19Na꞊chwɛiso sina yaka yɛta ɨmbangɛ akʉʉ ɔ ɓisi
nɔ ɓakɔkɔ asɨ ɔ dɔdɔ.
Ya꞊ɓio sina menike, nɔ dyaa, nɔ lɨkʉɓa lɔ umwei.
20Ɨpa ya꞊natanaka sina umomo,
nɔ uwi ɓɔ ngbʉʉ ndʉ menike.
Mbise ɔngɔ, ɓisi ɓɔta ɓʉja ngʉɓa ɓɔ Makwɔɓɨɨ
nɔ ʉɓa ɓɔ ʉbɨba ɓɛ꞊ka dɔ tɨa.
21Kʉdɔ, mombi muɓomu ngɨa a꞊chwa ino yɔ Makwɔɓɨɨ
ɛ꞊nɨanɨa nɔ ɓʉhɛa.›#popoko Yɔɛ 3:1-5
22Inu ɓombi ɓɔ Ɨsalaɛlɛ, ʉkeni yaka ngɨyɛ nanenu asigio: Nanenu akɔngakɨa yaka akʉʉ ɔ Yeso ngɨyɔ Najalɛtɨ. Asɔɓɨɨ a꞊pananiso ɓɔ, ɨyɔ akɛ a꞉tʉma Yeso, ɨngbaa akɔkɨa yaka yɛta ɨmbangɛ, nɔ ɨyɛ yɛta ɨkyakɛ, nɔ ɓakɔkɔ ngbanga kʉndʉ nánɨmbɨa. 23Mombi ngɨananɨ, ɓa꞉minjo alɨkɔndɔ leno akɔkpatanakɨa nɔ ɓʉkʉnda nɔ nɨmbɨmbɨanaka ngɨyɛ Asɔɓɨɨ a꞉tambanaka jɛnɛ kʉ pɛɨ. Inu, na꞉mʉɓakakiso akʉʉ ɔ mʉsalaba, akɔ lɨkɔndɔ lɔ ɓombi ngʉɓa ɓangɔmʉ Ɓayuda, kʉdɔ nɔ꞉mʉwa. 24Yakamɛngana, Asɔɓɨɨ a꞉mʉjʉkaniso akɔ ingwo, nɔ ɔ꞉mʉɓwanakiso akɔ ɓʉkaɓʉkaɨ ɓɔngɔ. Dɔ, ingwo ya꞉ɓiomʉ adaa ngɨa yamʉfa-ɔɔ asɨ ɔ ʉpanʉ ngʉwangɔ. 25Dawidi a꞉sugo akʉʉ ɔ Yeso ɓɔ:
‹Na꞉ɓio akɔnɨna Makwɔɓɨɨ ngbinga muɓomu apɛɨ asɛmɨ,
dɔ ɨyɔ, akɔ ɨkɔndɔ yɔ guwɔngɔ ngɨyɛsɛmɨ, iɗo ambɔ natɨkwamʉ amati ɔ báya.
26Kʉɓanɨ, mʉtɨma ngʉwɔsɛmɨ wanɨkwa ɨgyagya,
nɔ, nakɔsʉswanaka nɔ ɨgyagya.
Nɔ ndʉtʉ ngɨyɛsɛmɨ ingainga, ya꞊ɓio ta nɔ itungwio
akɔnɨanɨa nɔ ɨkyɛmʉ atɨ Asɔɓɨɨ.
27Dɔ ʉwɛ, Makwɔɓɨɨ wa꞊ngɔsɨa sina
uɓei ngʉwɔsɛmɨ akɔɓio aɓʉbɨɨ.
Wa꞊ngɔnasɨamʉ ɨmɨ baya asɔɔ, akɔpɔwa amati ɔ ɓʉnjaʉ.
28Ʉwɛ, wa꞉napana ɨngbaa yɔ ɓʉhɛa.
Nɔ akɔɓio ɨhɔ nɔwɛ, ya꞊nahuiso sina nɔ ɨgyagya.›#popoko Mmb 16:8-11
29Inu ɓanduku, nakʉnda nenu anʉngakɨa yaka ngɨyɔ kuku Dawidi ta aɓʉmba. Ɨyɔ awo nɔ ɓɔ꞉mʉhʉna, nɔ ɓʉnjaʉ ngʉɓangɔ ɓa-sɨ ɓʉɓʉnʉ kʉɔ andeso aka. 30Yakamɛngana, ɨyɔ a꞉ɓio ɨgbɛ yɔ Asɔɓɨɨ, nɔ, aɓio akɔnɨmbɨa ɓɔ Asɔɓɨɨ a꞉simio nɔ ɔ꞉kio silika ɓɔ, mombi ɔ ɨfananja ngɨangɔ, ɨya ɔ꞉chwɛɔ akɔ ɓʉa ngʉɓangɔ akɔ báya, a꞉sɨka sina ɓʉngama ambise angɔ. 31Dawidi ɛ꞉na ta pɛɨ yaka ngɨyɛ ya꞊ɓio sina akɔ kyananakɨa. Kʉdɔ, a꞉sugo akʉʉ ɔ Masia ɓɔ a꞊jʉkana sina akɔ ingwo ngbinga ngia a꞉sugo-ɔɔ ɓɔ:
‹Ɓa꞉mʉsɨamʉ aɓʉbɨɨ, nɔ, ndʉtʉ ngɨangɔ ya꞉kɔpɔwamʉ aɓʉnjaʉ.›
32Asɔɓɨɨ a꞉jʉkaniso Yeso ngɨananɨ akɔ ingwo, nɔ, isu ɓaɓomu ta ɓadɛmʉ ɓɔngɔ. 33Ɨsɛ Asɔɓɨɨ a꞉mʉtʉmba, nɔ ɔmuwoliso akɔ ɨkɔndɔ yɔ guɔngɔ ngɨangɔ. Nɔ, ɔ꞉minjo Mʉtɨma wɔta Tu, ngʉwa a꞉mʉpanaka jɛnɛ. Kʉdɔ ɨyɔ, ɔ꞉tutio tɨa isu, yaka ngɨyɛ nánɨna nɔ nʉka ɨtakɨtakɨ ngɨyɛ. 34Dawidi a꞉samʉ ɨyɔ akʉʉ ɔ ɓisi, yakamɛngana, a꞉sugo ɓɔ:
‹Asɔɓɨɨ Makwɔɓɨɨ a꞉sigio Makwasɛmɨ ɓɔ:
Ika akɔwolo akɔ ɨkɔndɔ ngɨyɛsɛmɨ yɔ guɔngɔ,
35akɔɓɔya aka, na꞊napɨa-ɔɔ ɓakwa ngʉɓɔsɔɔ
akɔɓio asɨ ɔ mɨtɨndɨ ngɨyɛsɔɔ.›
36Ɨfananja ngɨyɛ Ɓaɨsalaɛlɛ kʉ iɓomu, yɔkwananɔ gɔ pɛngɛ akɔnɨmbɨa iɗo nɔgbɛ ɓɔ, Yeso ngɨananɨ, ná꞉mʉɓakaka akʉʉ ɔ mʉsalaba, Asɔɓɨɨ a꞉mʉnataniso akɔɓio Makwɔɓɨɨ nɔ Masia.»
Ambaja ɔ ɓombi ɔbayɔ Yeso
37Akɔ angbinga ngɨa ɓombi ɓa꞉kɔ-ɔɔ yaka ngɨyɛnɛnɨ, yɔ꞉ɓupoto amʉtɨma nɔ ɓɔ꞉ɓokuo atɨ Pɛtɛlɔ nɔ ɓatitima ngʉɓɔmɔ ɓɔ: «Inu ɓanduku, tɔkwananɔ aka akɨa tɨa tanɨ?» 38Kʉdɔ, Pɛtɛlɔ ɔ꞉ɓutosio ɓɔ: «Nécheni mɨtɨma ngɨyeno, nɔ mombi nɔ mombi ɨkwa uɓatiso akɔ ino yɔ Yeso Klisito. Kʉdɔ, Asɔɓɨɨ a꞊nɨpaakɨa ɓʉɓɨɓɨ ngʉɓeno, nɔ, ɔ꞉ninjo Mʉtɨma wɔta Tu ndʉ apɛpɛ. 39Asɔɓɨɨ Makwɔɓɨɨ a꞉panaka ɓombi ɓaɓomu ngʉɓa a꞊ɓisoko sina, mʉtɨma wɔta Tu ngʉwangɔ. Yaka ngɨyɛnɛnɨ ya akʉʉ eno, akʉʉ ɓana ɓeno, nɔ akʉʉ ɔ ɓombi ɓaɓomu ngʉɓa ɓa ɗu ɗu ɗu.» 40Pɛtɛlɔ ɔ꞉ɓʉngakɨa ɓata yaka nga yɔmɔ ɨja naɓɔ aninjo ʉpanʉ, nɔ, naɓɔ akɔninjo iguegue akɔsugo ɓɔ: «Nágbonyonokeni nɔ ɓombi ɓɔta ɓɨɓɨ ngʉɓa ɓɔ ɓʉɓʉnʉ.» 41Ɓombi ɓaja ngʉɓa ɓa꞉baya yaka ngɨyɛ Pɛtɛlɔ a꞉ɓio akɔsugo, ɓɔ꞉kwa uɓatiso. Nɔ ɓisi ngʉɓɔnanɨ, ɓombi tinetine ndʉ ɛlɛfʉ ɓeetu, ɓɛ꞉ka amatania akʉʉ ɔ mboi yɔ ɓombi ngʉɓa ɓa꞉baya Yeso pɛɨ.
Ɓombi ngʉɓa ɓabaya ɓa ɨkyɛmʉ mɛngana
42Ɓombi ngʉɓɔnanɨ, ɓa꞉ɓio akɔnʉka mapanʉ ngʉkɔ ɓatitima nɔ mʉsasa, angbinga ta muɓomu. Ɨɓɔ ɓaɓomu, ɓa꞉ɓio ɨkyɛmʉ mɛngana akɔɓundo mʉkatɨ#2:42 pɔ ɓɔ, adiga Idyo ngɨyɔ Makwɔɓɨɨ ɨhɔ nɔ nɨta kʉ ɨhɔ. 43Mombi nɔ mombi a꞉ɓio nɔ ʉɓá, dɔ, Asɔɓɨɨ a꞉ɓio akɔkɨa yaka yɛta ɨmbangɛ nɔ ɓakɔkɔ ɓaja ɨngbaa akɔ ɓatitima. 44Ɓombi ngʉɓa ɓa꞉baya ɓaɓomu, ɓa꞉ɓio ɨkyɛmʉ mɛngana, nɔ ati eɓo, ɓɔ꞉pakana lɨkyɛmʉ liɓomu ngɨlɛ ɓa꞉ɓio nalɔ. 45Ɓa꞉ɓigabiso lihoi nɔ lɨkyɛmʉ ngɨleɓo. Nɔ, ɓɔ꞉pakana ɓagyɛgyɛ ɓɔngɔ ati eɓo ɓaɓomu, akɔkpatanakɨa nɔ angɨɔ ngɨɔ mombi nɔ mombi. 46Masi maɓomu, ɓa꞉ɓijonokio amati ɔ ɨkáá yɔ Asɔɓɨɨ nɔ mʉtɨma mʉngana. Akɔ lɨkáá ngɨleɓo ɓɛ꞉ka nɔ madyo nɔ dyakaka ɨda mɛnga, nɔ, ɓɔ꞉ɓundo mʉkatɨ nɔ ɨgyagya ɨhɔ nɔ mʉtɨma wɔ nudisoniso. 47Ɓa꞉ɓibibiso Asɔɓɨɨ, nɔ ɓombi ɓaɓomu ɓa꞉ɓio nɔ ɨgyagya akʉʉ eɓo. Masi maɓomu, Makwɔɓɨɨ a꞉ɓɨmatɨa mboi yɔ ɓombi ngʉɓa ɓa꞉baya amati ɔ ndiba ngiyeɓo.
Currently Selected:
Mɨkyananakɨa 2: buuN
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
