Рут 4
4
ЯплӀэнэрэ шъхьэр
БоӀаз Рут къызэрищагъэр
1А охътэ дэдэм БоӀаз къэлэдэсхэм язэӀукӀэпӀэ къэлапчъэ Ӏухьагъэу, тӀысыгъэу щысызэ, хэщыжьакӀоу зыфиӀогъагъэр блэкӀэу ылъэгъугъ. БоӀаз ащ риӀуагъ: «Моу къыдахьи, мыкӀэ къэтӀыс, синыбджэгъу». Адрэр къыдахьи, къэтӀысыгъ.
2ЕтӀанэ БоӀаз къалэм инахьыжъ упчӀэжьэгъумэ нэбгырипшӀ къахищи, ариӀуагъ: «МыкӀэ шъукъэтӀыс». Адрэхэр къэтӀысыгъэх. 3БоӀаз хэщыжьакӀом риӀуагъ: «ТиӀахьыл благъэу Елимэлэх игубгъо Моаб хэгъэгум къикӀыжьыгъэ НэӀэмый ыщэ шӀоигъу. 4А къэбарыр озгъэшӀэнышъ, мы тилъэпкъ инахьыжъэу щысхэм апашъхьэ щыпщэфынэу къыуасӀо сшӀоигъуагъ. Пщэфыжьы пшӀоигъомэ, щэфыжь; ау пщэфыжьынэу уфэмыемэ, къысаӀу ар сшӀэным пае; сыда пӀомэ зыщэфыжьынэу фитыныгъэ апэу зиӀэр оры, уаужыкӀэ сэры». Адрэм джэуап къыритыжьыгъ: «Сэ сэщэфыжьы». 5Ау ащ БоӀаз къыпигъэхъуагъ: «НэӀэмый губгъор къызыщыпщэфкӀэ, лӀагъэм имылъку унагъом къыфэнэжьыным пае, Моаб къикӀыгъэ Рути шъузкӀэ пштэн фае». 6Арыти хэщыжьакӀом къыӀуагъ: «Мылъкоу къыскӀэныщтым семыгоожьыным пае, ар сщэфын слъэкӀыщтэп; о щэфы ар, сыда пӀомэ сэ слъэкӀыщтэп».
7Нахьыпэм Израиль хабзэ илъыгъ: зы Ӏоф горэ къагъэшъыпкъэжьыным пае, зыгорэ къащэфыжьы е къахъожьы зыхъукӀэ, зым ицуакъэ зыщихти, адрэм ритыщтыгъ, джар Ӏофыр зэраухыгъэмкӀэ Израиль шыхьат щыхъущтыгъ.
8Аущтэу хэщыжьакӀом «о щэфы» БоӀаз къыриӀуи, ицуакъэ къызщихи, ащ къыритыгъ.
9ЕтӀанэ БоӀаз нахьыжъхэми зэкӀэ Ӏутыгъэ цӀыфхэми ариӀуагъ: «Елимэлэхи, ащ ыкъохэу Къылиони, Махълони зэкӀэ яехэр НэӀэмый зэрэщысщэфыгъэхэм шъо непэ шъуришыхьат. 10Ащ нэмыкӀэу Махълон ишъузыгъэ моаб бзылъфыгъэу Рут сэштэ шъузкӀэ. Аущтэу зыхъукӀэ, лӀагъэм имылъку унагъом къыфэнэжьыщт, ащ илӀакъо игъашӀэ зэпычыгъэ фэмыхъоу лъэпкъым къыхэнэнэу. Шъо ащ непэ шъуришыхьат».
11Къэлапчъэм зэкӀэ Ӏут цӀыфхэми нахьыжъхэми къаӀуагъ: «Ары, тэ тышыхьат. Уишъузэу уиунэ къихьэрэр, израиль лъэпкъыр къызытекӀыгъэ Рахъэлрэ Леарэ афэдэу, сабыибэ къыпфэхъунэу Зиусхьаным ерэшӀ. Ефрат лӀакъом мылъку щыугъой, цӀэрыӀо ущэрэхъу Бэтлэхъэм. 12Тэмарэ Ехъуд къыфилъфыгъэ Пэрэцэу укъызтекӀыгъэм иунагъо фэдэу, уиунагъо орэхъу – Зиусхьаным мы бзылъфыгъэ ныбжьыкӀэм къыхэкӀэу бынэу къыуитыщтхэм яхьатыркӀэ».
Рут шъао къызэрэфэхъугъэр
13Джаущтэу Рут БоӀаз шъузы фэхъугъ. БоӀаз ащ гохьагъ, Зиусхьаным Рут ышъо сабый хэфэнэу ынэшӀу къыщифи, шъао къылъфыгъ. 14Бзылъфыгъэхэм НэӀэмый раӀуагъ: «Зиусхьаным щытхъур ий, хэщыжьакӀо пфэхъужьыщт пхъорэлъф къызэрэуитыгъэм пае. Ащ ыцӀэ Израиль щытхъухьэ щэрэхъу! 15Ащ кӀуачӀэ уигъэгъотыжьыщт, уижъышъхьэми уиӀыгъыжьыщт; сыда пӀомэ ар уинысэ къылъфыгъ – шӀу узылъэгъоу, къуиблымэ анахьи нахь уасэ зиӀэ нысэм».
16НэӀэмый а сабыир ыкуашъо тесыгъ, ренэу лъыплъагъ. 17Гъунэгъу бзылъфыгъэхэм: «НэӀэмый шъао къыфэхъугъ», – аӀуи, ащ цӀэ фаусыгъ: Ӏобэд. Даут ятэу Ищай ар нэужым ятэ хъугъэ.
Израиль ипачъыхьэу Даут къызтекӀыгъэхэр
18Джы мары Пэрэц Даут ыпэкӀэ къыхэкӀыгъэхэр: Пэрэц къыфэхъугъ Хъэцрон; 19Хъэцрон къыфэхъугъ Рам; Рам къыфэхъугъ Ӏаминадау; 20Ӏаминадау къыфэхъугъ Нахъшон; Нахъшон къыфэхъугъ Салмэн; 21Салмэн къыфэхъугъ БоӀаз; БоӀаз къыфэхъугъ Ӏобэд; 22Ӏобэд къыфэхъугъ Ищай; Ищай къыфэхъугъ Даут.
Currently Selected:
Рут 4: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023