Ехъошуа 7
7
Яблэнэрэ шъхьэр
Ӏахъан игунахьшӀагъ
1Ау израилхэм Зиусхьаным фэгъэшъошэгъэ пкъыгъохэм яхьылӀэгъэ унашъор агъэцэкӀагъэп: Ехъудэ лӀакъом щыщ Зэрахъ къыхэкӀыгъэ Забди ыкъо Къармый ыкъожьэу Ӏахъан ащ Ӏахьэ къыхихыгъ. Арыти, Зиусхьаным игубж израилхэм къафызэкӀэнагъ. 2Ехъошуа нэбгырэ заулэ Ерыхъэу ригъэкӀыхи, Бэтэл итыгъэкъокӀыпӀэ лъэныкъокӀэ щыт Бэтаон игъунэгъу Ӏай къалэм ыгъэкӀуагъэх:
– ШъукӀуи, чӀыгур къэшъуплъыхь, – ыӀуи, унашъо афишӀыгъ.
Адрэхэр кӀохи, Ӏай къаплъыхьагъ. 3ЕтӀанэ къызагъэзэжьым, Ехъошуа къыраӀуагъ:
– Зэрэлъэпкъэу ащ екӀуныр ищыкӀагъэп. Ащ цӀыф макӀэшъ дэсыр зэрэлъэпкъэу умыгъэгумэкӀэу, нэбгырэ минитӀу-щы горэ къалэм теонхэу бгъакӀохэмэ хъущт.
4Арыти, лъэпкъым щыщ нэбгырэ минищ фэдиз кӀуагъэ, ау Ӏай къалэм дэсхэр къапэуцухи, къыкӀарагъэӀэжьыгъ. 5А чӀыпӀэм израилхэм ащыщ нэбгырэ щэкӀырэ хырэ къыщаукӀи, къэлапчъэхэм къащегъэжьагъэу мыжъокъычӀэхыпӀэм нэс#7:5 Е: «Шыбарым нэс». къафыхэзэ, бгы чапэхэм ащаукӀыгъэх. Ар залъэгъум израилхэм агу ефэхи, лӀыгъэр чӀанагъ. 6Ехъошуарэ Израилым инахьыжъ упчӀэжьэгъухэмрэ ящыгъынхэр зэӀатхъыхи, ашъхьэхэм сапэр атыратакъуи, анэгухэр егъэзыхыгъэхэу пхъонтэ лъапӀэм ыпашъхьэ чӀыгум зыщырадзыхи, шъыгъохэу пчыхьэр къэсыфэ щылъыгъэх.
7Ехъошуа лъэӀукӀэ Тхьэм зыфигъэзагъ:
– О зэкӀэ зыӀэ илъ Зиусхьан! Сыда мы лъэпкъыр Иордан къызкӀызэпырыпщыгъэр? Амэрхэм аӀэ типлъхьанышъ, тябгъэгъэкӀодынэу ара? Иордан тыкъызэпырымыкӀэу, ащ ыкӀыб тыщыпсэунэу тыкъинэгъагъэмэ, сыд аӀожьыни! 8О Зиусхьан! Израилхэм акӀыб пыим зыфагъэзагъэм ыуж, сыд джы сӀожьыхэн? 9КъэнаӀанхэмрэ нэмыкӀ лъэпкъэу мы чӀыгум щыпсэухэрэмрэ хъугъэр зэхахмэ, тыкъаухъурэинышъ, таукӀын, тцӀи мы чӀыгум къыщырамыӀожьы ашӀын. ПцӀэ лъапӀэ илъэгагъэ къэуухъумэным фэшӀ сыда О етӀанэ пшӀэщтыр?
10Зиусхьаным Ехъошуа къыриӀуагъ:
– Къэтэдж! Сыд пае унэгу егъэзыхыгъэу чӀыгум утелъа? 11Израилхэм псэкӀод ашӀагъ. Ахэм Сэ адэсшӀыгъэ Зэзэгъыныгъэр къамыгъэгъунэу, аукъуагъ. Сэ къысфэгъэшъошэгъэ пкъыгъохэм ащыщхэр аштагъэх. Агъэбылъхи, ежьхэм яхьап-щыпхэм ахалъхьагъэх. 12Джары израилхэр япыйхэм апэуцужьынхэ зыкӀамылъэкӀыгъэр, акӀыб зыкӀыфагъэзагъэр, бгыбзэр къызкӀатефагъэр, лъэпсэкӀодыпӀэм зыкӀифагъэхэр. ЛъэпсэкӀодэу жъугъэкӀодын фаер зэкӀэ шъумыгъэкӀодмэ, Сэ ащ нахьыбэ сышъуигъусэжьыщтэп. 13Джы тэдж, кӀуи лъэпкъым зегъэгъэкъабз. ЯӀу ахэм: «Неущырэ мафэм ехъулӀэу гъэлъэпӀагъэ шъузэрэхъунэу зыжъугъэкъабз, Зиусхьанэу, Израилым и Тхьэ мырэущтэу еӀошъ: „Сэ къысфэгъэшъошагъэу, лъэпсэкӀодэу бгъэкӀодын фаер о, Израил, уицӀыфмэ аштагъ. Арышъ, ар омыгъэкӀодыфэ, уипыйхэм уапэуцужьын плъэкӀыщтэп“. 14ЛӀэкъо-лӀакъоу пчэдыжьым шъукъыӀухь. ЛӀакъоу Зиусхьаным къыгъэлъагъорэр, атэжъпӀашъэу къызытекӀыгъэм елъытыгъэу, зэрэпсаоу къыӀорэхь. Ахэм ащыщэу Зиусхьаным къыгъэлъагъорэм хэхьэрэ унагъохэр зэкӀэ къэрэкӀох. Унагъоу Зиусхьаным къыгъэлъагъохэрэм арысхэр зырызэу къыӀорэхьэх. 15ЛъэпсэкӀодэу агъэкӀодын фэе пкъыгъохэр зыӀыгъыр, Зиусхьаным изэзэгъыныгъэ ыукъуагъэшъ, Израилым емыкӀоу щызекӀуагъэшъ агъэстыщт: ежьыри, иунагъуи, имылъкуи!»
16Ехъошуа пчэдыжьым жьэу къэтэджи, израилхэр лӀэкъо-лӀакъоу къыӀухьанхэу унашъо афишӀыгъ. Арыти, Ехъудэ илӀакъу ары Зиусхьаным къыгъэлъэгъуагъэр. 17ЕтӀанэ Ехъошуа унашъо ышӀыгъ Ехъудэ лӀакъом щыщхэр къыӀухьанхэу. Зэрахъ къытекӀыгъэхэр къыгъэлъэгъуагъ. Ахэм ащыщ унагъохэр къызыӀохьэхэм, Забди иунагъо къыгъэлъэгъуагъ. 18ЕтӀанэ Ехъошуа унашъо ышӀыгъ ащ иунагъо щыщхэр зырызэу къыӀухьанхэу. Аужыпкъэм къыгъэлъэгъуагъэр Ехъудэ лӀакъом щыщ Зэрахъ къыхэкӀыгъэ Забди ыкъо Къармый ыкъожьэу Ӏахъан ары.
19– А сикӀал, – риӀуагъ Ехъошуа Ӏахъан, – Зиусхьаным, Израилым и Тхьэ щытхъу фэшӀи#7:19 Зигугъу къышӀырэр шъыпкъэр къызэриӀощтым итхьарыӀу., ыпашъхьэ зыкъыщыумысыжьи, зыпари умыушъэфэу, пшӀагъэр зэкӀэ къысфэӀуат.
20– Шъыпкъэ дэд, Зиусхьаным, Израилым и Тхьэ ыпашъхьэ сэ псэкӀод щысшӀагъ. – Ӏахъан джэуап къытыжьыгъ. – Мары сшӀагъэр: 21ЩынӀар#7:21 Мыр Бабилэн ары. къыращыгъэ щыгъын дахэ, тыжьын шэкъэл шъитӀу#7:21 КилограммитӀум къехъу. дышъэ гъэчъыгъэ шэкъэл шъэныкъо#7:21 Килограмм ныкъом къехъу. ыуасэу къонтхъым захэсэлъагъом, сенэцӀи сштагъэх. Ахэр чӀыгум хэзгъэбылъыхьагъэхэу, сищэтырэ чӀэгъ чӀэлъых; тыжьыныр ачӀэгъ дэдэ чӀэлъ.
22Арыти, Ехъошуа цӀыфхэр ыгъэкӀуагъэх. Ахэр зэчъэхэм а пкъыгъохэр зэкӀэ Ӏахъан ищэтырэ щычӀэгъэбылъыхьагъэхэу, тыжьыныри ачӀэгъ дэдэ чӀэлъэу къагъотыгъэх. 23Ахэмэ а пкъыгъохэр щэтырэм къычӀаххи, Ехъошуарэ зэкӀэ израилхэмрэ къафахьхи, Зиусхьаным ыпашъхьэ къыралъхьагъэх. 24Ехъошуа зэкӀэ израилхэр игъусэхэу, Зэрахъ къытекӀыгъэ Ӏахъан аубыти, тыжьынри щыгъынри, дышъэ чъыгъэ такъырхэри даӀыгъхэу, ыкъохэри ыпхъухэри игъусэхэу, ицухэри, ищыдыхэри, имэлхэри, ищэтыри, зэкӀэ хьап-щыпэу иӀэри Ӏэхъор кӀэим ащагъэх.
25– Мы тхьамыкӀагъом сыд пае о тыхэбдзагъ? – Ехъошуа риӀуагъ Ӏахъан. – Арышъ, джы Зиусхьаным ори непэ тхьамыкӀагъом ухидзэщт.
Джа чӀыпӀэм израилхэр зэкӀэ Ӏахъан мыжъокӀэ еохэзэ щаукӀыгъ. Иунагъо исхэр зэкӀэ джащ фэдэу мыжъокӀэ аукӀыхи, агъэстыжьыгъэх. 26ЕтӀанэ мыжъохэр атыратэкъожьыгъэх, а мыжъохэр непэ къызнэсыгъэми чӀыпӀэм зэрэщылъых.
Ащ ыуж Зиусхьаным игубжэу къызэкӀэнагъэр кӀосэжьыгъэ. Джары непэ нэс а чӀыпӀэм Ӏэхъор#7:26 Ижъырэ джуртыбзэкӀэ: «тхьамыкӀагъу». икӀэйкӀэ зыкӀеджэхэрэр.
Currently Selected:
Ехъошуа 7: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
