Ехъошуа 4
4
ЯплӀэнэрэ шъхьэр
1Лъэпкъыр зэрэпсэоу Иордан псыхъом зызэпырэкӀым Зиусхьаным Ехъошуа къыриӀуагъ:
2– ЗэкӀэ израил лӀакъохэм нэбгырэ пшӀыкӀутӀу къыхашъухи, лӀакъо пэпчъ инэбгырэ зырыз, 3ахэм унашъо афэшъушӀи, яшъуӀу: «Иордан псыхъом ыгузэгу, къурмэнышӀхэр зыдэщытыгъэхэм дэжь мыжъо зырыз къыщышъушти, чэщыр зыщишъухынэу пчыхьашъхьэ шъукъызщыуцущт чӀыпӀэм шъухьыхи, жъугъэтӀылъых».
4Арыти, Ехъошуа израил лӀакъохэм къахихыгъэ нэбгырэ пшӀыкӀутӀум къяджи, 5ариӀуагъ:
– Иордан псыхъом ыгузэгу, Зиусхьанэу шъуи Тхьэ ипхъонтэ лъапӀэ зыдэщытым дэжь шъукӀу. Израил лӀакъохэм япчъагъэ фэдиз зэрэхъунэу, ащ дэжьым мыжъо зырыз хэти къыщыхерэхи, ытамэ къытырерэлъхь. 6Ахэр шъоркӀэ шӀэжь тамыгъэу орэхъух. ЫужкӀэ шъо шъуикӀалэхэр: «Мы мыжъохэм сыд ямэхьанэр?» аӀоу къызышӀоупчӀыхэкӀэ, – 7Зиусхьаным ипхъонтэ лъапӀэ Иордан псыхъом къызэпырахы зэхъум, псыр ащ ыпашъхьэ зэрэщигъукӀыгъагъэри, а мыжъохэр израил лъэпкъхэм егъэшӀэрэ гукъэгъэкӀыжь сынэу зэряӀэщтхэри ахэм яшъуӀожь.
8Израилхэм а унашъор агъэцэкӀагъ. Зиусхьаным Ехъошуа къызэрэриӀуагъэу, Иордан псыхъом ыгузэгу мыжъо пшӀыкӀутӀу, израил лӀакъохэм япчъагъэ фэдизэу, къыщыхахыгъэх. Ахэр уцупӀэм къахьыхи, щагъэтӀылъыгъэх. 9Зиусхьаным ипхъонтэ лъапӀэ зыхьыщтыгъэ къурмэнышӀхэр зыдэщытыгъэхэ Иордан псыхъом ыгузэгу нэмыкӀ мыжъо пшӀыкӀутӀу Ехъошуа щигъэтӀылъыгъэх. А мыжъохэр непэ къызнэсыгъэми ащ щылъых.
10Зиусхьаным Ехъошуа унашъоу къыфишӀыгъэр зэкӀэ израилхэм агъэцэкӀэфэ къурмэнышӀхэр Иордан псыхъом ыгузэгу итыгъэх, Мосэ Ехъошуа къызэрэриӀогъагъэм фэдэу. Ардэдэм лъэпкъыр гуӀэзэ зэпырыкӀыщтыгъэ, 11зэкӀэ зэрэзэпырыкӀэу, Зиусхьаным ипхъонтэ лъапӀэ зыхьыщтыгъэ къурмэнышӀхэри лъэпкъым инэрылъэгъоу нэпкъым къытехьажьыгъэх. 12Мосэ унашъо къызэрафишӀыгъагъэм фэдэу, Рубэнрэ Гъадрэ ялӀакъохэр, Мынасэ лӀакъом ызыныкъо уӀэшыгъэхэу израилхэм апэ итхэу ащ зэпырыкӀыгъэх. 13Джаущтэу нэбгырэ мин тӀокӀитӀу фэдиз зэоным фэхьазырхэу, Зиусхьаным ыпашъхьэ псыхъом щызэпырыкӀыхи, Ерыхъэу кӀэим ихьагъэх.
14А мафэм Зиусхьаным зэкӀэ израилхэм янэрылъэгъоу Ехъошуа ыгъэиныгъ, Мосэ шъхьэкӀафэ зэрэфашӀыщтыгъэм фэдэу, Ехъошуа игъэшӀэ мафэхэр еухыфэ агъэлъэпӀагъ.
15Зиусхьаныр къэгущыӀи, Ехъошуа къыриӀуагъ:
16– Иордан псыхъом къыхэкӀыжьынхэу пхъонтэ лъапӀэр зыхьырэ къурмэнышӀхэм унашъо афэшӀ.
17Арыти, Ехъошуа аущтэу ышӀыгъ.
18Пхъонтэ лъапӀэр зыхьырэ къурмэнышӀхэр Иордан псыхъом къыхэкӀыжьхи, алъакъохэр чӀыгум зэрэнэсыгъэхэм тетэу, псыр къечъэжьэжьи, тыгъуаси тыгъоснахьыпи афэдэу нэпкъым къытелъэдэжьыгъ.
19Джаущтэу апэрэ мазэм ияпшӀэнэрэ мафэ лъэпкъыр Иордан къызэпырыкӀи, Ерыхъэу итыгъэкъокӀыпӀэ лъэныкъо щыӀэ Гъылгъал уцупӀэ щигъэпсыгъ. 20Мыжъо пшӀыкӀутӀоу Иордан псыхъом къыхахыгъэхэри джа чӀыпӀэм Ехъошуа сынэу щигъэуцухи, 21израилхэм ариӀуагъ:
– ЫужкӀэ, къышъухэкӀыгъэхэр: «Мы мыжъохэм сыд ямэхьанэр?», аӀоу къышъоупчӀыхэмэ, 22израилхэр чӀы гъушъэм тетхэу Иордан къызэрикӀыгъэхэр яшъуӀу. 23Зиусхьанэу шъуи Тхьэ шъуикӀын шъулъэкӀынэу хы Къамылыр шъуапашъхьэ зэрэщигъэгъушъыгъагъэм фэдэу тикӀын тлъэкӀынэу Иордан псыхъори тапашъхьэ щыригъэгъушъыкӀыгъэба. 24Лъэпкъэу дунаим тетхэм Зиусхьаным ыкӀуачӀэ зэрэиныр ашӀэным, шъори, шъуигъэшӀэ мафэхэр шъоухыфэ, Зиусхьанэу шъуи Тхьэ щынагъо фышъуиӀэным пае Ащ аущтэу зыкӀишӀыгъэр.
Currently Selected:
Ехъошуа 4: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
