Ехъошуа 3
3
Ящэнэрэ шъхьэр
Иордан псыхъом зэрикӀыгъэхэр
1Пчэдыжьым жьэу Ехъошуа зэкӀэ израилхэр игъусэхэу Шытым икӀхи, Иордан псыхъом нэсыгъэх. Псыхъом зэпырыкӀынхэм ыпэкӀэ, а чӀыпӀэм уцупӀэ щагъэпсыгъ. 2Мэфищ зытешӀэм ыуж Ӏэшъхьэтетхэм уцупӀэр къакӀухьи, 3цӀыфхэм унашъо афашӀыгъ:
– Зиусхьанэу шъуи Тхьэ дашӀыгъэ зэзэгъыныгъэр зытет мыжъобгъуитӀур зыдэлъ пхъонтэ лъапӀэр#3:3 Тхьэм Мосэ унашъоу къыфишӀыгъэм тетэу пхъонтэ лъапӀэр пхъэм хишӀыкӀыгъагъ. Пкъыгъо лъапӀэхэмрэ Тхьэм иунэшъуипшӀ зытетхэгъэ мыжъобгъуитӀумрэ ащ дэлъыгъэх. Еплъ: тхылъэу «МысырикӀыжь» 25:10-22. лэуй-къурмэнышӀхэм рахьыжьагъэу зышъулъэгъукӀэ, шъори зышъуӀэти, пхъонтэ лъапӀэм ыуж шъуихь. 4А лъэныкъом зыпарэкӀи шъукӀуагъэпышъ, шъуздэкӀощтыр джаущтэу шъушӀэщт. Ау благъэу шъукӀэрымыхь, арырэ шъорырэ шъуазыфагу Ӏэнтэгъу минитӀу фэдиз#3:4 Метрэ мин фэдиз гор. илъын фае.
5Ащ ыуж Ехъошуа лъэпкъым риӀуагъ:
– Неущ Зиусхьаным шъуинэрылъэгъоу шӀэгъошӀагъэхэр зэрихьащтхэшъ, гъэлъэпӀагъэ шъузэрэхъунэу зыжъугъэкъабз.
6ЕтӀани къурмэнышӀхэм мырэущтэу ариӀуагъ:
– Пхъонтэ лъапӀэр шъушти, лъэпкъым ыпэ шъуитэу, гъогум шъутехь.
Арыти, къурмэнышӀхэм а унашъор агъэцэкӀагъ.
7Джащыгъум Зиусхьаным Ехъошуа къыриӀуагъ:
– Мосэ сызэригъусагъэм фэдэу ори сызэрэуигъусэщтыр ашӀэным пае, непэ щегъэжьагъэу израилхэм зэкӀэми янэрылъэгъоу Сэ узгъэиныщт. 8Пхъонтэ лъапӀэр зыхьырэ къурмэнышӀхэм о унашъо афэшӀи, яӀу:
«Иордан псыхъом шъунэсэу, ащ шъузэрэхахьэу, шъукъэуцу».
9Ащ ыуж Ехъошуа израилхэм ариӀуагъ:
– Моу шъукъэкӀуати, Зиусхьанэу шъуи Тхьэ игущыӀэхэм шъукъядэӀу. 10Тхьэр псэоу къызэрэшъухэтри, шӀокӀыпӀэнчъэу къэнаӀанхэр, хьатхэр, хъэухэр, пэрыцхэр, гъыргъащхэр, амэрхэр, еусхэр зэрэзэбгырифыщтхэри мары шъо къызэрэшъушӀэщтыр. 11Мары зэкӀэ чӀыгум Тетыгъо щызыӀыгъ Зиусхьаным изэзэгъыныгъэ ипхъонтэ лъапӀэ шъуапэ итэу Иордан псыхъом хэхьащт. 12Арышъ, зэкӀэ израил лӀакъохэм нэбгырэ пшӀыкӀутӀу къахэшъух, лӀакъо пэпчъ инэбгырэ зырыз. 13ЗэкӀэ чӀыгум Тетыгъо щызыӀыгъым, Зиусхьаным ипхъонтэ лъапӀэ зыхьырэ къурмэнышӀхэм алъапэхэр Иордан псыхъом зэрэнэсхэу, ащ ипсыхэр къызэтеуцонхэшъ, ышъхьэкӀэ къехырэ псыр дэпкъым фэдэу къэуцущт.
14Арыти, израилхэм уцупӀэр Ӏуахыжьи, пхъонтэ лъапӀэр зыхьырэ къурмэнышӀхэм ауж итхэу, Иордан псыхъомкӀэ ежьагъэх. 15Хыныгъо охътагъэти, Иордан псыхъор къиугъэу, нэпкъыхэм къатеуагъэу щытыгъ. Ау, пхъонтэ лъапӀэр зыхьыхэрэр Иордан псыхъом Ӏухьэхи, алъакъохэр псым зэрэнэсыгъэхэм тетэу, 16ышъхьэкӀэ къехырэ псыр къызэтеуцуагъ. Чыжьэу, Цэртан пэгъунэгъоу щыт Адам къалэ дэжь псыр дэпкъым фэдэу къыщызэтеуцуагъ. АдыкӀэ ечъэхырэ псэу, хы Щыугъэм#3:16 Мыр хы ЛӀагъэр ары. (хы Ӏараба) хэлъадэрэр зэрэщытэу игъукӀыгъ. Джаущтэу израилхэр Ерыхъэу къалэм пэчӀынатӀэу Иордан псыхъом икӀыгъэх.
17Зиусхьаным ипхъонтэ лъапӀэ зыхьырэ къурмэнышӀхэм израил лъэпкъыр аблэкӀызэ, чӀыгу гъушъэм тетэу зэпырэкӀыфэ, Иордан псыхъоу игъукӀыгъэм ыгузэгу ахэр итэу щытыгъэх.
Currently Selected:
Ехъошуа 3: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
