Ехъошуа 22
22
ЯтӀокӀэнэрэ тӀурэ шъхьэр
ТыгъэкъокӀыпӀэ лӀакъохэр ячӀыгу зэрэкӀожьыгъэхэр
1Ащ ыуж Ехъошуа Рубэнрэ Гъадрэ ялӀакъохэм, Мынасэ лӀакъом ызыныкъу аӀоу къяджи, 2ариӀуагъ:
– Зиусхьаным иӀумэтэу Мосэ шъо унашъоу къышъуфишӀыгъэр зэкӀэ жъугъэцэкӀагъэ, сэ къышъосӀуагъэхэми, унашъо къышъуфэсшӀыхэрэми шъуатекӀыгъэп. 3Охътабэм къыкӀоцӀ, непэрэ мафэр къэсыфэ, шъушыхэр къэшъубгынагъэхэп, шъуи Зиусхьанэу шъуи Тхьэ шъупшъэ къырилъхьагъэр жъугъэцэкӀагъэ. 4Зиусхьанэу шъуи Тхьэ, гущыӀэ пытэ къызэришӀыгъагъэм фэдэу, джы шъушыхэр ыгъэгупсэфыгъэх. Арышъ, Зиусхьаным иӀумэтэу Мосэ Иордан псыхъом ыкӀыб къыщышъуитыгъэ чӀыгум жъугъэзэжьи, шъуиунэхэм шъуякӀужь. 5Ау Зиусхьаным иӀумэтэу Мосэ къышъуитыгъэ унашъохэмрэ Хабзэмрэ дэх имыӀэу жъугъэцакӀэх: Зиусхьанэу шъуи Тхьэ шӀу шъулъэгъу, Ащ игъогухэм шъуарыкӀу, иунашъохэр шъуухъумэх, шъуфэшъыпкъ, шъугурэ шъупсэрэкӀэ шъуфэщагъэу шъуфэлажь.
6ШӀукӀэ афэлъаӀуи, Ехъошуа ахэр зетӀупщыжьыхэм, ядэжь агъэзэжьыгъ. 7Мынасэ лӀакъом ызыныкъом Бащан чӀыналъэм Мосэ чӀыгу щыритыгъагъ, лӀакъом ызыныкъоу къэнагъэмрэ адрэ израилхэмрэ Иордан псыхъом итыгъэкъохьэпӀэ лъэныкъо чӀыгу щаритыгъагъ. Арыти, ядэжь агъэзэжьынэу ахэр ытӀупщыжьыхэзэ, Ехъошуа шӀукӀэ афэлъаӀуи, 8моущтэу ариӀуагъ:
– Шъо шъуищэтырэхэм шъуякӀужьы, мылъкушхо шъуӀэкӀэлъ – былымхэр бэу, тыжьынрэ дышъэрэ, гъуаплъэрэ гъучӀырэ, щыгъын бэ дэдэ, – арышъ, пыим къонтхъэу къыпышъухыгъэмкӀэ шъукъошхэм шъуадэгуащ.
9Рубэн, Гъад лӀакъохэм, Мынасэ лӀакъом ызыныкъом израилхэр КъэнаӀан чӀыгум ит Щылэу къалэ къагъанэхи, ежьхэм заӀэти, Зиусхьаным Мосэ ижэдэкӀэу унашъо къазэрэфишӀыгъэу аубытыгъэ ГъылыӀад чӀыналъэм екӀужьыгъэх.
«Шыхьат» къурмэншӀыпӀэр
10КъэнаӀан чӀыгум ит Иордан псыхъом дэжь щыт Гъэлылот къызэсыхэм, Рубэн, Гъад лӀакъохэм, Мынасэ лӀакъом ызыныкъом джа чӀыпӀэм, Иордан псыхъо нэпкъым, къурмэншӀыпӀэшхо щагъэуцугъ. 11Мары Рубэн, Гъад лӀакъохэм, Мынасэ лӀакъом ызыныкъом Иордан псыхъом инэпкъэу израилхэм къафэгъэзагъэм, КъэнаӀан чӀыгум игъунапкъэ къурмэншӀыпӀэ щагъэуцугъ зэраӀорэр зэхахыгъэти, 12ахэм заокӀэ якӀунхэу зэкӀэ израил лъэпкъыр зэрэпсэоу Щылэу къалэ къыщызэрэугъоигъ.
13Ау ащ ыпэкӀэ израилхэм къурмэнышӀэу ЕлыӀазар ыкъо Пинхъас аӀопщи, ГъылыӀад чӀыналъэм щыӀэ Рубэн, Гъад лӀакъохэм, Мынасэ лӀакъом ызыныкъом афагъэкӀуагъ. 14ПэщипшӀ ащ игъусагъ: израил лӀакъо пэпчъ изынэбгырэ, ахэр зэкӀэ израил лъэпкъхэм ахэхьэрэ унагъохэм янахьыжъ упчӀэжьэгъугъэх.
15Ахэр ГъылыӀад къызэсыхэм, Рубэн, Гъад лӀакъохэм, Мынасэ лӀакъом ызыныкъом зафагъази, араӀуагъ:
16– Зиусхьаным илъэпкъ зэрэпсэоу мырэущтэу къышъуеӀо: «Сыд пае Израилым и Тхьэ шъуфэмышъыпкъагъа? Зиусхьаныр ӀэкӀыб шъушӀызэ, Ащ шъупэуцужьызэ къурмэншӀыпӀэ непэ зыфэжъугъэуцужьынэу сыдэущтэу ар шъо шъуфэшӀагъа? 17Арэп, ПэӀор#22:17 Еплъ: тхылъэу «ШъофнэкӀым къыщекӀокӀыгъэхэр» 25:1-9. дэжь щызетхьэгъэ хэбзэнчъагъэр шъушӀомакӀа? Зиусхьаным ицӀыф лъэпкъ ащ пае емынэм зэтыригъэлӀагъ! Непэ къызынэсыгъэми зытыукъэбзыжьышъурэп. 18Джы непэ шъо Зиусхьаным шъукӀэрыкӀынэу зышъогъэхьазыра? Непэ шъо Зиусхьаным шъупэуцумэ, неущ израил лъэпкъым зэрэпсэоу Ащ ынае къыщифэщт. 19ШъуичӀыгу мыкъабзэу къышъушӀошӀымэ, Зиусхьаным ичӀыгоу, чэтэнгъэӀэгъэ лъапӀэр зэрытым шъукъакӀуи, Ӏахьэ къыддэжъугощ. Ау Зиусхьаным шъупэмыуцу, тэри бырсыр къытэшъумышӀылӀ, Ащ икъурмэншӀыпӀэ нэмыкӀ зыфэшъумыгъэуцужь! 20Зэрахъ ыкъо Ӏахъан закъоба Зиусхьаным фэгъэшъошагъэхэм афэгъэхьыгъэ унашъор зымыгъэцэкӀагъэр, ау Ащ игубж зэкӀэ израил лъэпкъым зэрэпсэоу къытефагъэба? А псэкӀодым Ӏахъан закъоп ныӀа текӀодагъэр?»
21Арыти, Рубэн, Гъад лӀакъохэм, Мынасэ лӀакъом ызыныкъом израил лъэпкъхэм янахьыжъ упчӀэжьэгъугъэм мырэущтэу къараӀожьыгъ:
22– Зиусхьаныр – тхьэхэм я Тхьэжь! Зиусхьаныр – тхьэхэм я Тхьэжь! Ащ ешӀэ, израил лъэпкъми ерэшӀ: Зиусхьаным тыпэуцоу, Ащ тыфэмышъыпкъэмэ, непэ шъукъытшъхьамыс. 23Зиусхьаныр ӀэкӀыб тшӀыным пае къурмэншӀыпӀэ тэ зыфэдгъэуцужьыгъэмэ, ащ къурмэнгъэстрэ гъомылэ къурмэнрэ е мамыр къурмэн щытшӀынхэу арымэ, Ежь Зиусхьаным терэгъэпщын. 24Хьау! Шъо къышъухэкӀыгъэхэм зэгорэм тэ ткъохэм мырэущтэу къараӀонэу тыщынагъэти ары тэ ар зыкӀэтшӀагъэр: «Сыд шъо Зиусхьанэу Израилым и Тхьэ шъузэрэхэтыр? 25Иордан псыхъор тэрырэ шъорырэ Зиусхьаным гъунапкъэ тфишӀыгъ. Арышъ, Зиусхьаным шъо шъуриеп, Ар тэтый». Джащ фэдэ шӀыкӀэкӀэ, шъо къышъухэкӀыгъэхэм яягъэкӀэ, тэ ткъохэр Зиусхьаным шӀолӀыкӀыжьыщтхэп.
26Джары къурмэншӀыпӀэ дгъэуцунэу тэ зыкӀитхъухьагъэр нахь, къурмэнгъэстрэ къурмэнхэмрэ щытшӀынхэу арэп. 27Ары пакӀопышъ, къурмэнгъэстрэ гъомылэ къурмэнрэкӀэ, мамыр къурмэнрэкӀэ зэфэдэу Зиусхьаным ыпашъхьэ титэу#22:27 Зигугъу къыщишӀырэр Шылэу щыӀэ чэтэнгъэӀэгъэ лъапӀэр арын фай. Еплъ: 18:1. тэри, шъори, тилӀэужхэми тызэрэфэлэжьэщтым ар ишыхьатынэу ары. Джащыгъум, Зиусхьаным тэ тиӀахьэ хэмылъэу шъо къышъухэкӀыгъэхэм тэ ткъохэм ыужыкӀэ къараӀон алъэкӀыщтэп.
28Зэгорэм ащ фэдэу тэрми е ткъохэр арми къытаӀомэ, мырэущтэу джэуап яттыжьыщт: «Зиусхьаным икъурмэншӀыпӀэ итеплъэ иӀэу тятэжъхэм Ащ икъурмэншӀыпӀэу агъэуцугъэм шъуеплъ. Ау ащ къурмэнгъэстрэ нэмыкӀ къурмэнхэмрэ щашӀынхэу арэп, тэрырэ шъорырэ шыхьатэу тиӀэнэу ары нахь», – тӀуагъэ.
29Зиусхьанэу ти Тхьэ непэ тыпэуцуни, ар ӀэкӀыб тшӀынышъ, Ащ икъурмэншӀыпӀэ нэмыкӀ дгъэуцуни къурмэнгъэстрэ гъомылэ къурмэнрэ, е нэмыкӀ къурмэн щытшӀынэу ащ фэдэ егъашӀэми орэмыхъу. Зиусхьанэу ти Тхьэ икъурмэншӀыпӀэ шъыпкъэр Ащ ичэтэнгъэӀэгъэ лъапӀэ ыпашъхьэ ит закъор ары!
30Арыти, къурмэнышӀэу Пинхъасрэ израил лъэпкъхэм янахьыжъ упчӀэжьэгъухэмрэ Рубэн, Гъад лӀакъохэм, Мынасэ лӀакъом ызыныкъом аӀуагъэр зызэхахым адырагъэштагъ. 31КъурмэнышӀэу ЕлыӀазар ыкъо Пинхъас ахэм ариӀуагъ:
– Зиусхьаныр зэрэтигъусэр, Ащ шъузэрэфэшъыпкъэр непэ къыдгурыӀуагъ. Зиусхьаным ипщыныжь израилхэр непэ щышъуухъумагъэх.
32Рубэн, Гъад лӀакъохэр зыщыпсэухэрэ ГъылыӀад хэкур къурмэнышӀэу ЕлыӀазар ыкъо Пинхъасрэ израил лӀакъохэм япащэхэмрэ къабгыни, КъэнаӀаным къэкӀожьыхи, къэбарыр израилхэм къафаӀотэжьыгъ. 33Израилхэм а къэбарыр зызэхахым гушӀуагъэх, Зиусхьаным щытхъу фашӀыгъ. Рубэн, Гъад лӀакъохэм заокӀэ якӀунхэм, ахэр зыщыпсэурэ чӀыгур хэкужъ ашӀыным игугъу ащ нахьэу ашӀыжьыгъэп.
34Рубэн, Гъад лӀакъохэм «Шъори тэри Зиусхьаныр зэрэти Тхьэм мыр ишыхьат», аӀуи, а къурмэншӀыпӀэм «Шыхьат»#22:34 Мы гущыӀэр ижъырэ Ӏэпэрытхыхэм ащыщхэм ахэтми, ижъырэ джуртыбзэкӀэ тхыгъэ Ӏэпэрытхым ар хэтэп. цӀэу фашӀыгъ.
Currently Selected:
Ехъошуа 22: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
