Гъуазэхэр 3
3
Ящэнэрэ шъхьэр
Тхьэм израилхэр ыушэтынхэу къахинэгъэ лъэпкъхэр
1-2КъэнаӀаным щыкӀогъэ заохэм ащыщи зымылъэгъугъэ израилхэр риушэтынхэу, лӀэужыкӀэхэу ыпэкӀэ заор зыфэдэр зымышӀэщтыгъэхэр зэо Ӏофым фигъэсэнхэу, мары лъэпкъхэу Зиусхьаным а чӀыналъэм къыринагъэхэр: 3фылистхэм япщитф, зэкӀэ къэнаӀанхэр, цыдонхэр, хъэухэу Ливан къушъхьэхэм БэӀал-Хъэрмон щегъэжьагъэу Хъамат къалэм идэхьагъу нэс ащыпсэущтыгъэхэр. 4Зиусхьаным иунашъохэу Мосэ ятэжъхэм къафаригъэхьыгъэхэр израилхэм зэрагъэцэкӀэщтхэр ыушэтынэу а лъэпкъхэр Ащ къыгъэнагъэх.
5КъэнаӀанхэм, хьатхэм, амэрхэм, пэрыцхэм, хъэухэм, еусхэм ахэсхэу израилхэр адэпсэущтыгъэх. 6А лъэпкъхэм апхъухэр нысэу къарагъащэщтыгъэх, ежьхэми апхъухэр ахэм акъохэм аратызэ#3:6 НэмыкӀ лъэпкъхэм къахэкӀыгъэхэр къащэнхэу е адэкӀонхэу израилхэм я Тхьэ фит ышӀыщтыгъэхэп. Еплъ: тхылъэу «Хэбзэ тхыжьыгъэр» 7:3-4., ятхьэхэм афэлажьэщтыгъэх.
Ӏэтныел
7Зиусхьаным къемыкӀущтхэр израилхэм ашӀагъ: Зиусхьанэу я Тхьэ зыщагъэгъупшэжьи, БэӀалрэ Ашэрэрэ#3:7 Адрэ тхьэхэр зэкӀэ ащ къытекӀыгъэхэу, ахэм анахь лъагэу, Астартэ фэдэу гъэбэжъум итхьэу алъытэщтыгъэ. Пкъэоу фагъэуцурэмкӀэ нэрылъэгъу къызыфашӀыщтыгъэ. афэлажьэхэу рагъэжьагъ. 8Джащыгъум Зиусхьаным игубж израилхэм къафызэкӀани, Мэсэпэтам ипачъыхьэу Кушан-Ришатаим ыӀэ рилъхьэхи, илъэсиим къыкӀоцӀ ригъэгъэпщылӀыгъэх. 9Ау израилхэм Зиусхьаным гукӀэгъу къафишӀынэу лъэӀушхокӀэ зызыфагъазэм, Къалэб ышнахьыкӀэу Къэназ ыкъо Ӏэтныел къэгъэнэжьакӀоу апашъхьэ къыригъэуцуагъ. Ащ ахэр шъхьафит ышӀыжьыгъэх. 10Зиусхьаным ы Псэ ащ къыхахьи, Израилым гъуазэ фэхъугъ. Зэонэу зежьэм Зиусхьаным Ӏэтныел Мэсэпэтам ипачъыхьэу Кушан-Ришатаим ыӀэ рилъхьэхи, ащ тыригъэкӀуагъ. 11КъыкӀэлъыкӀорэ илъэс тӀокӀитӀум, Къэназ ыкъо Ӏэтныел олӀэжьыфэ, чӀыналъэм щымамырыгъ.
Эхуд
12Израилхэм джыри Зиусхьаным къемыкӀущтхэр ашӀэхэу рагъэжьэжьыгъ. Арыти, Зиусхьаным Моаб пачъыхьэу Ӏэгълон Израилым нахьи нахь лъэш ышӀыгъ. 13Ӏамонхэмрэ Ӏамэлыкъхэмрэ игъусэхэу ар Израилым къытекӀуи, Ерыхъэу къалэр ыубытыгъ.
14Израилхэр Моаб пачъыхьэу Ӏэгълон илъэс пшӀыкӀуим къыкӀоцӀ фэпщылӀыгъэх.
15Ау израилхэм Зиусхьаным гукӀэгъу къафишӀынэу зызыфагъазэм, Эхуд Ӏэ сэмэгур#3:15 ЦӀыф Ӏэ сэмэгур джуртэм Ӏашэм фэкъулаеу, щэрыоу алъытэщтыгъэ. къэгъэнэжьакӀоу апашъхьэ къыригъэуцуагъ. Ар Бинямин лӀакъом щыщ Гъэрэ ыкъуагъ. Тын Ӏахьэхэр фырэгъахьыхи моаб пачъыхьэу Ӏэгълон ар фагъэкӀуагъ. 16Эхуд чэтэ бгъуитӀуцэ зы Ӏэнтэгъу#3:16 Метрэныкъо фэдиз горэ мэхъу. икӀыхьагъэу ышӀи, ищыгъын чӀэгъ, ыко джабгъу дэжь, щызыхигъэбылъыхьагъ. 17Моаб пачъыхьэу Ӏэгълон дэжь тын Ӏахьэхэр нигъэсыгъэх. Пачъыхьэу Ӏэгълон пщэрышхоу, пщэр пцӀапцӀэу щытыгъ. 18Тынхэр Эхудэ ащ зыретхэм ыуж, игъусэу ахэр къэзыхьыгъэ цӀыфхэр ыгъэкӀотэжьхи, 19ежь Гъылгъал пэмычыжьэу щыт мыжъо тхьэнэпцӀыхэм адэжь къыщигъэзэжьи, къэкӀожьи, Ӏэгълон риӀуагъ:
– О зиусхьан, шъэф горэ къыпфысиӀ!
– Кыш! – пачъыхьэм ыӀуагъэти, унэӀутхэр зэкӀэ икӀыгъэх.
20Унашъхьэм тет пэщым#3:20 А лъэхъаным унашъхьэр тешъо ашӀыщтыгъэ, ащ тырашӀыхьэрэ унэр жьаупӀэ фэдэу агъэфедэщтыгъэ. зизакъоу къинэгъэ пачъыхьэм Эхудэ кӀэрыхьи, риӀуагъ:
– Тхьэм къыбгъодэкӀырэ къэбар сэ къыпфэсхьыгъэр.
Пачъыхьэр къызэтэджым, 21ко джабгъум кӀэрылъ чатэр Эхудэ Ӏэ сэмэгумкӀэ къызхипхъоти, ащ ыныбэ хиӀугъ, 22чатэр хэгъэкӀи чэтэкӀыри ныбашэм хигъэзыхьагъ, ыныби къыригъэугъ. Чатэр къыхимыхыжьэу, пэщыр къыбгыни, 23Эхудэ хьэятэм къынэсыжьи, унапчъэр фишӀыжьи, ӀункӀыбзэр ригъэтыжьыгъ.
24Ар зекӀыжьым ыуж, мары, пчъэр зэрэгъэпытагъэр унэӀутхэм алъэгъугъ.
– Илъэгъун пэщ кӀоцӀым щегъэцакӀэкӀэ енэгуягъо, – зэраӀожьыгъ.
25Джэнджэш агу къехьэфэ, бэрэ ежагъэх, ау пчъэр зыми къызэрэӀуимыхырэр залъэгъум, ӀункӀыбзэӀухыр къашти, къызыӀуахым алъэгъугъ: мары, язиусхьан ихьадэ джэхашъом телъ.
26Ахэм зыралъэшъухьэфэ, Эхудэ кӀитхъужьыгъ. Мыжъо тхьэнэпцӀыхэм аблэкӀи, СэӀирэ къалэ ышъхьэ рихьылӀэжьи, ыпсэ къыгъэнэжьыгъ. 27Ащ зынэсым, Ефраим къушъхьалъэм бжъэмыешхом щепщи, ежь апэ итэу, израилхэр къушъхьэм къехыгъэх.
28– Сауж шъукъихь, шъуипый моабхэр Зиусхьаным шъуӀэ къырилъхьагъэхэшъ, – ыӀуи ариӀуагъ.
Арыти, ыуж ихьэхи, Моабым кӀорэ зэпырыкӀыпӀэхэу Иордан псыхъом иӀэхэр аубытхи, зыпари зэпырыкӀын ымылъэкӀынэу зэпагъэӀыкӀыгъэх. 29Израилхэр ащ дэжьым моабым щытекӀохи, язэолӀ минипшӀ фэдиз горэ щаукӀыгъ: ахэр зэкӀэ зэолӀ пхъэшагъэх, кӀочӀэшхуагъэх. Зы нэбгыри аӀэкӀэкӀыжьыгъэп. 30Джа мафэм Израилыр моабхэм ашъхьагъ иуцуагъ. Джащ щегъэжьагъэу илъэс тӀокӀиплӀым чӀыналъэм щымамырыгъ.
Шамгъэр
31Эхуд ыуж къикӀыгъэр Ӏэнат ыкъо Шамгъэрэу Ӏэхъо бэщкӀэ фылист нэбгырэ шъихыр зэтезыукӀагъэр ары. Ащи израилхэр шъхьафит ышӀыжьыгъэх.
Currently Selected:
Гъуазэхэр 3: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
