Гъуазэхэр 4
4
ЯплӀэнэрэ шъхьэр
Дэборэ
1Эхудэ идунай зехъожьым ыуж, израилхэм Зиусхьаным къемыкӀущтхэр ашӀэу рагъэжьэжьыгъ. 2Арыти, ахэр Зиусхьаным Хъацэр къалэ тетыгъор щызыӀыгъыгъэ къэнаӀан пачъыхьэу Ябын ыӀэ рилъхьагъэх. Хъарэшэт-Гъоим#4:2 Ижъырэ джуртыбзэкӀэ: «Хымэ лъэпкъхэм я Хъарэшэт». щыпсэурэ Сисэрэ пачъыхьэм идзэпащэу щытыгъ. 3ГъучӀым хэшӀыкӀыгъэ купсынкӀэ шъибгъукӀэ ащ идзэ зэтегъэпсыхьэгъагъэти, илъэс тӀокӀырэ ашъхьэ къаримыгъэӀэтэу израилхэр ыгъэпщылӀыгъэх. Джары гукӀэгъу къафишӀынэу лъэӀушхокӀэ Зиусхьаным ахэм зызкӀыфагъэзагъэр.
4А лъэхъаным Израилым гъуазэу иӀагъэр Лапидэт ишъхьэгъусэ бзылъфыгъэ – пегъымбарэу Дэборэ арыгъэ. 5Дэборэ ыцӀэкӀэ зэджэгъэхэ пальмэу Ефраим къушъхьалъэм ит къалэхэу Рамэрэ Бэтэлрэ азыфагу къыщыкӀыщтыгъэм ычӀэгъ ар чӀэсыщтыгъэ. Нэкъокъогъу зэфэхъугъэхэ израилхэр къыфакӀохэзэ, яӀоф хьыкумкӀэ зэхифыщтыгъэ.
6Дэборэ Нафталый лӀакъом ичӀыгу ит Къэдэщ къалэм щыпсэущтыгъэ Баракъ, АбиноӀам ыкъор къаригъащи, риӀуагъ:
– Зиусхьанэу, Израилым и Тхьэ унашъо къыпфешӀы: «КӀуи, Нафталыйрэ Зэбулунрэ ялӀакъохэм ащыщэу нэбгырэ минипшӀ гъусэ къэшӀыхи, Табор къушъхьэм къещалӀэх. 7Ябын пачъыхьэм идзэпащэу Сисэрэ купсынкӀэхэри зэолӀхэри игъусэхэу игъукӀырэ псыхъоу Къышон Сэ къесщэлӀэнхэшъ, пӀэ къислъхьащтых».
8Арыти:
– Гъусэ укъысфэхъоу тызэдэбгъакӀомэ сыкӀощт, укъыздэмыкӀомэ, сэри сыкӀощтэп, – ыӀуи, Баракъ Дэборэ джэуап къыритыжьыгъ.
9– Дэгъу, – ыӀуагъ Дэборэ, – сыкъыбдэкӀощт. Ау, осэӀо, аущтэу зыхъукӀэ, а узтехьащт гъогум щытхъу къызэрэтемыхыщтыр. Сыда пӀоу укъэупчӀэмэ, Зиусхьаным Сисэрэ зыӀэ рилъхьащтыр бзылъфыгъэр ары.
Арыти, Дэборэ къэтэджи, Баракъ Къэдэщ дэкӀуагъ. 10Ащ дэжьым Зэбулунрэ Нафталыйрэ къыкъоуцонхэу лӀыкӀохэр Баракъ афигъэкӀуагъэх. ЗэолӀ минипшӀэу къаугъоигъэр Баракъ ыуж ихьагъ, Дэбори ащ игъусагъ.
11Мосэ ишӀупщыкъоу Хъобаб къытекӀыгъэ илъэпкъэгъу къэнхэм Хъэбэр къахэкӀи, ищэтырэ Къэдэщ пэгъунэгъоу ЦэӀэнэним къыщыкӀырэ чъыгэешхом дэжь щигъэӀэгъагъ.
12АбиноӀам ыкъо Баракъ Табор къушъхьэм идзэ игъусэу къызэрекӀолӀагъэм икъэбар Сисэрэ къызыраӀом, 13зэкӀэ гъучӀым хэшӀыкӀыгъэ купсынкӀэ шъибгъури зэкӀэ зэолӀэу Хъарэшэт-Гъоим щиӀыгъхэри Къышон псыӀушъом Ӏуищагъэх.
14Джащыгъум Дэборэ Баракъ риӀуагъ:
– Тэджи, кӀо! Зиусхьаным Сисэрэ пӀэ къызыщырилъхьэгъэ мафэр непэшъ. Уи Тхьэ уапэ итэу уещэба!
Арыти, Баракъ зэолӀ минипшӀыр ыуж итэу Табор къушъхьэм къехыгъ. 15Сисэри, зэкӀэ икупсынкӀэхэри изэолӀхэри ашӀэщтыр амышӀэу Баракъ ичэтэ ихыгъэ ыпашъхьэ Зиусхьаным къыщызэтыригъэуцуагъэх. Сисэри купсынкӀэм къипкӀи, лъэсэу ечъэжьэжьыгъ. 16Пыим икупсынкӀэхэри изэолӀхэри Баракъ рифыжьэхи, Хъарэшэт-Гъоим нэс ыфыгъэх. Сисэрэ идзэ хэтхэр зэкӀэ джащ фэдизым чатэкӀэ аукӀыгъэх, зы зэолӀи псэоу аӀэкӀэкӀыжьыгъэп.
17Ау Хъацэр пачъыхьэу Ябынрэ Хъэбэр къызхэкӀыгъэ къэн лӀакъомрэ зэшӀугъэхэти, Хъэбэр ишъхьэгъусэу ЯӀил ищэтырэ Сисэрэ ечъэлӀагъ.
18ЯӀил Сисэрэ къыпэгъокӀи:
– КъычӀахь, зиусхьан, садэжь къычӀахь. Умыщын, – ыӀозэ, ищэтырэ ригъэблэгъагъ.
Сисэрэ щэтырэм зычӀэхьэм, ЯӀил ар ыгъэгъолъи, алырэгъур тырихъуагъ.
19– Псы фалӀэ сэлӀэ, – риӀуагъ ащ бзылъфыгъэм. – Псы тӀэкӀу къысэт.
ЯӀил щэ зэрыт шъонтыр къытӀатӀи, пчэныщэм Сисэрэ ригъашъуи, алырэгъури тырихъожьыгъ.
20– Щэтырэ чӀэхьапӀэм дэжь уцу, – ыӀуагъ Сисэрэ. – «Зыпари мыщ исыба?» ыӀоу, зыгорэ къакӀоу, къыоупчӀымэ, «хьау» Ӏуи, еӀожь.
21Ау Хъэбэр ишъхьэгъусэу ЯӀил щэтырыр зэпхыгъэ пчэгъу цӀыкӀумрэ уатэмрэ къыштэхи, пшъыгъэу, хэчъыегъэ Сисэрэ екӀошъылӀагъ. Пчэгъу папцӀэр лӀым идэбжъыкъу дэжь щыхигъэзыхьи, чӀым хиӀулӀагъ. ЛӀыр ащ илӀыкӀыгъ.
22Ау, мары, Сисэрэ ыуж къыфызэ, Баракъ къэсыгъ, ЯӀил ари ригъэблэгъагъ.
– НекӀо, – риӀуагъ, – а узылъыхъурэ цӀыфыр сэ озгъэлъэгъущт.
Баракъ зычӀэхьэм: мары, щэтырэ пчэгъур дэбжъыкъум хэгъэзыхьагъэу, ащкӀэ чӀым хэӀулӀагъэу Сисэрэ ихьадэ щылъ.
23А мафэм Тхьэм израилхэр къэнаӀан пачъыхьэу Ябын ышъхьагъ ригъэуцуагъэх. 24Ябыни ар зыщыщ къэнаӀан лъэпкъри зэкӀэ амыгъэкӀодыфэхэ, израилхэм ятетыгъуи нахь лъэш хъузэ лъыкӀотагъ.
Currently Selected:
Гъуазэхэр 4: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023