Гъуазэхэр 16
16
ЯпшӀыкӀухэнэрэ шъхьэр
Шамсун фылистхэм къызэраӀэкӀэкӀыжьыгъэр
1Шамсун зэгорэм къалэу Ӏазэ кӀуагъэу бзылъфыгъэ хэтакӀо горэ щилъэгъуи, ащ дэжь ихьагъ. 2Къэлэдэсхэм Шамсун ащ къызэрэкӀуагъэр зызэхахым, къэлэ дэхьапӀэм хэлъ къэлэпчъэшхом дэжь къыщыпэтӀысыгъэх. Чэщ реным заушъэфыгъэу пэплъагъэх:
– Пчэдыжь нэфшъагъом нэс мыщ тыщежэнышъ, тыукӀыщт, – аӀомэ, гугъэхэзэ.
3Ау Шамсун бзылъфыгъэм дэжь къызэрилъыгъэр чэщныкъо охъуфэ нэс. Чэщыр зэфэдитӀу зэхъум, ар къэтэджи, къэлэ дэхьапӀэм хэлъ къэлэпчъэшхом еӀи, пчъэблыпкъитӀури зэригъусэу, сэхыри зэрэдэдзагъэу къыхитхъыгъ. ЕтӀанэ ар ыплӀэӀу тырилъхьи, Хъэурэн екӀурэ гъогумкӀэ щыӀэ къушъхьэ шыгум дихьыягъ.
Шамсунрэ Далилэрэ
4Уахътэ тешӀи, Щамсун бзылъфыгъэ горэ шӀу ылъэгъугъ. Ар израилхэмрэ фылистхэмрэ ячӀыгъунапкъэ щыт Сорэкъ кӀэим щыпсэущтыгъэ, Далилэ ыцӀагъ. 5Ащ дэжь фылист пщыхэр къакӀохи, къыраӀуагъ:
– ДэгущыӀэзэ, гущыӀэным хэгъэблыхьи, ащ къарыушхоу хэлъым ишъэф къегъаӀу, ар зэкӀоцӀытпхэнышъ, тытекӀон зэрэтлъэкӀыщт шӀыкӀэр къызэгъашӀ. КъызытфызэбгъашӀэкӀэ, тащыщ нэбгырэ пэпчъ тыжьын шэкъэл минрэ шъэрэ#16:5 Килограмм 13 фэдиз горэ мэхъу. зырыз къыуитыщт.
6Арыти, Далилэ Шамсун еупчӀыгъ:
– КъысаӀоба, къарыушхоу пхэлъым ишъэф, сыдэущтэу о узэкӀоцӀапхэнышъ, къыптекӀонхэ алъэкӀыщта?
7Шамсун ащ къыриӀожьыгъ:
– Щэбзэпс цӀыниблыкӀэ сапхмэ, сикъарыу къыщыкӀэнышъ, адрэ цӀыф пстэуми афэдэу сыхъущт.
8Далилэ фылист пщыхэм ар зареӀожьым, щэбзэпс цӀынибл къыфахьи, ахэмкӀэ бзылъфыгъэм Шамсун зэкӀоцӀипхагъ. 9ЛӀыхэм пэщ кӀоцӀым зыщагъэбылъыгъэу хъущтым ежэхэу щысхэзэ, Далилэ Шамсун еджагъ:
– Шамсун, фылистхэр уашъхьагъ итых!
Арыти, кӀэплъэнтхъоим хэшӀыкӀыгъэ Ӏуданэм машӀо нэсмэ зэрэзэпызрэм фэдэу щэбзэпс цӀыниблыр ащ зэпитхыгъ. Къарыушхоу хэлъым ишъэфи зэрэшъэфэу къэнагъ.
10Ащыгъум Далилэ гъынэгъагъэ:
– О сыбгъэпцӀагъ, шъыпкъэр къысэпӀуагъэп. Ау джыри сыолъэӀу, къысаӀу: сыдэущтэу узэкӀоцӀапхэн алъэкӀыщта?
11Адрэм къыриӀожьыгъ:
– Зэ нэмыӀэми амыгъэфедэгъэ кӀапсэхэмкӀэ пытэу сапхымэ, сикъарыу къыщыкӀэнышъ, адрэ цӀыф пстэуми афэдэу сыхъущт.
12Далилэ кӀапсэ къышти, ар зэкӀоцӀипхи, еджагъ:
– Шамсун, фылистхэр уашъхьагъ итых!
ЛӀыхэм пэщ кӀоцӀым зыщагъэбылъыгъэу хъущтым ежэхэу щысыгъэх. Шамсуни ыӀэхэр зэрэпхыгъэ кӀапсэхэр Ӏуданэм фэдэу къыщымыхъоу зэпичыгъэх.
13Далилэ Шамсун етӀани риӀуагъ:
– О сыогъапцӀэ зэпыт, шъыпкъэр къысапӀорэп. Ау джыри сыолъэӀу, къысаӀу: сыдэущтэу узэкӀоцӀапхэн алъэкӀыщта?
– Сшъхьац блэриблыр шэкӀыр зэрашъэрэ Ӏэмэ-псымэм дэлъ шэкӀым хэублэу, ар шъэнчатэкӀэ#16:13 ЩэкӀыр ашъэ зыхъукӀэ Ӏэмэ-псымэм дэлъ Ӏуданэхэр зэщиз зэрашӀырэ, зэрагъэпытэрэр ары. ебгъэубытыжьмэ, сикъарыу къыщыкӀэнышъ, адрэ цӀыф пстэуми афэдэ сыхъущт, – ыӀуи Шамсун джэуап къыритыжьыгъ.
14Арыти, ар зэчъыем, ащ ышъхьац блэриблыр ышти, Ӏэмэ-псымэм дэлъ шэкӀым хиблагъ#16:14 Я 13-рэ усэм хэт гущыӀэхэу «ар шъэнчатэкӀэ» зыфиӀохэрэм къащегъэжьагъэу мы чӀыпӀэм нэс зэтыдзэкӀыгъэ гущыӀэхэр зыхэтыр ижъырэ урымыбзэкӀэ зэрадзэкӀыгъэр ар. Ижъырэ джуртыбзэкӀэ тхыгъэ Ӏэпэрытхым ахэр хэтхэп., шъэнчатэкӀэ ригъэубытыжьыгъ.
Ащ ыуж еджагъ:
– Шамсун, фылистхэр уашъхьагъ итых!
Щамсун къэущи, шъэнчатэр къыхитхъи, Ӏэмэ-псымэр шэкӀыри зэрэдэлъэу къычӀитхъыгъ.
15Арыти, бзылъфыгъэм ащ къыриӀуагъ:
– Сыдэущтэу къысэпӀошъура шӀу сыплъэгъоу, ащ нахьэу цыхьэ къысфэмышӀмэ? Джы сызэрэбгъэпцӀагъэр ящэнэрэу щэ унае сыбгъэпцӀагъ, къарыушхоу пхэлъыр зэпхыгъэр джыри къысэпӀуагъэп.
16Джаущтэу мафэ къэс риӀозэ, ащ Шамсун ышъхьэ ригъэуджэгъужьыгъ. 17Арыти, зытет шъыпкъэр къыриӀуагъ:
– Сыкъызалъфыгъэм щегъэжьагъэу сыназирышъ#16:17 Еплъ: мы тхылъым 13:4-5 ехьыхыгъэу иӀэм., Тхьэм сырицӀыфышъ, зэ нэмыӀэми сшъхьаци сыжакӀи сыупсыгъэп. Сшъхьац аупсымэ, сикъарыу къыщыкӀэнышъ, кӀочӀаджэу адрэ цӀыф пстэуми афэдэу сыхъущт.
18Мызэгъогум ащ зытет шъыпкъэр къызэрэриӀуагъэр Далилэ къыгурыӀуи, фылист пщыхэм афиӀопщыгъ:
– Джыри зэ шъукъакӀу: зытет шъыпкъэр джы ащ къысиӀуагъ.
Фылист пщыхэр бзылъфыгъэм дэжь къакӀохи, къызэрагъэгугъэгъэ тыжьыныр къыфахьыгъ. 19Шамсун ышъхьэ ыкокӀ илъэу ыгъэчъыйи, бзылъфыгъэр цӀыф къеджи, лӀым ышъхьац блэрибл тыриупсыкӀынэу риӀуагъ. Ащ ышъхьац ыупсынэу зэрэригъажьэу, Шамсун икъарыу къыщыкӀи, кӀочӀаджэ хъугъэ.
20Ардэдэми бзылъфыгъэр къэкууагъ:
– Шамсун, фылистхэр уашъхьагъ итых!
Арыти, ар къэущыжьи, егупшысагъ:
– Ыпэрэхэм афэдэу, джыри зыкъэстӀэтӀэжьын.
Зиусхьаным къызэрибгынагъэр ащ ышӀэщтыгъэп.
21Фылистхэм ар аубыти, ынэхэр ракӀыхи, къалэу Ӏазэ ащи, джэрдз лъэхъухэр тыралъхьагъэх. Гъэрхэр зыщаӀыгъ унэм коц щырагъэхьаджыгъ. 22Аузэ ышъхьацрэ ыжакӀэрэ икӀэрыкӀэу къэкӀыжьэу рагъэжьагъ.
Шамсун ылъ зэришӀэжьыгъэр, ежьыри зэрэлӀагъэр
23А зэкӀэмэ ауж ятхьэу Дагон къурмэнышхо фашӀынэу, чэфынхэу фылист пщыхэр къэзэрэугъоигъэх. Ахэм аӀуагъ:
– Титхьэ типый Шамсун тӀэ къырилъхьагъ.
24Шамсун залъэгъукӀэ, ахэм ятхьэ щытхъу фашӀыщтгъэ:
– Титхьэ тӀэ къырилъхьагъ пыеу
тичӀыгу хэкужъ зышӀыщтгъэр,
тащыщыбэ зыукӀыгъэр.
25Чэфым зызэлъештэхэм, фылистхэм куоу рагъэжьагъ:
– Тизэщ ттыригъэунэу Шамсун къашъущэ.
Арыти, ахэр ыгъэчэфынхэу Шамсун къащагъ. КӀэсэнхэм азыфагу зыдагъэуцо нэуж, 26Шамсун ыӀапэ зыӀыгъыгъэ кӀалэм елъэӀугъ:
– Унашъхьэр зыӀыгъ кӀэсэнхэм санэгъэс, зязгъэкъун слъэкӀынэу сыгъэуцу. 27Унэм хъулъфыгъи бзылъфыгъи, фылист пщыхэри зэрахэтэу чӀэмыфэжьхэу чӀэсыгъэх. Шамсун еплъхэу хъулъфыгъэми бзылъфыгъэми зэхэтэу нэбгырэ минищ фэдиз унашъхьэми тетыгъ.
28Джащыгъум Шамсун Зиусхьаным лъэӀукӀэ зыфигъэзагъ:
– О зэкӀэ зыӀэ илъ Зиусхьан, угу сыкъэгъэкӀыжь. СыолъэӀу, си Тхь, зэ закъо сикъарыу къегъэгъэзэжьи, фылистхэм сынитӀу зэрэракӀыгъэр зэ огъукӀэ язгъэпщыныжьынэу амал къысэт.
29Шамсун унэм игурыт кӀэсэнитӀум анэси, Ӏэ джабгъумкӀэ зым, сэмэгумкӀэ адрэм заригъэкъуи, къэкууагъ:
30– Фылистхэм ягъусэу сэри сэрэкӀод! – ЫӀуи, къарыоу иӀэмкӀэ еӀункӀи, унэр пщыхэми, зэкӀэ цӀыфэу къэзэрэугъоигъэу ащ чӀэсыгъэхэми къатыригъэуагъ. ЩэӀэфэ ыукӀыгъэм нахьи, ихьадэгъукӀэ нахьыбэ зыдихьыжьыгъ.
31А зэкӀэм ауж ышхэри, ятэ иунагъо зэкӀэ исхэри къакӀохи, Шамсун ихьадэ ащэжьыгъ. Ар ятэ Мыныуахъ икъэунэу ЦорэӀрэ Ащтаулрэ азыфагу итым щагъэтӀылъыжьыгъ. Шамсун илъэс тӀокӀым къыкӀоцӀ Израилым игъуазэу щытыгъ.
Currently Selected:
Гъуазэхэр 16: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
