Гъуазэхэр 15
15
ЯпшӀыкӀутфэнэрэ шъхьэр
Шамсун фылистхэр зэригъэпщынагъэхэр
1Охътэ заулэ тешӀагъэу, коцым иӀухыжьыгъом, Шамсун чэцӀ цӀыкӀу зыдихьи, ишъхьэгъусэ зэригъэлъэгъунэу кӀуагъэ. Зынэсым, ыӀуагъ:
– Сэ сишъхьэгъусэ дэжь сихьанэу сыфай.
Ау бзылъфыгъэм ятэ ащ дэжь ригъэхьагъэп:
2– О ар зэрэпфэмылъэгъурэм щэч фысиӀагъэпти, арыти, шъэогъоу уигъусагъэм естыжьыгъ, – къыриӀожьыгъ адрэм. – Мары, ащ ышыпхъу нахьыкӀэ, ар нахь дахэба? Модрэм ычӀыпӀэ ар штэба.
3Ау Шамсун ащ еуцолӀагъэп:
– Мызэгъогум фылистхэм сэ анахь дэеу сыжъудэзекӀоми сызаф.
4Ар кӀуи, бэджэшъыбз шъищ къыубытыгъ, ахэр тӀурытӀоу акӀэхэмкӀэ зэрипхыгъэх. ЕтӀанэ бэджэшъитӀоу зэрипхыгъэ пэпчъ акӀэхэр зыщызэнэсрэм бэщмашӀо кӀэрипхэжьи, 5фылистхэм ягубгъоу Ӏуамыхыжьыгъэ лэжьыгъэр джыри зэрылъым ритӀупщыхьагъэх. Джаущтэу ахэм яхьандзохэмрэ Ӏуамыхыжьыгъэ лэжьыгъэмрэ, сэнэшъхьэшӀапӀэхэмрэ зэйтун мэзжъыехэмрэ ащ ыгъэстыгъэх.
6– Хэт ар зышӀагъэр, – аӀуи, фылистхэр зыкӀэупчӀэхэм, ахэм араӀуагъ:
– Тымнэ къалэм дэсым имахълъэу Шамсун ары, ишъхьэгъусэ ащ ишъэогъугъэм шӀупщым зэрэритыжьыгъэм пае.
Арыти, фылистхэр кӀохи, бзылъфыгъэри яти яунэ рагъэстыхьагъэх.
7Джащыгъум Шамсун тхьэ ыӀуагъ:
– Аущтэу шъо шъузызекӀуагъэкӀэ, лъыр шъосымыгъэпщыныжьыфэ, сыгупсэфынэп.
8Ар ахэм атебани, мыкӀожьыр къахигъахьэу зэхигъэтэкъуагъэх. ЕтӀанэ кӀуи, Ӏэтам къушъхьэ тӀуакӀэм зыдигъэбылъхьагъ.
9Арыти, фылистхэр зэрэугъойхи, Лэхъ къалэм теонхэу Ехъудэм пщыпӀэ щагъэуцугъ. 10Ар залъэгъум Ехъудэм щыпсэухэрэр ахэм къяупчӀыгъэх:
– Сыда шъукъытэзонэу шъукъызыкӀытэкӀугъэр?
– Шамсун зэкӀоцӀытпхэнышъ, къытишӀэгъэ дэдэр етшӀэжьынэу ары тыкъызкӀэкӀуагъэр, – ахэм къараӀожьыгъ.
11Ехъудэм щыщэу нэбгырэ минищ Ӏэтам къушъхьэ тӀуакӀэм кӀохи, Шамсун раӀуагъ:
– Фылистхэр ташъхьагъ зэритхэр о ошӀэба? Сыд илӀэужыгъу къытэпшӀагъэр?
– Сэ къысашӀэгъэ дэдэр ясшӀэжьыгъ ныӀэп, – Шамсун джэуап къаритыжьыгъ.
12– Тэ тыкъызкӀэкӀуагъэр, – къыраӀуагъ адрэхэм, – узэкӀоцӀытыпхэнышъ, фылистхэм уяттынэу ары.
Шамсун ариӀожьыгъ:
– Тхьэ къысфашъуӀу, шъо сышъумыукӀынэу.
13– Хьау утыукӀыщтэп, – ар къагъэгугъагъ. – Тэ узэкӀоцӀытпхэнышъ, ахэм уяттыщт ныӀэп.
КӀэпсэ кӀэкъыпситӀукӀэ ар апхи, къушъхьэ тӀуакӀэм къыдащыгъ.
14Лэхъ къызеблагъэм, фылистхэр зэтезэрэгъэкуожьхэзэ, ащ къыпэгъокӀыгъэх. Зиусхьаным ы Псэ ар зэлъишти, ыӀэхэр зэрэпхыгъэгъэхэ кӀапсэхэр Ӏуданэу зэпыстыкӀыгъэм афэдэу, къефэхыжьыгъэх. 15Щыд жэпкъ къупшъхьэу джыри мыгъушъыжьыгъэу а чӀыпӀэм къыщигъотыгъэр къышти, ащкӀэ фылист нэбгырэ мин ыукӀыгъ.
16ЕтӀанэ Шамсун ыӀуагъ:
– Щыд жэпкъкӀэ
Зы кортым нэмыкӀ корт теслъхьажьыгъ,
Щыд жэпкъкӀэ
Нэбгырэ мин сыукӀыгъ.
17Ар къыӀуи, жэпкъ къупшъхьэр ыгъэжьажьи чӀидзыгъ. Джащ пае а чӀыпӀэм Рамат-ЛэхъкӀэ#15:17 Ижъырэ джуртыбзэкӀэ: «жэпкъ къупшъхьэм иӀуашъхь». еджагъэх.
18Ащ дэжьым Шамсун лъэшэу псыфалӀэ къэлӀагъэти, Зиусхьаным лъэӀукӀэ зыфигъази, еджагъ:
– ТекӀоныгъэшхо О уипщылӀ ыӀэкӀэ къыдебгъэхыгъ. Джы псыфалӀэм сигъэлӀэна е сунэтмышӀхэм саӀэкӀэфэна?
19Арыти, Тхьэм Лэхъ къалэ дэжь мэшэ куу къыщызэгуигъэкӀи, ащ псыр къыригъэчъыгъ. Шамсун зызегъэшъокӀым, ыкӀуачӀэ ыгъотыжьи, зыкъишӀэжьыгъ. Джащ пае а чӀыпӀэм Ӏэн-ХакъыуркӀэ#15:19 Ижъырэ джуртыбзэкӀэ: «джэрэм ипсынэкӀэчъ». еджагъэх. Непэ къызнэсыгъэми Лэхъ дэжь ар щыт.
20Фылистхэм тетыгъор зыщаӀыгъыгъэ уахътэм Шамсун илъэс тӀокӀырэ Израилым игъуазэу щытыгъ.
Currently Selected:
Гъуазэхэр 15: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
