МысырикӀыжь 25

ЯтӀокӀэнэрэ тфырэ шъхьэр

Тхьэм ипсэупӀэ лъапӀэ пае тынхэр

1Зиусхьаным Мосэ къыриӀуагъ: 2«Тынхэр къысфашӀынхэу израиль цӀыфхэм яӀу. Хэтрэ цӀыфэу гупыкӀ зиӀэм Сэщ пае тынэу ышӀыхэрэр къыӀышъухых. 3Мыхэр арых ахэм тынэу къаӀышъухынхэ фаер: дышъэр, тыжьыныр, гъуаплъэр, 4цы шхъуантӀэр, шхъонтӀашъор къызтеорэ цы плъыжь чӀапцӀэр, цы плъыжьыбзэр, чэтэн пӀуакӀэр, пчэныцыр, 5мэлышъо гъэтэджыгъэ плъыжьхэр, шъо пӀуакӀэхэр, акацэ пхъэхэр, 6остыгъэм пае дагъэр, мэ ӀашӀухэр къызпихрэ уцхэу щыфэн ашӀырэ дагъэм халъхьащтхэмрэ мэ ӀашӀухэр къызпихрэ мыстхъухэу агъэфедэщтхэмрэ, 7оникс мыжъор, нэмыкӀ мыжъо лъапӀэхэри къурмэнышӀым ичэтэнӀабгъурэ#25:7 Мыщ ехьылӀагъэу нахь игъэкӀотыгъэу къыщеӀуатэ мы тхылъым ия 28-рэ шъхьэ и 1-рэ усэ къыщегъэжьагъэу ия 14-рэ усэ нэс. бгъэрышӀэмрэ#25:7 Мыщ ехьылӀагъэу нахь игъэкӀотыгъэу къыщеӀуатэ мы тхылъым ия 28-рэ шъхьэ ия 15-рэ усэ къыщегъэжьагъэу ия 30-рэ усэ нэс. ахадэнхэу. 8Израиль цӀыфхэм Сэщ пае чӀыпӀэ лъапӀэ сфарэшӀ, ахэм Сэ сырягъусэщт. 9ЗэкӀэ Сэ къызэрэозгъэлъэгъурэм фэдэ къабзэу шъушӀы, чэтэнгъэӀэгъэ лъапӀэу Сэ СипсэупӀэщтри ащ дыкӀыгъоу агъэфедэщт пстэури джаущтэу шъушӀых.

Пхъонтэ лъапӀэр

10Пхъонтэ лъапӀэр акацэ чъыгым хэшъушӀыкӀ. Ащ икӀыхьэгъэщтыр ӀэнтэгъуитӀурэ ныкъорэ#25:10 Ар сантиметри 110-рэ фэдиз хьазыр. Ар зэрашыщтыгъэр Ӏэнтэгъупэм къыщегъэжьагъэу Ӏэхъомбэ гурытым ыцыпэ нэс., ишъомбгъуагъи илъэгагъи зы Ӏэнтэгъурэ ныкъорэ#25:10 Ар сантиметрэ 66-рэ фэдиз хьазыр. зырыз. 11Дышъэ къабзэр ащ къегъэтӀылъэкӀ, ыкӀоцӀи ыкӀыӀуи ар ателъхь. Ащ ышъхьагъкӀэ къыщыдекӀокӀэу дышъэм хэшӀыкӀыгъэу нэз кӀэракӀэ фэшӀ. 12Дышъэ хъурджэниплӀ пхъонтэ лъапӀэм пае гъэчъи, ар зытет лъакъохэм ягъэпытылӀэх: зы бгъумкӀэ хъурджэнитӀур, адрэ бгъумкӀи хъурджэнитӀур ащыӀэхэу. 13Акацэ чъыгым бэщ кӀыхьэхэр хэшӀыкӀхи, дышъэр къягъэтӀылъэкӀ. 14Бэщхэр пхъуантэм ыбгъухэмкӀэ ащыӀэ хъурджанэмэ арылъхьэх, ахэмкӀэ пхъуантэр зепхьан плъэкӀынэу. 15Бэщхэр пхъонтэ лъапӀэм ихъурджанэмэ арылъынхэ фае, ахэр хъурджанэмэ къарыпхыхэ хъущтэп. 16Сэ сиунашъохэр зытет мыжъобгъуитӀоу къыостыщтхэр пхъонтэ лъапӀэм далъхьэх.

17Пхъонтэ лъапӀэм ишъхьатеӀуби#25:17 Мы гущыӀэм ижъырэ джуртыбзэмкӀэ тхыгъэ Ӏэпэрытхым ятӀонэрэ мэхьани щыриӀ: псэкӀодхэм ятехъуапӀ. Ар къызэрэбгурыӀон фаер: псэкӀодхэр къыпфэгъунхэр. джащ фэдэу дышъэ къабзэм хэшӀыкӀ. Ащ икӀыхьэгъэщтыр ӀэнтэгъуитӀурэ ныкъорэ ишъомбгъогъэщтыр зы Ӏэнтэгъурэ ныкъорэ. 18Дышъэм къэрыубитӀу#25:18 Къэрыуб – ошъогу псэушъхьэ тэмабгъу. хэшӀыкӀ, хэуӀукӀыгъэхэу, шъхьэтеӀубэм къытещхэу, ащ дыхэтхэу ахэр шӀы. 19Зы къэрыубыр зы цыпэм дыхэтэу, адрэ къэрыубыр адрэ цыпэм дыхэтэу, шъхьатеӀубэм ыцыпитӀу къатещхэу къэрыубхэр шӀы. 20Къэрыубхэм атамэхэр шъхьатеӀубэм щизхэу убгъугъэхэу, анапэхэмкӀэ зэфэгъэзэгъэщтых, ахэм анапэхэр шъхьатеӀубэм къыфэгъэзэгъэщтых. 21Пхъонтэ лъапӀэм ыкӀыӀу шъхьатеӀубэр телъхь. Сэ сиунашъохэр зытет мыжъобгъуитӀур ежь пхъуантэм далъхьэх. 22А чӀыпӀэм Сэ зыкъыщыпфэзгъэнафэзэ, пхъонтэ лъапӀэм ишъхьатеӀубэ дыхэтхэ къэрыубитӀум азыфагукӀэ сыщыӀэу израиль цӀыфхэм оркӀэ къафэсшӀы сшӀоигъо унашъохэр зэкӀэ къыуасӀохэзэ сшӀыщт.

Ӏанэ лъапӀэр

23Акацэ чъыгым Ӏанэ хэшӀыкӀ икӀыхьагъэ ӀэнтэгъуитӀу#25:23 Ар сантиметрэ 88-рэ фэдиз хьазыр., ишъомбгъуагъэ зы Ӏэнтэгъу#25:23 Ар сантиметрэ 44-рэ фэдиз хьазыр., илъэгагъэ зы Ӏэнтэгъурэ ныкъорэ#25:23 Ар сантиметрэ 66-рэ фэдиз хьазыр. хъухэу. 24Ащ дышъэ къабзэ теӀулӀ, ышъхьагъ къыщыдекӀокӀэу дышъэм хэшӀыкӀыгъэу нэз кӀэракӀэхэр фэшӀых. 25Ӏэгушъом щиз зилъэгэгъэ бгъухэр Ӏэнашъхьэм тегъэпытыхьагъэхэу тегъэуцох, а бгъухэм къадаухьэу дышъэм хэгъэткӀукӀыгъэу нэз кӀэракӀэхэр фэшӀых. 26Ащ пае дышъэм хъурджэниплӀ хэгъэткӀукӀи, хъурджанэхэр къопиплӀымэ, лъэкъуиплӀымэ ащягъэпытылӀэх. 27Ӏанэр зэрахьыщт бэщхэр аращынхэу хъурджанэхэр Ӏэнашъхьэм пэблагъэу лъакъохэм ягъэпытылӀэх. 28Бэщхэр акацэ чъыгым хэшӀыкӀхи, дышъэр къягъэтӀылъэкӀ, ахэмкӀэ Ӏанэр зэрахьащт. 29Ӏанэм пае лагъэхэр, тасхэр, Ӏэгубжъэхэр, шъон къурмэныр арыбгъэхъонэу къошынхэр шӀых. Ахэр дышъэ къабзэм хэшӀыкӀых. 30Сэ сапашъхьэ ренэу илъынэу хьалыгъу гъомылэ тыныр Ӏанэм телъхьэзэ шӀы.

Дышъэ остыгъэр

31Дышъэ къабзэм остыгъэ хэшӀыкӀ. А остыгъэр дышъэм хэуӀукӀыгъэу щытын фае. Ащ ыпкъи, ыбгъухэм къахэкӀырэ къутамэхэри, къэгъэгъэ теплъэ зиӀэ Ӏэгубжъэ цӀыкӀухэри, ахэм къарыкӀырэ къэгъэгъэ тхьапэхэри зэикӀхэу щытын фае. 32Остыгъэм ыбгъухэм къутэмих къахэкӀын фае: къутэмищыр ащ ызыбгъу, адрэ бгъуми – къутэмищ. 33Остыгъэм икъутамэ пэпчъ миндаль къэгъагъэм ехьщырхэу Ӏэгубжъэ цӀыкӀуищ, тхьапэхэр къарыкӀыхэу, пытынхэ фае. 34Остыгъэм ыпкъи миндаль къэгъагъэм ехьщырхэу Ӏэгубжъэ цӀыкӀуиплӀырэ ахэм къарыкӀырэ тхьапэхэмрэ пытынхэ фае. 35Апэрэ къутэмитӀур остыгъэм къызщыхэкӀыхэрэ чӀыпӀэм ычӀэгъ, Ӏэгубжъэ цӀыкӀу, миндаль къэгъагъэм ехьщырэу, адрэ къутэмитӀури ящэнэрэ къутэмитӀури къызщахэкӀыхэрэ чӀыпӀэмэ ачӀэгъхэм ащ фэдэхэр ачӀэтынхэ фае. 36Миндаль къэгъагъэм ехьщыр Ӏэгубжъэ цӀыкӀухэри къутамэхэри зэикӀэу остыгъэм дыхэтхэу, дышъэ къабзэм хэуӀукӀыгъэхэу щытын фае. 37Ащ пае гъэстылъэу блы шӀи, остыгъэм ыпашъхьэ къагъэнэфынэу ащ тегъэуцох. 38Остыгъэм кӀыгъущт Ӏадэхэри, шъэгъэ стафэхэм апае къопс зиӀэ жъокулъэри дышъэ къабзэм хэшӀыкӀыгъэнхэ фае. 39Остыгъэри ащ дыкӀыгъоу агъэфедэрэ пстэури зэрэзэгъусэхэу зы кыкъар#25:39 Кыкъарыр щэчэлъэ шапхъэу ижъырэ джуртхэм яӀагъ. Ащ ионтэгъугъэ килограмм 35-рэ фэдиз хьазырыгъ. хъурэ дышъэ къабзэм харэшӀыкӀых. 40Фэсакъ, мы къушъхьэм Сэ джы къызэрэщыозгъэлъэгъурэм фэдэ къабзэу зэкӀэри шӀы».

Currently Selected:

МысырикӀыжь 25: АдыТГ

Highlight

Copy