МысырикӀыжь 18

ЯпшӀыкӀуенэрэ шъхьэр

Мосэ ишӀупщ Итрэу къызэрэкӀуагъэр

1Тхьэм Израиль Мысырым къызырещыжьым, Моси Ежь илъэпкъэу Израили апае Ащ ышӀагъэр зэкӀэ Мосэ ишӀупщэу, мыдиан къурмэнышӀэу Итрэу зэхихыгъэх. 2Арыти Мосэ ишӀупщэу Итрэу зыдырищэжьагъэх: Мосэ ишъузэу, ащ ыпэкӀэ ятэ дэжь къызэригъэгъэзэжьыгъэгъэхэ Циппорэрэ 3яшъэуитӀурэ. ТӀум язым ыцӀагъэр Гъэршэм#18:3 Мы цӀэм ижъырэ джуртыбзэмкӀэ къэӀуакӀэу иӀэм имэхьанэ зыпэблагъэр «хымэ хэгъэгум щыщ» зыфиӀорэр ары., сыда пӀомэ Мосэ ыӀощтыгъ: «Сэ хымэ хэгъэгум хэхэсэу сис»; 4адрэм ыцӀагъэр ЕлыӀэзэр#18:4 Ижъырэ джуртыбзэмкӀэ тхыгъэ Ӏэпэрытхым мы гущыӀэм мэхьанэу щыриӀэр: «Си Тхьэ сиӀэпыӀэгъу»., сыда пӀомэ Мосэ ыӀощтыгъ: «Сятэ и Тхьэ сэ ӀэпыӀэгъоу сиӀагъ, фирхьауным ичати сыкъыӀэкӀихыжьыгъ». 5ИшӀупщэу Итрэу Мосэ ишъузрэ ыкъуитӀурэ игъусэхэу шъоф нэкӀым, Тхьэм икъушъхьэ дэжь уцупӀэ щязгъэшӀыгъэ Мосэ дэжь къэкӀуагъ. 6«Сэ, уишӀупщэу Итрэу, уишъузрэ пкъуитӀурэ скӀыгъухэу уадэжь тыкъэкӀуагъ» ыӀуи, Итрэу Мосэ макъэ ригъэӀугъ. 7Мосэ ишӀупщ къыпэгъокӀыгъ, шъхьащи къыфишӀыгъ, къебэугъ, шӀуфэс зызэрахым ыуж, ахэр чэтэн гъэӀагъэм чӀэхьагъэх. 8Ащ дэжьым Зиусхьаным фирхьауными зэкӀэ мысыр цӀыфхэми Израиль пае аришӀагъэхэри, къинэу гъогум ащыпэкӀэкӀыгъэ пстэури, Зиусхьаным а къинхэм къызэрахищыжьыгъэхэри Мосэ ишӀупщ къыфиӀотагъэх. 9Зиусхьаным Израиль мысыр цӀыфхэм къызаӀэкӀехыжьым, шӀугъэу къафишӀэгъэ пстэумэ Итрэу агъэгушӀуагъ. 10Итрэу къыӀуагъ: «Зиусхьанэу мысыр цӀыфхэми фирхьаунми шъуакъыӀэкӀэзыхыжьыгъэм, мысыр цӀыфхэм ябжь шъуилъэпкъ тезыхыжьыгъэм щытхъур ий. 11Джы сэ къэсшӀагъ Зиусхьаныр тхьэ пстэуми зэранахь лъэшыр, сыда пӀомэ зызышӀошӀыжьырэ мысыр цӀыф пагэхэм ятетыгъо Ащ шъущиухъумагъ». 12Ащ ыуж Мосэ ишӀупщэу Итрэу къурмэнгъэсти нэмыкӀ къурмэнхэри Тхьэм фишӀыгъэхэти, Хьаруни Израиль инахьыжъ упчӀэжьэгъухэри зэкӀэ Мосэ ишӀупщ Тхьэм ыпашъхьэ щыдэшхэнхэу къэкӀуагъэх.

Итрэу Мосэ зэригъэгъозагъэр

13ЯтӀонэрэ мафэм Мосэ лъэпкъым иӀофхэр зэхифынхэу тӀысыгъэ. Пчэдыжьым къыщегъэжьагъэу пчыхьэ нэс цӀыфхэр Мосэ дэжь щызэхэтыгъэх. 14Мосэ цӀыфхэм аришӀэрэр зэкӀэ ащ ишӀупщ зелъэгъум, риӀуагъ: «Сыда мы цӀыфхэм япшӀэрэр? Сыда зыкӀыуизакъори, пчэдыжьым къыщегъэжьагъэу пщэпэ зэхэогъум нэс цӀыфхэр уадэжь зыкӀыщызэхэтхэри?» 15Мосэ ишӀупщ къыриӀожьыгъ: «Тхьэм еупчӀынхэу цӀыфхэр садэжь къэкӀох, 16зэнэкъокъу азыфагу къызыдахьэкӀэ, ахэр садэжь къэкӀохэшъ, модрэми мыдрэми иӀоф зэхэсэфы, Тхьэм ишапхъэхэмрэ ихабзэхэмрэ ясэгъашӀэх». 17Ау ишӀупщ Мосэ къыриӀуагъ: «УиӀофшӀакӀэ тэрэзэп, 18сыда пӀомэ ори цӀыфэу уигъусэхэми къиным шъухэтыщт. Мы Ӏофыр оркӀэ хьылъащ, уизакъоу ар бгъэцэкӀэн плъэкӀыщтэп. 19Арышъ, къыосӀощтым къедэӀу, сэ узгъэгъозэщт, Тхьэри уигъусэщт: цӀыфхэм урялӀыкӀоу, ахэм яӀофхэр епхьылӀэхэу Тхьэм ыпашъхьэ уитыщт. 20Тхьэм ишапхъэхэмрэ ихабзэхэмрэ ахэм ягъашӀэх, зытетынхэ фэе гъогухэр, ашӀэн фэе Ӏофхэр агурыгъаӀох. 21О цӀыфхэм къахэх чанхэу, Тхьэм щынагъо фызиӀэхэу, шъыпкъагъэ зыхэлъхэу, мылъкукӀэ дэмыгъэхышъущтхэр. Ахэр нэбгырэ минымэ, нэбгыришъэмэ, нэбгырэ шъэныкъомэ, нэбгырипшӀымэ яӀэшъхьэтетынхэу гъэуцух. 22Сыдигъуи ахэм цӀыфхэр зыфызэнэкъокъухэрэр зэхарэфых, зэнэкъокъушхо горэ къахахьэмэ, о зыкъыпфарэгъаз, нахь къызэрыкӀохэр ежьхэм зэхарэфых. Джаущтэу орыкӀи нахь псынкӀэщт, ежьхэми уикъин къыбдаӀэтыщт. 23Джаущтэу ар о пшӀымэ, Тхьэми къыуиӀомэ, ащыгъум о укъызэтенэщт, мы цӀыфхэри разэу ядэжь кӀожьыщтых». 24ИшӀупщ къыӀуагъэм Мосэ едэӀуи, ащ зыфиӀуагъэр зэкӀэ ыгъэцэкӀагъ. 25Мосэ израиль лъэпкъым цӀыф чанхэр къыхихыхи, лъэпкъым иӀэшъхьэтетынхэу нэбгырэ минӀмэ, нэбгыришъэмэ, нэбгырэ шъэныкъомэ, нэбгырипшӀымэ яӀэшъхьэтетынхэу ыгъэуцугъэх. 26Сыдигъуи ахэм цӀыфхэм язэнэкъокъухэр зэхафыщтыгъэх, зэнэкъокъушхохэм язэхэфын Мосэ фагъазэщтыгъэ, Ӏоф нахь къызэрыкӀохэр ежьхэм зэхафыщтыгъэх.

27Ащ ыуж Мосэ ишӀупщ ытӀупщыжьи, ар ихэгъэгу кӀожьыгъ.

Currently Selected:

МысырикӀыжь 18: АдыТГ

Highlight

Copy