Хэбзэ тхыжьыгъэр 31
31
Мосэ иаужырэ Ӏофхэр
(я 31-рэ – я 33-рэ шъхьэхэр)
ЯщэкӀэнэрэ зырэ шъхьэр
Ехъошуа Мосэ иӀофлъыгъэкӀуатэ зэрэхъугъэр
1Мосэ икъэгущыӀэн лъигъэкӀуатэзэ, зэрэизраил лъэпкъэу риӀуагъ: 2«Сыныбжь илъэсишъэрэ тӀокӀырэ хъугъэ, шъукъесщэкӀынэуи скӀуачӀэ къыхьыжьырэп. Сэ Зиусхьаным къысиӀуагъ: „О Иордан псыхъом узэпырыкӀыщтэп“. 3Шъуи Зиусхьанэу Тхьэр шъуапэ итэу ащ зэпырыкӀыщт. Шъуапэ итэу а цӀыф лъэпкъхэр ригъэкӀодыкӀыпэнхэшъ, ахэм ячӀыгу шъуубытыщт. Зиусхьаным къызэриӀуагъэм тетэу, Ехъошуа шъуищэщт. 4Амэр цӀыфмэ япачъыхьэхэу, яхэгъэгухэр зэрягъусэхэу Зиусхьаным ыгъэкӀодыгъэхэ Сыхъонрэ Ӏогърэ аришӀэгъэ дэдэр а цӀыф лъэпкъхэми аришӀэщт. 5Зиусхьаным ахэр шъуӀэ къырилъхьащтхэшъ, сэ унашъоу къышъуфэсшӀыгъэм тетэу шъуадэзекӀон фае. 6Пытагъэрэ теубытагъэрэ зыхэжъугъэлъ. Шъуи Зиусхьанэу Тхьэр шъуигъусэшъ, ахэм шъуащымыщын, зыкъяшъумыгъэгъащт, Ащ шъукъыбгынэхэщтэп». 7ЕтӀанэ Мосэ Ехъошуа къеджи, ар зэрэ Израилэу ыпашъхьэ итэу, риӀуагъ: «Мы цӀыф лъэпкъым уригъусэу, Зиусхьаным къышъуитынэу тятэжъхэм гущыӀэ пытэ къызыфадишӀыгъэ чӀыгум уихьанышъ, ар яунэенэу кӀэнэу атебгощэн фаешъ, пытагъэрэ теубытагъэрэ зыхэгъэлъ. 8Ежь Зиусхьаныр шъуапэ итыщт, шъуигъусэщт; Ар шъукӀэлъырыкӀыщтэп, шъукъыбгынэщтэп. Шъумыщын, шъугуи шъумыгъэкӀоды».
Тхьэм и Хабзэ къызэреджэщтхэр
9Мосэ Тхьэм мы и Хабзэ ытхи, Лэуй къыхэкӀыгъэхэм ащыщ къурмэнышӀхэу Зиусхьаным дашӀыгъэ зэзэгъыныгъэр зытет мыжъобгъуитӀур зыдэлъ пхъонтэрыр къезыхьакӀхэмрэ Израилым зэкӀэ инахьыжъ упчӀэжьэгъухэмрэ аритыгъ. 10Мосэ ахэм ариӀуагъ: «Илъэсибл тешӀэ къэс, чӀыфэхэр афэгъэгъунхэм иилъэс, Чэлхэм ямэфэкӀ тефэу, 11шъуи Зиусхьанэу Тхьэм Ежь къыхихыщт чӀыпӀэм Ащ ыпашъхьэ иуцонэу израил лъэпкъыр къызекӀуалӀэкӀэ, макъэр Ӏоу мы Хабзэм шъукъыщедж. 12Шъуи Зиусхьанэу Тхьэм зэредэӀунхэм, щыщынэнхэу зызэрагъэсэным, мы Хабзэм итхагъэр зэкӀэ егугъухэзэ зэрагъэцэкӀэным пае, цӀыфхэр зэкӀэ – хъулъфыгъи, бзылъфыгъи, сабыйхэри, хымэ цӀыф лъэпкъмэ ащыщэу шъуикъалэмэ адэсхэри къызэӀужъугъакӀэх. 13Ахэм якӀалэу Тхьэм мы и Хабзэ зымышӀэхэри ащ ерэдэӀух, шъуиунэеным пае шъуубытынэу Иордан шъузыфызэпырыкӀырэ чӀыгум шъущэпсэуфэ, щынагъо фыряӀэу шъуи Зиусхьанэу Тхьэр агъэлъэпӀэныр зэрагъэшӀэн фае».
Зиусхьаным Мосэ аужырэу зыщигъэгъозагъэхэр
14Зиусхьаным Мосэ къыриӀуагъ: «УзщылӀэщт мафэр къэсы пэт. Ехъошуа къеджи, чэтэнгъэӀэгъэ лъапӀэм дэжь шъукъэуцуи, Сэ ар о пчӀыпӀэ зэряпэщэнэу сыкъеушъыищт». Мосэрэ Ехъошуарэ къакӀохи, чэтэнгъэӀэгъэ лъапӀэм дэжь къэуцугъэх. 15Джащ дэжьым Зиусхьаныр пкъэу теплъэ зиӀэ ошъуапщэм хэтэу къакӀуи, чэтэнгъэӀэгъэ лъапӀэм дэжь къыщылъэгъуагъ. Ошъуапщэр ащ ичӀэхьапӀэ къышъхьащыуцуагъ. 16Зиусхьаным Мосэ къыриӀуагъ: «О шӀэхэу уятэжъхэм адэжь бгъэзэжьыщт, мыдрэ цӀыф лъэпкъыр зэрыхьащт чӀыгум инэмыкӀ тхьэхэм алъежьэнышъ, пцӀэпӀагъэхэм заритыщт. Ащ Сэ сыкъыбгынэщт, Сэ ащ дэсшӀыгъэ зэзэгъыныгъэр ыукъощт. 17А мафэм Сэ сыгубжынышъ, ар къэсыбгынэщт; Сынэгуи ащ шӀозгъэбылъыщт, джаущтэу ар хымэхэм якӀодылӀэщт. ТхьамыкӀэгъуабэрэ къиныбэрэ къыфэкӀощт, джащ дэжьым ахэм зэраӀожьыщт: „Ти Тхьэ зэрэтимыгъусэм паеп шъуӀуа мы тхьамыкӀагъохэр къызыкӀытфэкӀуагъэхэр“. 18НэмыкӀ тхьэхэм ауж итэу нэпэнчъагъэу зэрэзекӀощтым пае а мафэм Ӏо хэмылъэу Сынэгу ащ шӀозгъэбылъыщт. 19Мы орэдыр шъутхыба. Израил цӀыфхэм а орэдыр ягъашӀ, къаӀозэ арэшӀ ар ахэм, ежьхэр ыгъэмысэхэу Сэщ пае шыхьат ар хъущт. 20Ятэжъхэм гущыӀэ пытэ къызыфадэсшӀыгъэ чӀыгоу щэмрэ шъоумрэ зыщычъэхэрэм ахэр Сэ исщэщт. Афикъунэу ашхын агъотэу, яшӀугъо зыхъухэкӀэ, Сэ сыщагъэзыенышъ, нэмыкӀ тхьэхэм ауж ихьанхэшъ, ахэм афэлэжьэщтых, Сэ къыздашӀыгъэ зэзэгъыныгъэр аукъощт. 21ЕтӀанэ тхьамыкӀэгъуабэхэмрэ къиныгъохэмрэ къызафакӀокӀэ, мы орэдым ахэр ыгъэмысэщтых – къахэкӀыщтхэм ар ащыгъупшэщтэп ныӀа! Ӏогъэ пытэкӀэ къызфэзгъэгугъэгъэхэ чӀыгум джыри исымыщагъэхэзи, ахэм джыдэдэм агу илъыр зыфэдэр Сэ сэшӀэ». 22А мафэм Мосэ орэдыр ытхи израил цӀыфхэм аригъэшӀагъ.
23Зиусхьаным Ныун ыкъо Ехъошуа пшъэрылъ къыфишӀыгъ: «Пытагъэрэ теубытагъэрэ зыхэгъэлъ. Шъуятэжъхэм къястынэу Сэ гущыӀэ пытэ зыфэсшӀыгъэ чӀыгум израил цӀыфхэр изыщэщтхэр оры, Сэри о сыуигъусэщт». 24Мосэ Тхьэм мы и Хабзэ зэрэщытэу, иублапӀэ щегъэжьагъэу зыщиухыжьыхэрэм нэс, тхылъыпӀэ зэтегъэчэрэгъуагъэм зытыретхэм, 25Зиусхьаным дашӀыгъэ зэзэгъыныгъэр зытет мыжъобгъуитӀур зыдэлъ пхъонтэрыр къезыхьакӀырэ лэуйхэм унашъо афишӀыгъ: 26«Тхьэм и Хабзэ зытетхэгъэ мы тхылъыпӀэ зэтегъэчэрэгъуагъэр шъушти, шъуи Зиусхьанэу Тхьэм изэзэгъыныгъэ зыдэлъ пхъонтэрым гуашъулъхь. Ар шъуимысагъэ ишыхьатэу ащ дэжьым щэрэлъ. 27Шъо шъугухэр зэрэзэшӀодзагъэри шъузэрэкъаигъэри сэ сэшӀэба. Сэ сыпсэоу сышъухэт пэтзэ, Зиусхьаным шъуедэӀурэп. Сыда ащыгъум сызылӀэкӀэ хъущтыр? 28ШъуилӀакъомэ зэкӀэ япащэхэмрэ шъуинахьыжъ упчӀэжьэгъухэмрэ мы гущыӀэхэр зэхахэу къясӀощтышъ, ахэр зэрагъэмысэнхэу уашъомрэ чӀыгумрэ зафэзгъэзэщтышъ, зэкӀэ садэжь къыщызэӀужъугъакӀ. 29СызылӀэкӀэ шъузэрэзэӀыхьэпэщтри шъузтетын фаеу къышъосӀогъэ гъогум шъузэрэтекӀыщтри сэ сэшӀэба. Зиусхьаным ыпашъхьэ емыкӀушхохэр щышъушӀэщтхэшъ, шъуизекӀуакӀэхэмкӀи Ар жъугъэгубжыщтышъ, тапэкӀэ тхьамыкӀагъо къышъуфэкӀощт».
30Джаущтэу Мосэ а орэдыр къыригъажьи, зэрэизраил лъэпкъэу зэхихэу къеухыфэ къыӀуагъ.
Currently Selected:
Хэбзэ тхыжьыгъэр 31: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
