Хэбзэ тхыжьыгъэр 27
27
КъэнаӀаным зэрихьащтхэм пылъ унашъохэр
(я 27:1-рэ – я 28:68-рэ шъхьэхэр)
ЯтӀокӀэнэрэ блырэ шъхьэр
Тхьэм ихабзэхэу мыжъобгъумэ атетхагъэхэр
1Мосэ Израилым инахьыжъ упчӀэжьэгъухэр игъусэхэу цӀыфмэ унашъо афишӀыгъ: «Непэ унашъоу къышъуфэсшӀыхэрэр зэкӀэ жъугъэцакӀэ. 2Иордан псыхъом шъузэпырыкӀэу, шъуи Зиусхьанэу Тхьэм шъуиунэенэу къышъуитырэ чӀыгум шъузихьэкӀэ, мыжъошхохэр жъугъэуцуи, етӀэфкӀэ жъугъэлэжьых. 3Шъуи Зиусхьанэу Тхьэм шъуиунэенэу къышъуитырэ чӀыгум, щэмрэ шъоумрэ зыщычъэхэрэ чӀыгоу, шъуятэжъмэ я Зиусхьанэу Тхьэм шъукъызэригъэгугъагъэм шъуихьаным пае, Иордан шъузызэпырыкӀыкӀэ, Тхьэм мы и Хабзэ зэкӀэ игущыӀэхэр ахэм атешъутх. 4Иордан шъузэпырыкӀэу, непэ сэ къызэрэшъосӀуагъэм фэдэу, а мыжъохэр Ӏэбал къушъхьэм зытежъугъэуцохэкӀэ, етӀэф ащышъуфэжь. 5Шъуи Зиусхьанэу Тхьэм пае къурмэншӀыпӀэ мыжъохэм ахэшъушӀыкӀ. Мыжъохэр гъучӀым хэшӀыкӀыгъэ Ӏэмэ-псымэхэмкӀэ шъумыуӀучӀых. 6Шъуи Зиусхьанэу Тхьэм пае къурмэншӀыпӀэ мыжъо мыуӀучӀыгъэхэм ахэшъушӀыкӀи, шъуи Зиусхьанэу Тхьэм пае къурмэнгъэстхэр ащ щышъушӀ. 7Мамыр къурмэнхэр ащ щышъушӀ, шъуи Зиусхьанэу Тхьэм ыпашъхьэ ахэр щышъушх, шъущычэф. 8Мыжъоу жъугъэуцущтмэ Тхьэм мы и Хабзэ игущыӀэхэр зэкӀэ къихыгъошӀоуи зэхэугуфыкӀыгъошӀоуи атешъутх».
9ЕтӀанэ Мосэ лэуйхэм ащыщ къурмэнышӀхэр игъусэхэу зэрэизраил лъэпкъэу ариӀуагъ: «Израилыр, зыпари умыӀоу моу къэдаӀу! Уи Зиусхьанэу Тхьэм илъэпкъ джы ухъугъ. 10Уи Зиусхьанэу Тхьэм едэӀу, Ащ ихабзэхэу, ишэпхъэ гъэунэфыгъэхэу непэ узыфэзгъасэхэрэр зэкӀэ гъэцакӀэ».
МыдаӀохэрэм къащышӀыщтыр
11А мэфэ дэдэм Мосэ цӀыфхэм унашъо афишӀыгъ: 12«Иордан шъузызэпырыкӀыкӀэ, Гъэрызым къушъхьэм тетхэу цӀыфхэм шӀу къадэхъунэу Зиусхьаным елъэӀущтхэр ЩымӀон, Лэуй, Ехъуд, Иссашхар, Юсыф, Бинямин ялӀакъохэр ары. 13Рубэн, Гъад, Ащэр, Зэбулун, Дан, Нафталый ялӀакъохэр Ӏэбал къушъхьэм дэкӀоенхэшъ, бгыбзэхэр къаӀощт. 14Лэуйхэм зэрэ Израилэу зэхихэу мэкъэ ӀэтыгъэкӀэ къаӀощт:
15„Къытерэф бгыбзэр Зиусхьаным шӀоемыкӀушхо тхьэ сурэтыр мыжъом, пхъэм е гъучӀ горэм ахэзышӀыкӀэу, ӀэшӀагъэ зиӀэм ышӀыгъэр чӀыпӀэ шъэф щызыгъэуцурэм“.
Зэрэлъэпкъэу къызэдерэӀу: „Амин!“#27:15 Ижъырэ джуртыбзэкӀэ мы гущыӀэм къикӀырэр: «Орэхъу!»
16„Къытерэф бгыбзэр ятэ е янэ анапэ тезыхырэм!“
Зэрэлъэпкъэу къызэдерэӀу: „Амин!“
17„Къытерэф бгыбзэр илъэпкъэгъу ичӀыгу гъунапкъэ телъ мыжъор лъызыгъэкӀуатэрэм!“
Зэрэлъэпкъэу къызэдерэӀу: „Амин!“
18„Къытерэф бгыбзэр нэшъум гъогур тэрэзэу езымыгъэлъэгъурэм!“
Зэрэлъэпкъэу къызэдерэӀу: „Амин!“
19„Къытерэф бгыбзэр хымэ лъэпкъ щыщым, ибэм, шъузабэм яфитыныгъэхэр зыукъорэм!“
Зэрэлъэпкъэу къызэдерэӀу: „Амин!“
20„Къытерэф бгыбзэр ятэ ишъуз гогъуалъхьэу, ятэ ынапэ тезыхырэм!“
Зэрэлъэпкъэу къызэдерэӀу: „Амин!“
21„Къытерэф бгыбзэр хьайуаным гуахьэрэм!“
Зэрэлъэпкъэу къызэдерэӀу: „Амин!“
22„Къытерэф бгыбзэр ятэкӀэ е янэкӀэ ышыпхъу гуахьэрэм!“
Зэрэлъэпкъэу къызэдерэӀу: „Амин!“
23„Къытерэф бгыбзэр ишӀугуащэ гуахьэрэм!“
Зэрэлъэпкъэу къызэдерэӀу: „Амин!“
24„Къытерэф бгыбзэр нэмыкӀ цӀыфыр шъэфэу зыукӀырэм!“
Зэрэлъэпкъэу къызэдерэӀу: „Амин!“
25„Къытерэф бгыбзэр лажьэ зимыӀэр ыукӀынэу, лъыр ыгъэчъэнэу къуалъхьэ къаӀызыхырэм!“
Зэрэлъэпкъэу къызэдерэӀу: „Амин!“
26„Къытерэф бгыбзэр мы хабзэм къыӀорэр зымыгъэцакӀэу, ар зыукъорэм!“
Зэрэлъэпкъэу къызэдерэӀу: „Амин!“»
Currently Selected:
Хэбзэ тхыжьыгъэр 27: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
