Хэбзэ тхыжьыгъэр 26

ЯтӀокӀэнэрэ хырэ шъхьэр

Лэжьыгъэхэм ащыщ апэрэ Ӏахьэхэр

1Мосэ лъэпкъым риӀуагъ: «Уи Зиусхьанэу Тхьэм уиунэенэу къыуитырэ чӀыгур уубытэу, ащ узитӀысхьэкӀэ, 2уи Зиусхьанэу Тхьэм уиунэенэу къыуитырэ чӀыгум зэкӀэ щыулэжьыгъэхэм яапэрэ Ӏахьэхэр матэм илъхьэхи, уи Зиусхьанэу Тхьэм Ежь ЫцӀэ зэпхыгъэнэу къыхихыщт чӀыпӀэм кӀо. 3А уахътэм къурмэнышӀэу уиӀэщтым еӀу: „Узыфэлэжьэрэ Зиусхьанэу Тхьэм тятэжъхэм къаритынэу гущыӀэ пытэ зыфишӀыгъэ чӀыгум сыкъызэрэсыгъэр сыфэразэу Тхьэм ыпашъхьэ непэ къыщэсэӀожьы“. 4КъурмэнышӀым матэр пӀихынышъ, уи Зиусхьанэу Тхьэм икъурмэншӀыпӀэ ыпашъхьэ ригъэуцощт. 5О уи Зиусхьанэу Тхьэм ыпашъхьэ уитэу къаӀо: „Тятэжъ пӀашъэр кощырыпсэу арамэу щытыгъ. ЦӀыфыбэ мыхъурэ куп игъусэу Мысырым кӀуи, кощырыпсэоу исыгъ. Ащ цӀыф лъэпкъышхо, лъэпкъ кӀочӀэшхо, пчъагъэмкӀэ бэ хъоу къыщыхэкӀыгъ. 6Ау мысырхэр тэ къытфэдэигъэх, тагъэпщылӀыгъ, ткӀуачӀэ къымыхьырэ Ӏофыр егъэзыгъэкӀэ тагъашӀэщтыгъ. 7Арти тятэжъхэм я Зиусхьанэу Тхьэм куо мэкъэшхокӀэ телъэӀуи, Ащ тыкъызэхихыгъ, титхьамыкӀагъи, ткӀуачӀэ къымыхьырэ ӀофшӀэным тызэрэпылъри, тызэрэегъэзыгъэри къылъэгъугъэх. 8Зиусхьаным гъунэ зимыӀэ илъэшыгъэрэ ыкӀуачӀэрэкӀэ, гуих тхьамыкӀэгъошхокӀэ, гъэунэфыпӀэхэмкӀэ, шӀэгъошӀагъэхэмкӀэ Мысырым тыкъырищыжьыгъ. 9Ащ мыщ тыкъыщагъ, щэмрэ шъоумрэ зыщычъэхэрэ мы чӀыгур къытитыгъ. 10Джы мары, ти Зиусхьан, О къысэптыгъэ чӀыгум къытесхыгъэ апэрэ лэжьыгъэхэр къыпфэсхьыгъэх“. Уи Зиусхьанэу Тхьэм ыпашъхьэ матэр игъэуцуи, Ащ шъхьащэ фэшӀ. 11Уи Зиусхьанэу Тхьэм зэкӀэ шӀоу къышъуфишӀагъэмэ шъуакӀэгушӀузэ, ори уиунагъуи, лэуйхэри, хымэ цӀыф лъэпкъмэ ащыщэу къышъухэсхэри зэрэшъуигъусэхэу, шъучэф.

12Лэуйхэу, хымэ цӀыф лъэпкъмэ ащыщхэу, ибэу, шъузабэу уикъалэ дэсхэм афикъун шхын зэряӀэнэу, ящэнэрэ илъэсым, зэкӀэ лэжьыгъэу къэпхьыжьыгъэхэм япшӀэнэрэ Ӏахьэхэр зыщыхаушъхьафыкӀхэрэ илъэсым, ахэр зяптыкӀэ, 13уи Зиусхьанэу Тхьэм еӀу: „О унашъо къызэрэтфэпшӀыгъэу, Ӏахьэ лъапӀэр сиунэ къисхи лэуйхэм, хымэ цӀыф лъэпкъмэ ащыщхэм, ибэмэ, шъузабэмэ ястыгъ. О уиунашъохэр сыукъуагъэхэп, ахэм ащыщ гори зыщызгъэгъупшагъэп. 14Сынэшхъэеу Ӏахьэ лъапӀэм щыщ зыпари сшхыгъэп, сымыкъабзэу ащ щыщ горэми сынэсыгъэп, щымыӀэжьмэ апаи ястыгъэп. Си Зиусхьанэу Тхьэм седэӀугъ, О уиунашъохэр зэкӀэ згъэцэкӀагъэ. 15УипсэупӀэ лъапӀэу уашъом къеплъыхи, къахэпхыгъэ О уилъэпкъэу Израили, тятэжъхэм гущыӀэ пытэ къызэрадэпшӀыгъагъэу, тиунэенэу къытэптыгъэ чӀыгоу щэмрэ шъоумрэ зыщычъэхэрэми унэшӀу къащыф“».

Зиусхьаным ихабзэхэм ягъэцэкӀэн

16Мосэ джыри ариӀуагъ: «Шъуи Зиусхьанэу Тхьэм а шапхъэхэмрэ хэбзэ гъэунэфыгъэхэмрэ дэх имыӀэу шъугухэмрэ шъупсэхэмрэкӀэ шъуафэшъыпкъэу жъугъэцэкӀэнэу непэ унашъо къышъуфешӀы. 17Зиусхьаныр – Ар шъо зэрэшъуи Тхьэр, Ащ игъогухэм шъузэратетыщтыр, ишапхъэхэр, иунашъохэр, ихэбзэ гъэунэфыгъэхэр зэрэжъугъэцэкӀэщтхэр, Ащ шъузэредэӀущтыр непэ къэшъуӀуагъ. 18Ежь игъэгугъэныгъэкӀэ, шъо Ащ дунаим тет адрэ цӀыф лъэпкъ пстэуми Ежь иунэе Ӏахьэ лъапӀэу шъущытынэу, шъурилъэпкъынэу шъукъызэрахихыгъэри иунашъохэр зэкӀэ зэрэжъугъэцэкӀэн фаери Зиусхьаным джы къышъуиӀуагъ. 19Ащ къыгъэшӀыгъэ цӀыф лъэпкъ пстэуми шъукъызэрахиӀэтыкӀыщтри, шъуцӀэ дахэкӀэ зэраригъэӀощтри, щытхъуи, лъытэныгъи зэрэшъуигъэгъотыщтри, Ежь шъукъызэригъэгугъагъэуи шъуи Зиусхьанэу Тхьэм илъэпкъ лъапӀэу шъузэрэщытыщтри къыӀуагъэх».

Currently Selected:

Хэбзэ тхыжьыгъэр 26: АдыТГ

Highlight

Copy