Хэбзэ тхыжьыгъэр 23

ЯтӀокӀэнэрэ щырэ шъхьэр

Тхьэм ыцӀэкӀэ къызэӀукӀэхэрэм ахахьэ мыхъущтхэр

1Мосэ цӀыфхэм ариӀуагъ: «ЗиукӀытапӀэ щытӀагъэу е пыупкӀыгъэу щыт хъулъфыгъэр Тхьэм ыцӀэкӀэ къызэӀукӀэрэ израил цӀыфхэм ахахьэ хъущтэп. 2Хэбзэнчъэу къэхъугъэри ащ къыхэкӀыгъэхэри япшӀэнэрэ лӀэужым нэс Тхьэм ыцӀэкӀэ къызэӀукӀэрэ израил цӀыфхэм ахахьэхэ хъущтэп. 3Ӏамон е моабхэм цӀыфмэ ащыщхэри ахэм къахэкӀыгъэхэри япшӀэнэрэ лӀэужым нэс Тхьэм ыцӀэкӀэ къызэӀукӀэрэ израил цӀыфхэм ныбжьи ахахьэхэ хъущтэп. 4Шъо гъогум шъутет зэхъум ахэм гъомлапхъи пси къышъупагъохыгъагъэхэп ныӀа! ЕтӀани Мэсэпэтамым итемыр-тыгъэ къохьэпӀэ лъэныкъокӀэ щыӀэ Пэтор къалэм щыщэу БэӀор ыкъо БэлыӀам къышъуагъэбгынэу ахэм къащэгъагъэба! 5Ау шъуи Зиусхьанэу Тхьэр БэлыӀам едэӀугъэп, шъощ пае бгыбзэр нэшӀущыфэныгъэу ышӀыжьыгъ, сыда пӀомэ шъуи Зиусхьанэу Тхьэм шӀу шъуелъэгъу. 6Арышъ, шъущэӀэфэ ахэм мамырырэ шӀугъэрэ зыхагъотэн зыпари ныбжьи афэшъумышӀ. 7Ау едом цӀыфыр щышъумыгъэзый, ар шъуилъэпкъэгъуба! Ихэгъэгу шъуисыгъэшъ, мысыр цӀыфри щышъумыгъэзый. 8Мы лъэпкъхэм ящэнэрэ лӀэужым къахэкӀыщтхэр Тхьэм ыцӀэкӀэ къызэӀукӀэрэ израил цӀыфхэм ахэхьанхэ алъэкӀыщт.

ДзэуцупӀэм игъэкъэбзэн

9Пыим шъуезэонэу шъузыкӀокӀэ, хабзэмкӀэ мыкъэбзэ пстэуми защышъуухъум. 10Шъуащыщ хъулъфыгъэ горэ чэщым къехъулӀагъэм къыхэкӀэу мыкъабзэ хъугъэмэ, дзэуцупӀэм дэрэкӀ. Ар дзэуцупӀэм къыдэхьажь хъущтэп. 11Ау пчыхьэ зэрэхъоу зерэгъэпскӀи, тыгъэр зыкъохьажькӀэ къерэгъэзэжь. 12ДзэуцупӀэм дэдзыгъэу, щагу шъущикӀынэу чӀыпӀэ шъуиӀэн фае. 13Хэти щагу икӀынэу зыщетӀысэхырэм машэ щитӀынышъ, щэуакӀор рычӀиухъумэжьынэу къазгъыр цӀыкӀу зыдерэӀыгъ. 14Шъуи Зиусхьанэу Тхьэм шъукъиухъумэнэу, пыйхэри шъуӀэ къырилъхьанхэу къышъухэтыба. Ащ емыкӀу къышъухимылъэгъоными ыкӀыб къышъуфимыгъэзэными пае, шъуидзэуцупӀэ зэрэлъэпӀэнэу ар къэбзэн фае».

Хэхьажьыгъэ пщылӀхэр

15Мосэ етӀани къыӀуагъ: «ПщылӀыр нэмыкӀ хэгъэгу къикӀыжьи, зиунаем къыӀэпыкӀыжьыгъэу шъхьэегъэзыпӀэкӀэ къызышъокӀужькӀэ, ар зием ешъумытыжь. 16Ар къышъухэрэс, шъуикъалэмэ ащыщэу ежь зыфаеу къыхихыгъэм щэрэпсэу. Ар ешъумыгъэз.

ХэтэкӀонымкӀэ тхьэнэпцӀыхэм уафэлажьэ зэрэмыхъущтыр

17ХэтэкӀонымкӀэ тхьэнэпцӀыхэм афэлэжьэрэ бзылъфыгъэхэмрэ хъулъфыгъэхэмрэ израил цӀыфхэм ахэтыхэ хъущтэп. 18Бзылъфыгъэ, хъулъфыгъэ#23:18 Ижъырэ джуртыбзэкӀэ тхыгъэ Ӏэпэрытхым зэрэхэтыр: «хьэ». хэтакӀохэм къышъуатыжьырэ ахъщэр тхьэлъанэ горэхэм апае шъуи Зиусхьанэу Тхьэм и Унэ шъумыхьы. Шъуи Зиусхьанэу Тхьэм а тӀури игущыкӀыгъох.

Ӏахьэтедзэ зиӀэ чӀыфэхэр

19Ӏахьэтедзэ яӀэу къыуитыжьынэу ахъщи, гъомлапхъи е нэмыкӀ гори уилъэпкъэгъу чӀыфэу емыт. 20Шъуиунэенэу шъуубытыщт чӀыгум шъуи Зиусхьанэу Тхьэм шъушӀэрэ пстэумкӀи ынэшӀу къыщыщъущифэным пае, Ӏахьэтедзэ зиӀэ чӀыфэр уилъэпкъэгъу израил цӀыфым емыт, ау хымэ лъэпкъ щыщым ар ет.

21Уи Зиусхьанэу Тхьэм тхьэлъанэ дэпшӀыгъэмэ, умыгъэгужъоу ар гъэцэкӀэжь, уи Зиусхьанэу Тхьэр ар зэрэбгъэцэкӀэжьыным Ӏо хэмылъэу къыкӀэдэощт, ори псэкӀод пшӀагъэу хъущт. 22Тхьэлъанэ умышӀыгъэмэ, псэкӀодышӀагъэ уиӀэу хъущтэп. 23Тхьэлъанэу пшӀыгъэхэр, уи Зиусхьанэу Тхьэр о пшӀоигъоу зэрэбгъэгугъагъэхэр Ӏо хэмылъэу бгъэцэкӀэжьынхэ фае. 24Зыгорэм исэнэшъхьэшӀапӀэ ухахьэмэ, ащ къыпыкӀагъэр зыогъэшхэкӀыфэ къыщыпшх хъущт, ау уиматэ зыпари къимылъхь. 25Зыгорэм ихьасэ ухахьэмэ, лэжьыгъашъхьэхэр къыщыуугъойхэ хъущт, ау гъупчъэкӀэ ащ ухэмыӀ».

Currently Selected:

Хэбзэ тхыжьыгъэр 23: АдыТГ

Highlight

Copy