Хэбзэ тхыжьыгъэр 19

ЯпшӀыкӀубгъонэрэ шъхьэр

ЗыкъэухъумэжьыпӀэ къалэхэр

1Мосэ цӀыфхэм джыри ариӀуагъ: «Шъуи Зиусхьанэу Тхьэм шъуиунэенэу зичӀыгухэр шъуубытырэ цӀыф лъэпкъхэр ыгъэкӀодэу, ахэр шъо ишъуфыхэу якъалэхэмрэ яунэхэмрэ псэупӀэ зышъушӀыкӀэ, 2шъуи Зиусхьанэу Тхьэм шъуиунэенэу къышъуитырэ чӀыгум къэлищ щыжъугъэнаф. 3Ахэм яуалӀэу гъогухэр#19:3 Ижъырэ джуртыбзэкӀэ тхыгъэ Ӏэпэрытхым мыщ дэжьым мэхьанэу щыриӀэн ылъэкӀыщт: «язэпэчыжьагъэ къэшъуши». жъугъэпси, хэти цӀыф зыукӀыгъэр якӀужьын ылъэкӀынэу, шъуи Зиусхьанэу Тхьэм шъуиунэенэу шъуӀэ къырилъхьэрэ чӀыгур шъолъырищэу зэтешъуут.

4ЦӀыф зыукӀыгъэр зыкъыгъэнэжьынэу шъхьэегъэзыпӀэкӀэ а къалэмэ ащыщ екӀужьын зилъэкӀыщтыр ымышӀахэу ар ӀэкӀэукӀагъэмэ, ыукӀыгъэмрэ ежьырырэ ащ ыпэкӀэ зэпыйхэу щымытыгъэмэ ары. 5ЦӀыфым гъусэ иӀэу пхъэ къыхащынэу мэзым кӀуагъэхэу, чъыгыр къыриупкӀынэу обзэгъур къызеӀэтым, обзэгъушъхьэр къышӀози, игъусэ тефи ыукӀыгъэмэ, ар а къалэхэм ащыщ екӀужьынышъ, ищыӀэныгъэ къыгъэнэжьын ылъэкӀыщт. 6Армырмэ лъышӀэжьыр лъэшэу губжыгъэу ащ зыкӀэлъежьэкӀэ, гъогур зэрэкӀыхьэм къыхэкӀэу кӀахьэмэ, ыукӀын ылъэкӀынба. Ау ыукӀыгъэмрэ ежьырырэ ыпэкӀэ зэпыигъэхэпышъ, зыукӀыгъэм аджалыр тефэрэп. 7Джары а къэлищыр жъугъэнэфэнхэу унашъо къызкӀышъуфэсшӀырэр. 8Шъуи Зиусхьанэу Тхьэм тятэжъхэм гущыӀэ пытэ къызэрадишӀыгъэм тетэу шъуӀэ илъ чӀыгухэм къахигъахъоу, ахэр къызэригъэгугъэгъэхэ чӀыгур зэрэщытэу шъуиунэенэу шъуӀэ къызырилъхьэкӀэ, 9сэ джы къышъосӀорэ унашъохэр дэх имыӀэу жъугъэцакӀэхэу, шъуи Зиусхьанэу Тхьэр шӀу шъулъэгъоу, Ащ игъогухэм сыдигъуи шъуарыкӀомэ, – джащыгъум а къэлищым джыри къэлищ ахэжъугъахъу. 10Шъуи Зиусхьанэу Тхьэм шъуиунэенэу къышъуитырэ чӀыгум лъы хыер зэрэщамыгъэчъэнэуи лъэу агъэчъагъэр шъуилажьэ зэрэмыхъунэуи джаущтэу шъушӀы. 11Ау зыгорэм илъэпкъэгъу фэмылъэгъущтыгъэу ащ пэтӀыси, тебани, ыукӀи, етӀанэ а къалэхэм ащыщ екӀужьыгъэмэ, 12укӀакӀор зыщыпсэущтыгъэ къалэм инахьыжъ упчӀэжьэгъухэм ащ лъарэгъакӀохи, зыдэчъэжьыгъэ къалэм къырарэщыжь, укӀакӀор ыукӀыжьынэу лъышӀэжьым ар рарэтыжь. 13Ащ шъугу ешъумыгъэгъу! ТапэкӀэ шъуиӀофхэр зэкӀэ зэрэдэгъунэу лъы хыем игъэчъэн хэлъ псэкӀодыр Израилым ижъугъэкӀодыкӀыпэн фае.

ЧӀыгу гъунапкъэхэм узэрафэсакъыщтыр

14Шъуи Зиусхьанэу Тхьэм шъуиунэенэу къышъуитыгъэ чӀыгум шъуятэжъхэм щагъэуцугъэ пэсэрэ гъунапкъэхэр лъышъумыгъэкӀуатэх.

Шыхьатхэм яхьылӀагъ

15БзэджэшӀагъэ е мышӀапхъэ горэм пае агъэмысэрэ цӀыфыр зы нэбгырэ ишыхьаткӀэ хьыкум пшӀынэу щытэп. Гъэмысэным хабзэмкӀэ лъапсэ иӀэн зилъэкӀыщтыр нэбгыритӀу е щы шыхьатэу щыӀэмэ ары. 16Шыхьат нэпцӀым лажьэ зимыӀэр ыгъэмысэ зыхъукӀэ, 17тӀури Зиусхьаным къыхихыщт чӀыпӀэм къешъущалӀи къурмэнышӀхэу, хьыкумышӀхэу а уахътэм къышъухэтыщтхэм апашъхьэ ижъугъэуцох. 18ХьыкумышӀхэм Ӏофыр егугъупэхэзэ зэхафи, шыхьатым пцӀы ыусыгъэу, илъэпкъэгъу ымышӀагъэр тырилъхьагъэу къызычӀагъэщкӀэ, 19илъэпкъэгъу ришӀэнэу ыгу хэлъыгъэр ежьым ешъушӀэжь. Бзаджэр зыхэжъугъэкӀодыкӀын фае! 20Адрэхэм зэкӀэми ар зызэхахкӀэ, лъэшэу щынэнхэшъ, тапэкӀэ шъуащыщ горэми ащ фэдэ бзэджагъэ ышӀэжьыщтэп. 21Гуегъуныгъэр къызтешъумыгъакӀу: псэм пае псэ птын фае. Нэм пае нэ, цэм пае цэ, Ӏэм пае Ӏэ, лъакъом пае лъакъо».

Currently Selected:

Хэбзэ тхыжьыгъэр 19: АдыТГ

Highlight

Copy