Хэбзэ тхыжьыгъэр 11
11
ЯпшӀыкӀузэнэрэ шъхьэр
Тхьэм ишӀэгъошӀэгъэшхохэр агу къызэрагъэкӀыжьыгъэхэр
1Мосэ етӀани израил лъэпкъым риӀуагъ: «Уи Зиусхьанэу Тхьэр шӀу зэгъэлъэгъу, Ащ иунашъохэр, ишапхъэхэр, ихэбзэ гъэунэфыгъэхэр сыдигъуи гъэцакӀэх. 2Шъуи Зиусхьанэу Тхьэм илъэрыхьыгъи, илъэшыгъи, икӀочӀэшхуагъи шъугу ижъугъэлъ. Ащ иушъыйхэр зымыгъэунэфыгъэу, зымышӀэрэ шъуикӀалэхэр арэп сэ засӀорэр. 3Ащ Мысырым, пачъыхьэ фирхьауными ихэгъэгуи зэрэщытэу гъэунэфыпӀэу, шӀэгъошӀагъэу, 4мысыр дзэми, ащ ишыхэми, ику псынкӀэхэми аришӀагъэхэр, тауж итхэу къачъэхэ зэхъум, ахэр хы Къамылым зэрэщычӀыригъэхьагъэхэр, Зиусхьаным ахэр зэригъэкӀодыгъэхэр, 5мы чӀыпӀэм шъукъэмысыфэ, шъоф нэкӀым шъо къыщышъуфишӀагъэхэр зыщышъумыгъэгъупш. 6Джащ фэдэу шъулъэгъугъэ Ащ рубэн лӀакъом къыхэкӀыгъэ Елыаб ыкъохэу Датанрэ Абирамрэ аришӀагъэр, ахэм ячэтэнгъэӀагъэхэр зыдэщыт чӀыпӀэм чӀыгур къыщызэгози, яунагъомэ арысхэри, ящэтырхэри, аӀэ илъыгъэ псэ зыпыт пстэоу ягъусагъэхэри ащ зэрэдэфагъэхэр. 7Зиусхьаным ишӀэгъошӀэгъэшхохэр шъо шъунитӀукӀэ шъулъэгъугъэ.
Тхьэм израил цӀыфхэм яунэещт чӀыгум шӀоу фиӀуагъэхэр
8Арышъ, непэ шъузфэзгъэсэрэ унашъохэр зэкӀэ жъугъэцакӀэ, шъукӀочӀэшхоным, шъузэрыхьащт чӀыгур шъуиунае зэрэхъуным, 9тятэжъхэм къаритынэу Зиусхьаным гущыӀэ пытэ зыфишӀыгъэ чӀыгоу щэмрэ шъоумрэ зыщычъэхэрэм бэрэ шъузэрэщыпсэуным пае. 10Шъузэрыхьащт чӀыгоу шъуиунае хъущтыр Мысырым ичӀыгоу шъукъызэрыкӀыжьыгъэм, чылапхъэхэр зыхашъулъхьэщтыгъэм, хатэмэ афэдэу, къин шъулъэгъузэ, псыр зытешъукӀэзэ,#11:10 Ижъырэ джуртыбзэкӀэ тхыгъэ Ӏэпэрытхым зэрэхэтыр: «лъакъохэмкӀэ». жъулэжьыщтыгъэм фэдэп. 11Шъузэрыхьащт чӀыгоу шъуиунае хъущтыр – ар къушъхьэхэр зэрытэу, кӀэйхэр зыдэщыӀэ, ощхымэ агъэшъокӀырэ чӀыгоу щыт. 12Ар шъуи Зиусхьанэу Тхьэр зыфэгумэкӀэу, илъэс реным ынаӀэ зытыригъэтырэ чӀыгоу щыт. 13Непэ Ащ къышӀырэ унашъохэр#11:13 Ижъырэ джуртыбзэкӀэ тхыгъэ Ӏэпэрытхым зэрэхэтыр: «Сэ къэсшӀырэ унашъохэр». жъугъэцакӀэхэу, шъуи Зиусхьанэу Тхьэр шъугурэ шъупсэрэкӀэ шъуфэщагъэу шъуфэлажьэмэ, 14лэжьыгъи, сэнашъхьи, зэйтын дагъи зэрэшъуиӀэнхэу, шъуичӀыгу ищыкӀэгъэщт ощхыр бжыхьэми гъатхэми игъом Ащ къыригъэщхыщт. 15Шъуибылымхэм апае хъупӀэшӀухэр къышъуитыщт, джаущтэу шъушхыщтыр хъоеу зэжъугъотылӀэжьыщт. 16Ау нэмыкӀ тхьэхэм шъхьащэ афэшъушӀынэу шъугухэм шъузэрамыгъэгъощэным, шъузэрэдэмыхыным шъуфэсакъ. 17Джащыгъум Зиусхьаныр лъэшэу къышъуфэгубжынышъ, уашъор зэфишӀыщт, ощхи къещхыжьыщтэп, чӀыгуми лэжьыгъэ къытыжьыщтэп, шъори Зиусхьаным къышъуитырэ чӀыгушӀум псынкӀэу шъутыригъэкӀодыкӀыпэщт.
18Тхьэм къышъуеӀо: „КъышъуфэсшӀырэ Сиунашъохэр шъугуи шъушъхьи арыжъугъэлъ, ахэр гукъэгъэкӀыжь тамыгъэхэу шъуӀэхэми шъунатӀэхэми атежъугъэт. 19Ахэр шъуикӀалэхэм яжъугъашӀ. Унэм шъуисми, гъогум шъутетми, шъузыгъолъыжьрэми, шъукъызытэджыжьрэми ахэр агурыжъугъаӀу. 20Шъуиунэ пчъэблыпкъхэми шъуикъэлэ дэхьапӀэмэ ахэлъ къэлапчъэхэми ахэр атешъутх“. 21Джащыгъум шъуятэжъхэм къаритынэу Зиусхьаным гущыӀэ пытэ зыфишӀыгъэ чӀыгум шъори шъуилъфыгъэхэми уашъор чӀыгум шъхьащэтыфэ шъущыпсэущт. 22ЖъугъэцэкӀэн фэе унашъоу зэкӀэ къышъуасӀохэрэм шъуатемыкӀмэ, шъуи Зиусхьанэу Тхьэр шӀу шъулъэгъоу, Ащ игъогухэм шъуарыкӀоу, Ащ шъуфэшъыпкъэмэ, 23Зиусхьаным шъощ нахьыбэ хъоу, шъощ нахь лъэшэу щыт цӀыф лъэпкъхэр шъуинэрылъэгъоу шъукӀэлъырифынхэшъ, ахэм ячӀыгу къышъуитыщт. 24ШъулъэкӀэ шъузынэсыщт сыдрэ чӀыгуи шъуӀэ къижъугъэхьащт: шъуичӀыгу пшэхъолъэ шъоф нэкӀым щегъэжьагъэу Ливан нэс, Ефрат псыхъом щегъэжьагъэу Средиземнэ хым#11:24 Ижъырэ джуртыбзэкӀэ тхыгъэ Ӏэпэрытхым зэрэхэтыр: «Тыгъэ къохьапӀэмкӀэ щыӀэ хым». нэс зэлъиубытыщт. 25Зыгори къышъупэуцужьын ылъэкӀыщтэп. Шъуи Зиусхьанэу Тхьэм шъукъызэригъэгугъагъэу сыдрэ чӀыпӀэу зэпышъучырэми щынэгъошхо къыщышъуфыряӀэуи къыщышъущыщтэхэуи ышӀыщт».
Тхьэм инэшӀущыфэныгъэхэмрэ ибгыбзэхэмрэ
26Мосэ къыӀуагъ: «Арышъ, шъуфэсакъ, непэ нэшӀущыфэныгъэхэмрэ бгыбзэхэмрэ шъуахэдэнэу фит шъусэшӀы. 27Шъуи Зиусхьанэу Тхьэм иунашъохэу непэ къышъосӀуагъэхэр жъугъэцакӀэмэ, нэшӀущыфэныгъэхэр къыжъудэхъущт. 28Шъуи Зиусхьанэу Тхьэм иунашъохэр шъумыгъэцакӀэмэ, сэ къышъуфэзгъэнэфэгъэ гъогум шъутекӀэу, ыпэкӀэ шъумышӀэщтыгъэ тхьэнэпцӀыхэм зызафэжъугъазэкӀэ, бгыбзэхэр къышъутефэщт. 29Шъуи Зиусхьанэу Тхьэм шъуиунае хъущт чӀыгум шъуубытынэу шъузырищэкӀэ, джащ Гъэрызым къушъхьэм нэшӀущыфэныгъэ фаӀохэр къыщышъуӀощт, Ӏэбал къушъхьэм бгыбзэхэр къыщышъуӀощт. 30Шъузэрэщыгъуазэу, а къушъхьэхэр Иордан зэпырыдзыгъэх, гъогум итыгъэ къохьапӀэкӀэ, Морэ ыцӀэкӀэ зэджэгъэхэ чъыгаем#11:30 Ижъырэ джуртыбзэкӀэ тхыгъэ Ӏэпэрытхым мэхьанэр щынафэп. пэблагъэх. Ахэр Гъылгъал иӀэгъо-чӀыгъохэм апэгъунэгъу иордан шъоф нэкӀым щыпсэурэ къэнаӀанхэм ячӀыгу итых. 31Шъуи Зиусхьанэу Тхьэм шъуиунэенэу къышъуитырэ чӀыгум шъуихьанышъ, ар шъуубытынэу Иордан шъузэпырыкӀыщт. Ар шъуубытынышъ, шъущыпсэунэу ежъугъэжьэщт. 32Лъэшэу ащ шъузщыфэсакъыжь: непэ шъузфэзгъэсэгъэ шапхъэхэмрэ хэбзэ гъэунэфыгъэхэмрэ зэкӀэ пытэу жъугъэцакӀэ».
Currently Selected:
Хэбзэ тхыжьыгъэр 11: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
