ЯтӀонэрэ Самуел 1
1
Апэрэ шъхьэр
Саул зэрэщымыӀэжьым икъэбар Даут зэрэзэхихыгъэр
1Саул зызеукӀыжьым ыуж Даут Ӏамалэкъхэм атекӀуи, Цыкълагъ къыгъэзэжьи мэфитӀо дэсыгъ. 2Ящэнэрэ мафэм цӀыф горэ Саул идзэ зыщызаощтыгъэ чӀыпӀэм къикӀи къэкӀуагъ: ищыгъынхэр зэӀытхъыгъагъэх, ышъхьаци ятӀэр къыхэтэкъущтыгъэ. Даут дэжь ар къэси, ыпашъхьэ зыщыридзыхи, чӀыгум нэс шъхьащэ фишӀыгъ. 3Даут ащ еупчӀыгъ: «Тыда укъыздикӀырэр?» Адрэм къыриӀожьыгъ: «Израилым идзэ зыщызэорэ чӀыпӀэм сыкъечъыжьы». 4ЕтӀанэ Даут ащ еупчӀыгъ: «Сыда къэхъугъэр? КъысфэӀуат». Адрэм къыриӀожьыгъ: «ЗэуапӀэр къабгыни дзэкӀолӀхэр къечъэжьэжьыгъэх, хэкӀодагъэри къауӀагъэу лӀэжьыгъэри бэдэд, Саули ыкъо Ионэтани щыӀэжьхэп». 5Къэбарыр къыфэзыхьыгъэ кӀалэм Даут еупчӀыгъ: «Саули ащ ыкъо Ионэтани зэрэщымыӀэжьхэр сыдэущтэу пшӀэнэу хъугъа?» 6КӀалэм къыриӀожьыгъ: «ГъылбэуаӀ Ӏуашъхьэм сыдэкӀуае зэхъум, Саул пчыпыджыным зытыригъэкӀэгъагъ, зэоным фытегъэпсыхьэгъэ кухэу щэбзаохэр зэрытыгъэхэр ащ кӀахьэщтыгъэх. 7КъызызэплъэкӀым сыкъылъэгъугъэти, къысэджагъ. Арти есӀуагъ: „Мары сыкъэдаӀо“. 8Ар къысэупчӀыгъ: „Ухэт о?“ ЕсӀожьыгъ: „Сэ Ӏамалэкъмэ сащыщ“. 9ЕтӀанэ ащ къысиӀуагъ: „Сиакъыл сыщымыозэ, къысэкӀуалӀи сыукӀ, сыда пӀомэ спсэ джыри хэтыщт“. 10Арти секӀуалӀи сыукӀыжьыгъэ, сыда пӀомэ къызытекӀохэм ыуж зэрэщымыӀэжьышъущтыр къызгурыӀуагъ. Танджэу шъхьащысыгъэмрэ ыӀапшъэ илъыгъэ Ӏэхъумрэ къыпысхыжьхи сизиусхьан къыфэсхьыгъэх».
11Ащ дэжьым Даут ищыгъынхэр ыцунтхъагъэх, игъусэгъэ цӀыфхэми ар дэдэр ашӀагъ. 12Ахэм яхьадэгъэшхуагъ, Саулрэ ащ ыкъо Ионэтанрэ, Зиусхьаным идзэрэ Израил хэгъэгумрэ чатэм зэрэзэхигъэфагъэхэр ягукъэошхоу гъымэ пыхьэхэзэ агъэягъэх, пчыхьэ нэс анэкӀыгъ. 13ЕтӀанэ къэбарыр къыфэзыхьыгъэм Даут еупчӀыгъ: «Хэтмэ уащыща о?» Адрэм къыриӀожьыгъ: «Хэхэс Ӏамалэкъым сырикӀал». 14Даут ащ риӀуагъ: «Зиусхьаным къахихыгъэр уукӀыным утемыщыныхьэу сыдэущтэу пӀэ тепщэягъа?» 15Ар къыӀуи, Даут идзэкӀолӀ кӀалэ горэм къеджи риӀуагъ: «Еуи мор укӀы». Ар ащ еуи ыукӀыгъ. 16Даут аукӀыгъэм кӀэлъиӀожьыгъ: «Уихьадэгъу ор-орэу къэблэжьыгъ: Зиусхьаным къахихыгъэр уукӀыгъэу къызэоӀом уифэшъуашэр ор-орэу къызфэпхьыжьыгъ».
Даут Саулрэ Ионэтанрэ зэригъэягъэхэр
17Даут Саулрэ ащ ыкъо Ионэтанрэ мыщ фэдэ гъыбзэ къафиӀуагъ: 18Яшар итхылъ#1:18 Ижъырэ тхыгъэмэ ащыщэу Яшар итхылъ джы щыӀэжьэп. Яшарым имэхьанэр цӀыф заф. зэритхагъэу, ехъуд лъэпкъым «Щабзэм иорэд»#1:18 Ижъырэ джуртыбзэмкӀэ атхыгъэ Ӏэпэрытхым зэрэхэтыр: щабзэ, ау мэхьанитӀу иӀэу къыбгурыӀон ылъэкӀыщт: апэрэр орэдым ыцӀ, ятӀонэрэр ехъуд лъэпкъыр щэбзэуакӀэм фэбгъэсэныр. ебгъэшӀагъ:
19«А Израил, уищытхъузехьэхэр уилъэгапӀэхэм ахэкӀодагъэх,
О лӀыхъужъ гущэхэр зэрэфэхыгъэхэр!
20Гъат къалэм къэбар щышъумыӀуат,
Ащкъэлэн иурамхэми макъэ ащышъумыгъэӀу,
армырмэ фылистмэ япхъухэр гушӀоных,
сунэт зымышӀыгъэмэ япхъухэр тхъэжьыных.
21ГъылбэуаӀ Ӏуашъхьэхэр! Осэпси ощхи къышъуферэмых,
лэжьыгъэ зэрылъ губгъуи шъуакӀыӀу терэмылъ,
лӀыхъужъхэм ямэӀу къызэхакъутагъэшъ,
Саул имэӀоу дагъэ зыщафэгъагъэм къытекӀуагъэхэшъ.
22УкӀыгъэмэ алъ къытенэу,
лӀыхъужъхэм апкъышъол пхыригъэкӀэу
Ионэтан ищэбзащэ дэлъ щабзэр ренэу атыригъафэщтыгъ,
Саул ичати фэӀазэу ыгъабзэщтыгъ.
23Саулрэ Ионэтанрэ зэшӀугъэх, зэгурыӀощтыгъэх,
щэӀэфэхи ядунай захъожьми зэшӀокӀодыгъэхэп;
бгъашхъомэ анахь псынкӀагъэх ахэр,
аслъанхэм анахь лъэшыгъэх.
24О израилыпхъухэр! Жъугъае Саулэу,
шэкӀ плъыжь дахэкӀэ шъузыфапэщтыгъэр,
щыгъынхэм къадэшъуштэнэу дышъэ хьап-щыпхэр къышъуфязгъащэщтыгъэр.
25О лӀыхъужъ гущэхэр зэуапӀэм зэрэщыфэхыгъэхэри!
О уилъэгапӀэ гущэхэм къащаукӀыгъэу Ионэтан щылъи.
26Сшэу Ионэтан, ощ пае сэшъыгъо, усилъэпӀэ дэдагъ;
гуфэбэныгъэу къысфыуиӀагъэр сэркӀэ бзылъфыгъэм ишӀулъэгъу нахьи нахь лъэшыгъ.
27О лӀыхъужъ гущэхэр зэрэфэхыгъэхэри – Ӏашэ гущэхэри хэкӀодагъэхи!»
Currently Selected:
ЯтӀонэрэ Самуел 1: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
