Апэрэ Самуел 31

ЯщэкӀэнэрэ зырэ шъхьэр

Саулрэ икӀалэхэмрэ хьадэгъур къызэрафэкӀуагъэр

1Джащ фэдизым фылистхэр Израилым къезэуагъэх, фылистхэм защаухъумэнэу израилылӀмэ къыкӀатхъужьыгъэти, къушъхьэу ГъылбэуаӀ къыщызэхакъутагъэх. 2Фылистхэр Саулрэ ыкъохэмрэ къакӀэхьагъэх, Саули, икӀалэхэу Ионэтани, Абинэдауи, МэлкъэшыуаӀи фылистхэм аукӀыгъэх. 3Саул пэшӀуекӀорэ заор пхъэшагъэ, щэбзащэхэмкӀэ охэрэм щабзэхэр къытырагъафэхи, хьылъэу ар къызэхауӀыхьагъ. 4Арти Саул иашъоджэнэзехьэ риӀуагъ: «Сунэт амышӀыгъэхэр къакӀохэу, самыукӀэу, къызрэмыджэгуфэхэкӀэ, уичатэ къихи сылӀ». Ау иашъоджэнэзехьэ лъэшэу щынэщтыгъэти, ащ фэягъэп. Арти Саул ежь ичатэ къырихи, ащ зытыридзэжьыгъ. 5Саул зэрэлӀагъэр иашъоджэнэзехьэ зелъэгъум, ежьми ичатэ зытыридзэжьи зырилӀыжьыгъ. 6Джаущтэу а мафэм Саули, икӀэлищи, иашъоджэнэзехьи, зэкӀэ ицӀыфхэри зэрэзэгъусэхэу хэкӀодагъэх. 7КӀэим къыкӀэрысыгъэ, Иордан ыкӀыбкӀэ щыпсэущтыгъэхэ израил цӀыфхэм израил дзэкӀолӀхэм къызэрэкӀатхъужьыгъэр, Саулрэ икӀалэхэмрэ зэрэщымыӀэжьхэр къызалъэгъум, якъалэхэр къабгынэхи, ашъхьэ рахьыжьэжьыгъ. Фылистхэр къакӀохи ахэм адэтӀысхьагъэх.

8КъыкӀэлъыкӀорэ мафэм аукӀыгъэхэр ахъункӀэнхэу фылистхэр къэкӀуагъэхэти, къушъхьэу ГъылбэуаӀ щыфэхыгъэ Саули икӀэлищи къагъотыжьыгъэх. 9Арти ащ ышъхьэ шӀуаупкӀи, иашъоджанэ щахи, ятхьэ нэпцӀхэр зычӀэт унэхэмрэ цӀыфхэмрэ къэбарыр алъыӀэсыным пае зэрэфылист чӀыгоу мэкъэгъэӀухэр къащырагъэкӀокӀыгъэх. 10ЕтӀанэ ащ иашъоджанэ гъэбэжъугуащэу Астарт итхьалъэӀупӀэ чӀалъхьи, ихьадэ къалэу Бэтщан идэхьапӀэ дэжь дэпкъым щыпалъагъ. 11Ащ ыуж фылистхэм Саул рашӀагъэм икъэбар ГъылыӀад ит къалэу Яощ дэсхэм зэхахыгъэти, 12лӀыгъэ зыхэлъ цӀыфхэр зэкӀэ къежьэхи, чэщ ренэм къакӀохэзэ, Саулрэ икӀалэхэмрэ яхьадэхэр Бэтщан идэпкъ къыпахыжьхи, Яощ къагъэзэжьи, ахэр ащ щагъэстыжьыгъэх. 13ЕтӀанэ яхьадэкъупшъхьэхэр Яощ дэт чъыгаем ычӀэгъ щычӀатӀэжьхи, мэфиблэ анэкӀыгъ.

Currently Selected:

Апэрэ Самуел 31: АдыТГ

Highlight

Copy