Апэрэ Самуел 9

Ябгъонэрэ шъхьэр

Тхьэм Саул пачъыхьэнэу къызэрэхихыгъэр

1Бынямин лъэпкъым щыщэу лӀы бэлахьэ горэ Къыщ ыцӀэу щыӀагъ. Ар бынямин горэм къыхэкӀыгъэ Афые икӀалэу Бэхъорат къаригъэлъфыгъэ Цырэур ыкъо Абиел икӀалэу щытыгъ. 2Саул ыцӀэу ащ кӀалэ иӀагъ, ныбжьыкӀэу, дахэу: Саул фэдэу дахэу Израилым щыщхэм зы нэбгыри ахэтыгъэп, илъэгагъэкӀэ зэрэлъэпкъэу ар къахэщыщтыгъэ.

3Зэгорэм Саул ятэу Къыщ ищыдыбзхэр шӀокӀодыгъэхэти, Къыщ Саул риӀуагъ: «Тэджи, унэӀутхэм ащыщ горэ гъусэ шӀи, щыдыбзхэм шъукъалъыхъунэу шъукӀу». 4Джащ тетэу ащ Ефраим къушъхьэр зэпичыгъ, чӀыпӀэу Щалищ къызэпикӀухьагъ, ау зылъежьагъэхэр къагъотыгъэхэп. Ащ ыуж чӀыпӀэу ЩэӀалим къызэпакӀухьагъэти, ащи къыщагъотыгъэхэп. ЕтӀанэ Бынямин хэкур къызэпакӀухьагъ шъхьае, мыщи рагъотагъэхэп. 5Джаузэ Цыуф чӀыпӀэм зынэсхэм, унэӀутэу игъусагъэм Саул риӀуагъ: «Тэгъэгъэзэжь, армырмэ тятэ щыдыбзхэри щыгъупшэжьыгъэхэу къытлъыримыгъэжьагъохэт». 6Арти унэӀутым ащ къыриӀожьыгъ: «Мы къалэм Тхьэм ицӀыф, лъытэныгъэ фашӀэу, ыӀорэ пстэури тефэу дэс. Ащ ыдэжь тыгъакӀуи, зыдэдгъэзэн фэе лъэныкъор къытиӀонкӀи мэхъуба». 7Саул иунэӀут риӀожьыгъ: «ТыкӀомэ, а цӀыфым сыда фэтхьыщтыр? Тиматэмэ хьалыгъу арылъыжьэп, шӀухьафтыни тиӀэп, Зиусхьаным ицӀыф еттынэу сыда тӀэкӀэлъыр?» 8Арти унэӀутым Саул риӀожьыгъ: «Тыжьын ахъщэм ызыплӀанэ сӀыгъышъ, Зиусхьаным ицӀыф ар естынышъ, лъэныкъоу зыдэдгъэзэщтыр къытиӀощт». 9-11Джыри Саул иунэӀут риӀуагъ: «КъапӀорэр дэгъу, некӀо». Тхьэм ицӀыф зыдэс къалэм дэхьагъэх. Ӏуашъхьэм тет къалэм дэкӀуаехэзэ, псыхьэ кӀорэ пшъашъэхэр апэ къифагъэхэти, ахэм яупчӀыгъэх: «Усэрэжъыр мыщ дэса?» НахьыпэкӀэ Тхьэм еупчӀынхэ зыхъукӀэ Израилым щыщхэм аӀощтыгъэ: «Усэрэжъым дэжь некӀо»; сыда пӀомэ тхьэлӀыкӀокӀэ джы заджэхэрэм пасэм усэрэжъкӀэ ягугъу ашӀыщтыгъэ. 12Адрэхэм джэуап къатыжьыгъ: «Дэс, мары ар, шъуапэ итэу макӀошъ, шъуелъэкӀони шъукӀахь, къурмэн зыщашӀырэ лъэгапӀэм цӀыфхэм мэфэкӀ къурмэн щашӀти, ар непэ къалэм къэкӀуагъ; 13къалэм шъунэсмэ, шъуӀукӀэщт, щэджэгъуашхэ къыщишӀынэу къурмэн зыщашӀырэ лъэгапӀэм дэмыкӀуаезэ шъуфэзыщт. Ар къэмысэу цӀыфхэм шхэныр рагъэжьэщтэп, къурмэным пае Тхьэм зелъэӀухэкӀэ ары къырагъэблэгъагъэхэр зышхэщтхэр. Арышъ, шъукӀу, джыри ежьагъэпышъ, шъуӀукӀэщт». 14Джащ тетэу ахэр къалэм кӀуагъэх. Къэлэгум зынэсхэм лъэгапӀэм ежьэгъэ Самуел апэ къифагъ.

15Саул къэкӀонкӀэ зы мафэ къэнэжьыгъэу Зиусхьаным Самуел къыриӀогъагъ: 16«Неущ мы уахътэм тефэу Бынямин хэкум щыщэу зы цӀыф горэ уадэжь къэзгъэкӀощтышъ, сиизраил лъэпкъ ипэщэщтым ышъхьэ дагъэ щыф – ащ силъэпкъ фылистхэм атыригъэкӀощт; итхьаусыхэ макъэ къыслъыӀэсыгъэшъ, силъэпкъ сыфэгумэкӀы». 17Самуел Саул къызелъэгъум Зиусхьаным ащ къыриӀуагъ: «Джары цӀыфэу зигугъу къыпфэсшӀыгъагъэр; джары силъэпкъ зыгъэӀорышӀэщтыр». 18Саул къэлапчъэм зынэсым Самуел екӀуалӀи еупчӀыгъ: «Усэрэжъым иунэ зыдэщытыр къысэпӀона?» 19Самуел Саул къыриӀожьыгъ: «Сэры усэрэжъыр, сапэ уитэу къурмэн зыщашӀырэ лъэгапӀэм дэкӀуай, непэ щэджэгъуашхэ къыздэшъушӀыщт, неущ пчэдыжьым устӀупщыжьыщт, угу илъыр зэкӀэ къыосӀощт; 20мэфищкӀэ узэкӀэӀэбэжьмэ пшӀокӀодыгъэ щыдыбзхэм уафэмыгумэкӀ; ахэр къагъотыжьыгъэх. Хэта зыӀэ илъыщтыр Израилыр зэрэщытэу зыкӀэхъопсырэ пстэури? Ар орэп шъуӀуа, уятэ иунагъо зэрэщытэу арэп шъуӀуа?» 21Арти Саул къыриӀожьыгъ: «Израилым ис лӀэкъо нахь цӀыкӀухэм ащыщэу быняминба сыкъызхэкӀыгъэр? Бынямин лӀакъом щыщхэм анахь зыхамылъытэ-рэр арба сэ сыкъызхэкӀыгъэр? Сыда ар къызкӀысапӀорэр?»

22Самуел Саулрэ ащ иунэӀутрэ зэригъэгъусэхи унэшхом зыдырищагъэх, нэбгырэ щэкӀ фэдиз хъухэу къыригъэблэгъагъэхэм апшъэкӀэ ыщэхи ыгъэтӀысыгъэх. 23Самуел пщэрыхьакӀом къеджи риӀуагъ: «„ГъэтӀылъ“ зыфасӀуи къыостыгъэгъэ лы Ӏахьэр къахь». 24ПщэрыхьакӀом блантхъэ зэпытыр къыхьи Саул ыпашъхьэ къырилъхьагъ. Самуел ащ риӀуагъ: «Мыр дгъэтӀылъыгъагъэшъ, уапашъхьэ илъхьи шхы, цӀыфхэр къызщызэӀузгъэкӀэщтхэ мы уахътэм тефэу ощ пае ар къэдгъэнэгъагъ». Джаущтэу а мафэм Саул Самуел щэджэгъуашхэ дишӀыгъ. 25ЕтӀанэ ахэр къурмэн зыщашӀырэ лъэгапӀэм къехыжьхи къалэм къызэкӀожьхэм, Саул унашъхьэм пӀэ щыфашӀи, чэщым ар ащ щычъыягъ#9:25 Мы стихыр Септуагинтым – урымыбзэмкӀэ зэрадзэкӀыгъэ Ӏэпэрытхым зэрэхэтым фэдэу зэдзэкӀыгъэ хъугъэ. Ау ижъырэ джуртыбзэмкӀэ атхыгъэ Ӏэпэрытхым зэрэхэтыр мары: [Саулрэ Самуелрэ унашъхьэм щызэдэгущыӀагъэх]..

26Нэф къэшъи тыгъэр къызыкъокӀым, Самуел унашъхьэм телъыгъэ Саул еджагъ: «Къэтэджи, узгъэкӀотэжьыщт». Арти Саул къэтэджыжьи, тӀури зэгъусэу щагум къыдэкӀыгъэх.

Саул пачъыхьагъум зэрэтехьагъэр

27Къэлэ гъунэм зыщынэсынхэм Самуел Саул риӀуагъ: «Тапэ итэу кӀонэу унэӀутым еӀу». Адрэр апэ иуцуагъ. «О джы къэуцуи Тхьэм къыӀуагъэр къыпфэсӀотэщт», – риӀуагъ.

Currently Selected:

Апэрэ Самуел 9: АдыТГ

Highlight

Copy