Апэрэ Самуел 4
4
ЯплӀэнэрэ шъхьэр
1Самуел зэрэ-Израилэу псалъэкӀэ зыфигъэзагъ.
Тхьэм ипхъонтэ лъапӀэ зэратырахыгъэр
Израил цӀыфхэр фылистхэм заокӀэ апэгъокӀыгъэх, АбэнхъаӀэзэр пэблагъэу ахэр агъэуцугъэх, фылистхэр Афэкъ дэжь къыщыуцугъэх. 2Фылистхэр израил цӀыфхэм къязэонхэу къэуцухи, заор къарашӀылӀагъ. Фылистхэр израил цӀыфхэм къатекӀуагъэх, ахэм ащыщэу нэбгырэ миниплӀ фэдиз а чӀыпӀэм къыщаукӀыгъ. 3Псэоу къэнэжьыгъэхэм уцупӀэм къызагъэзэжьым, Израилым инахьыжъ упчӀэжьэгъухэм къаӀуагъ: «Сыда Зиусхьаным фылистхэр къызкӀыттыригъэкӀуагъэхэр? Зиусхьаным ипхъонтэ лъапӀэу Щылэу щыӀэр мыщ къызытщэкӀэ, Зиусхьаныр тигъусэ хъунышъ, заом тызыкӀокӀэ, типыйхэм ащ тащиухъумэщт». 4Арти Щылэу агъакӀохи Зиусхьанэу ошъогу дзэхэр зиӀэрылъхьэм ипхъонтэ лъапӀэу Ар къэрыубхэм#4:4 Къэрыубхэр – ошъогу псэушъхьэ тэмабгъох. Ахэм ятеплъэ зиӀэу дышъэм хэшӀыкӀыгъэхэр тӀу хъухэу Тхьэм ипхъонтэ лъапӀэ шъхьащытыгъэх. Къэрыубмэ атамэхэр Тхьэр зыдэщыӀэ чӀыпӀэу ары зэралъытэрэр. Еплъ: Мосэ иятӀонэрэ тхылъ 25:18-20; 37:7-9. атесэу зытешӀыхьагъэр къахьыгъ. Алый ыкъуитӀоу Хъофныйрэ Пинхъасрэ Тхьэм ипхъонтэ лъапӀэ къыдэкӀуагъэх.
5Зиусхьаным ипхъонтэ лъапӀэ уцупӀэм къызагъэсым израил цӀыфхэм куо мэкъэшхоу къаӀатыгъэм чӀыгур къыгъэгырзыгъ. 6Фылистхэм а гушӀогъо куо мэкъэшхохэр зэхахыгъэти, зэупчӀыжьыгъэх: «Сыд фэдэ куо мэкъэшхоха джуртмэ яуцупӀэ зыдэщыӀэ лъэныкъомкӀэ къыщыӀухэрэр?» Зиусхьаным ипхъонтэ лъапӀэ уцупӀэм къызэрэнагъэсыгъэр ахэм къашӀагъ. 7Арти фылистхэм къэщтагъэхэу зэраӀожьыгъ: «Ахэм яуцупӀэ Тхьэр къэсыгъ. ТхьамыкӀэгъошхор къытфэкӀуагъ, сыда пӀомэ тыгъуаси тыгъоснахьыпи ащ фэдэ хъугъэп. 8ТхьамыкӀэгъошху къытфэкӀуагъэр. А Тхьэ кӀочӀэшхомэ хэт тащызыухъумэщтыр? А Тхьэ дэдэхэр ары мысырхэр шъофнэкӀым тхьамыкӀагъомэ ащыхэзыдзагъэхэр. 9Фылистхэр, лӀыгъэ къызыхэжъугъаф, зыжъугъэпыт. Ежьхэр гъэры зэрэтшӀыгъэхэм фэдэу, джуртмэ гъэры тэ тамышӀыжьыным пае, шъуязау. ЛӀыгъэ къызхэжъугъаф, ахэм шъуязау».
10Ащ лъыпытэу фылистхэр къязэуагъэх, израил цӀыфхэм ахэр къатекӀуагъэх, израил цӀыфхэм къыкӀаӀажьи, чэтэнгъэӀагъэмэ ачӀэлъэдэжьыгъэх. Хьалэч къырагъэфагъэх, израил лъэсыдзэм щыщэу нэбгырэ мин щэкӀ хэкӀодагъ. 11Тхьэм ипхъонтэ лъапӀэ фылистхэм зыӀэкӀагъэхьагъ. Алый ыкъуитӀоу Хъофныйрэ Пинхъасрэ къаукӀыгъэх.
Алый дунаир зэрихъожьыгъэр
12Бынямин цӀыф горэм зэуапӀэр къыбгыни къыкӀиӀэжьыгъ. А мэфэ дэдэм Щылэу ащ къыгъэзэжьыгъ. Къэбар гухэкӀышхо зэриӀэм ишыхьатэу ищыгъынхэр зэӀытхъыгъагъэх, ышъхьэ ятӀэр къыхэтэкъущтыгъ. 13Ар къызэсым, Алый Тхьэм ипхъонтэ лъапӀэ икъэбар ымышӀэу зэгоутыщтыгъэти, гъогум пэмычыжьэу къэлапчъэм дэжь щыт тетӀысхьапӀэм тесэу гъогум рыплъэщтыгъ. Бынямин цӀыфыр къэси къэбарыр къызафеӀуатэм, къалэм дэс цӀыфхэм хьадэгъэшхо къаӀатыгъ. 14Алый гъог макъэхэр зызэхехым къяупчӀыгъ: «Сыд фэдэ куо-хьау макъэха къэӀухэрэр?» Къэбарыр къафэзыхьыгъэр Алый къекӀуалӀи къэхъугъэм щигъэгъозагъ. 15Алый ащ дэжьым илъэс тӀокӀиплӀрэ пшӀырэ ыныбжьыгъ, ынэхэр икӀосыкӀыгъагъэх, зыпари ылъэгъужьыхэщтыгъэп. 16А цӀыфым Алый къыриӀуагъ: «Сэ дзэм изэуапӀэ къэсыбгынэгъэ къодый, непэ зэуапӀэм сшъхьэ къыӀусхыжьыгъ». Алый къеупчӀыгъ: «Сыда къэхъугъэр, сикӀал?» 17Арти къэбарыхьэм къыриӀожьыгъ: «Израил цӀыфхэр фылистхэм къафыгъэх. Заом дзэкӀолӀыбэ хэкӀодагъ, хьалэчыр къахагъэхьагъ. О уикӀэлитӀуи, Хъофныйрэ Пинхъасрэ, хэкӀодагъэх, Тхьэм ипхъонтэ лъапӀи аштагъ». 18Тхьэм ипхъонтэ лъапӀэ игугъу къызешӀым, тетӀысхьапӀэм къефэхи, Алый кӀыбкӀэ къызэхэфагъ, жъы дэдэ зэрэхъугъэмрэ зэрэонтэгъугъэмрэ къахэкӀэу ытхыкъупшъхьэ зэриути лӀагъэ. Ар илъэс 40-рэ Израилым ихьыкумышӀщтыгъ.
Пинхъас ишъхьагъусэ зэрэлӀагъэр
19Алый инысэу, Пинхъас ишъхьагъусэ лъэрмыхьагъ, сабый къыфэхъункӀэ макӀэ къыфэнэжьыгъагъэр. Тхьэм ипхъонтэ лъапӀэ зэратырахыгъэм, ипщырэ ишъхьагъусэрэ зэрэщымыӀэжьхэм якъэбар зызэхехым бзылъфыгъэр етӀысэхыгъ, хъушъэныр къэси сабый къыфэхъугъ. 20Ащ лӀэныгъэр къызештэм, къыкӀэрытыгъэ бзылъфыгъэхэм раӀуагъ: «УмыгумэкӀ, о шъао къыпфэхъугъ». Ау адрэм зыпари къариӀожьыгъэп, хъатэуи къапылъыжьыгъэп. 21Тхьэм ипхъонтэ лъапӀэ затырахым, ипщырэ ишъхьагъусэрэ зэлӀэхэм ауж сабыим Ихабод#4:21 Ихабодым къикӀырэр щытхъум къыбгынагъэр. цӀэу фиуси ыӀуагъ: «Щытхъум Израилыр къыбгынагъ». 22Ащ къыӀуагъ: «Щытхъум Израилыр къыбгынагъ, сыда пӀомэ Тхьэм ипхъонтэ лъапӀэ атырахыгъ».
Currently Selected:
Апэрэ Самуел 4: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
