Апэрэ Самуел 21

ЯтӀокӀэнэрэ зырэ шъхьэр

Даут хьалыгъу лъапӀэр къызэрэратыгъэр

1Даут къэтэджи ӀукӀыжьыгъ, Ионэтан къалэм къыгъэзэжьыгъ#21:1 Мы стихыр Септуагинтым – ижъырэ урымыбзэмкӀэ зэрадзэкӀыжьыгъэ Ӏэпэрытхым техыгъэу урысыбзэмкӀэ зэрадзэкӀыжьыгъэм ия 20-рэ шъхьэ ия 43-рэ стихэу щыт..

2Даут къалэу Нэу дэсыгъэ къурмэнышӀэу Ахъымэлэх дэжь кӀуагъэ. Даут къызелъэгъум Ахъымэлэх къэщтагъэу къеупчӀыгъ: «Сыда зыкӀыуизакъор, зыгорэ зыкӀыуимыгъусэр?» 3Арти Даут къурмэнышӀэу Ахъымэлэх риӀуагъ: «Пачъыхьэм Ӏоф горэм сыфигъази, сызфигъакӀори пшъэрылъэу къысфишӀыгъэри хэти ышӀэ мыхъунэу къысиӀуагъ. Джащ пае, етӀанэ тыщызэӀукӀэжьынэу, сигъусэ кӀалэхэр чӀыпӀэ горэм згъэкӀуагъэх. 4Къысэптын плъэкӀынэу зыгорэ пӀэкӀэлъа? Хьалыгъуитф горэ е къэбгъотрэ щыӀэмэ къысэт». 5Арти къурмэнышӀым Даут риӀожьыгъ: «Хьалыгъу къызэрыкӀо къэсштэнэу щыӀэп, щыӀэр Тхьэм фагъэуцугъэ хьалыгъу лъапӀэр арышъ, уицӀыфхэр бзылъфыгъэ кӀымыгъугъэхэмэ, ашхы хъущт». 6Даут къурмэнышӀым къыриӀожьыгъ: «Мэфэ заулэ хъугъэу, гъогу тыкъызтехьагъэм къыщегъэжьагъэу, тихабзэ тетэу кӀалэхэр апкъкӀэ къабзэх. Тинепэрэ гухэлъ имэхьанэ зэрэиным елъытыгъэу, хабзэмкӀэ ахэр къэбзэнхэ фае». 7ЕтӀанэ къурмэнышӀым Тхьэм фагъэуцугъэ хьалыгъу лъапӀэр ащ къыритыгъ, нэмыкӀ щыӀагъэп. Хабзэу щыӀагъэмкӀэ, Тхьэм фагъэуцугъэ хьалыгъу лъапӀэм ычӀыпӀэ Ащ ыпашъхьэ нэмыкӀ хьалыгъу фабэ ибгъэуцожьын фэягъэ. 8Саул иӀумэтхэм ащыщэу, Саул иӀахъохэм яӀэшъхьэтетэу, едом лъэпкъым къыхэкӀыгъэ Дэукъ Зиусхьаным пае гухэлъ иӀэу а мафэм ащ щыӀагъ.

9Даут Ахъымэлэх еупчӀыгъ: «Пчыпыджынми чатэми къысэптынэу зыгорэ уиӀэба? Пачъыхьэм иунашъо псынкӀэу згъэцэкӀэн фэягъэти, чатэми е нэмыкӀ Ӏашэ горэми къыздэсштэнэу игъо сифагъэп». 10КъурмэнышӀым къыриӀожьыгъ: «Чъыгэе кӀэим узщытекӀогъэ фылистэу Голиат ичатэ щыгъынхэм акӀоцӀыщыхьагъэу мыжъогъозэсыным ыкӀыб дэтышъ, уфаемэ, джар штэ нахь, ащ нэмыкӀ гори мыщ щыӀэп». Даут къыӀуагъ: «Ащ фэдэ щыӀэпышъ, къаштэ».

Даут Гъат шъхьэегъэзыпӀэкӀэ зэрэкӀуагъэр

11А мэфэ дэдэм Даут Саул зышӀуигъэбылъи Гъат ипачъыхьэу Ахыщ дэжь кӀуагъэ. 12Арти иӀумэтхэм Ахыщ къыраӀуагъ: «Модрэ хэгъэгум ипачъыхьэу Даутба мыр? „Саул минхэм атекӀуагъ, Даут – минипшӀхэм“ аӀомэ, къашъохэзэ, мырба орэд къызфаӀуагъэр?» 13А гущыӀэхэр Даут ыгу риубытагъэхэу щытти, Гъат ипачъыхьэу Ахыщ лъэшэу щыщынагъ. 14А чӀыпӀэм Даут иӀуплъэ зэблихъуи, делашъо къызтыригъауи, зэрмырэу зыкъаригъэлъэгъугъ, пчъэхэр зэхицӀалэхэу, Ӏупсыр ыжакӀэ тыригъэтӀатӀэу ригъэжьагъ. 15Ахыщ иӀумэтхэм ариӀуагъ: «Шъулъэгъурэба ащ ышъхьэ зэрэзэӀыхьагъэр, сыд пае къысфэшъущагъа? 16МакӀа делэу сэ сиӀэр мыр къысфэшъумыщэмэ мыхъунэу, сапашъхьэ делагъэхэр щишӀэнхэм пая? Адэ джы мыр сэ къыскӀэрысыщта?»

Currently Selected:

Апэрэ Самуел 21: АдыТГ

Highlight

Copy