Апэрэ Самуел 13

ЯпшӀыкӀущэнэрэ шъхьэр

Фылистхэм апэшӀуекӀорэ заомрэ Саул къурмэныр зэриукъуагъэмрэ

1Джащ тетэу Саул ятӀонэрэ илъэсым пачъыхьагъэ#13:1 Ижъырэ джуртыбзэмкӀэ атхыгъэ Ӏэпэрытхым Саул ыныбжь зыфэдизыгъэр гъэнэфагъэу къырахыжьышъугъэп. Саул илъэс пчъагъэу зэрэпачъыхьагъэм ехьылӀагъэу къэбар зэфэшъхьафхэр щыӀэх: егъапш Апостолхэм Ӏофэу ашӀагъэхэр 13:21. УрымыбзэкӀэ зэрадзэкӀыгъэ Ӏэпэрытхым техыгъэ урыс синодальнэ Библием апэрэ стихыр зэритыр мары: Саул пачъыхьэу зытехьагъэм илъэс тешӀагъэу, адрэ илъэсми ар Израилым ипачъыхьагъэу Саул джуртмэ нэбгырэ минищ къахихыгъ..

2Саул израил лъэпкъым щыщэу нэбгырэ минищ къахихыгъ: нэбгырэ минитӀур игъусэу къалэу Мыхмэсрэ Бэтэл къушъхьэмрэ ащыӀагъэх, адрэ миныр Саул ыкъо Ионэтан игъусэу Бынямин хэкум ит къалэу ГъыбӀэ щыӀагъэх; адрэ цӀыфхэр ячэтэнгъэӀагъэхэм якӀужьынхэу ащ зэбгыритӀупщыжьыгъагъэх. 3Ащ ыуж Ионэтан фылист дзэ купэу ГъыбӀэ къыщыуцугъэм тебани зэрэзэхикъутагъэм икъэбар фылистхэм зэхахыгъ. Арти, Саул гъоупщынэм#13:3 Гъоупщынэр – джуртхэм къэбар ашӀэным пае запщэхэзэ агъэфедэщтыгъэ тӀыбжъэ гъэщыгъэр. Зао къызежьэкӀэ, мэфэкӀ зыхъукӀэ е нэмыкӀ хъугъэ-шӀагъэ горэхэм яхьылӀагъэу тӀыбжъэмкӀэ макъэ арагъэӀущтыгъэ. епщэзэ, къэхъугъэм икъэбар зэрэхэгъэгоу щызэхаригъэхыгъ. 4ЕтӀанэ Саул фылист дзэ купыр зэрэзэхикъутагъэм, фылистхэм Израилым агу зэрэщыкӀыгъэм икъэбар зэрэ Израилэу зызэхехым, цӀыфхэр къэзэрэугъойхи, Саул дэжь Гъылгъал къэкӀуагъэх.

5Арти фылистхэр Израилым къезэонхэм пае зэоным фытегъэпсыхьэгъэ ку мин щэкӀ шыкоо нэбгырэ миних ягъусэжьэу, хы Ӏушъом Ӏулъ пшахъом ибагъэм фэдиз хъунэу, цӀыф бэ дэдэ хъухэу къэзэрэугъойхи къежьагъэх. Бэтаон икъокӀыпӀэ лъэныкъокӀэ дзыгъэу щыӀэ Мыхмэс къэсхи къыщыуцугъэх. 6Джуртхэр лъэныкъо пстэумкӀи къаухъурэигъэхэти, ахэр къащтэхи къушъхьэ гъочӀэгъхэми, къушъхьэ тӀуакӀэхэми, мыжъошхохэмрэ къэхэмрэ акъогъуи, псы зэӀугъэкӀапӀэхэми гъэбылъыпӀэкӀэ якӀужьыгъэх; 7джуртмэ ащыщхэр псыхъоу Иордан зэпырыкӀхи, Гъад, ГъылыӀад хэгъэгумэ ячӀыгумэ анэсыгъэх. Саул Гъылгъал къыдэнэгъагъэ нахь мышӀэми, ыуж итэу къэкӀогъэ цӀыфхэр зэкӀэ зэрэщынэщтыгъэхэм къыхэкӀэу кӀэзэзщтыгъэх.

8Самуел къыфигъэнэфэгъэ уахътэр къэсыфэ Саул мэфиблэ ащ ежагъ. Ау Самуел Гъылгъал къызэмыкӀом, цӀыфхэм Саул къабгынэу рагъэжьагъ. 9Арти Саул ариӀуагъ: «Къурмэнгъэстрэ зэгурыӀоныгъэ къурмэнрэ сшӀыщтхэшъ, ищыкӀагъэхэр къысфашъущэх». Ежьым къурмэнгъэст ышӀыгъ. 10Къурмэнгъэстыр ыухыгъэ къодыеу Самуел къэсыгъ. Саул шӀуфэс рихынэу ащ пэгъокӀыгъ. 11«Сыд джы пшӀагъэр?» – ыӀуи Самуел къызеупчӀым, Саул риӀожьыгъ: «Сигъусэ цӀыфхэр зэрэзэбгырычъыжьхэрэр слъэгъугъэ, ау къэбгъэнэфэгъэ мафэхэм яхъулӀэу укъызэмыкӀом, фылистхэри Мыхмэс къыщызэрэугъоигъэхэти, 12укъэсыфэ сегупшысыгъ: „Сэ Зиусхьаным ӀэпыӀэгъу къытитынэу джыри семылъэӀузэ, фылистхэр Гъылгъал къэсынхэшъ, къысэзэощтых“. Джары къурмэнгъэстхэр зыкӀэсшӀыгъэхэр». 13Ау Самуел Саул риӀуагъ: «Делагъэу узекӀуагъ. Уи-Зиусхьанэу Тхьэм къыуиӀорэр бгъэцэкӀагъэп. Ащ къыӀорэм ублэмыкӀыгъагъэмэ, уилӀакъо егъашӀэм Израилым ипачъыхьэщтыгъ. 14Ау джы уипачъыхьагъу укъытенэжьыщтэп. Зиусхьаным ыгу рихьэу, Ежь ыӀорэм шӀомыкӀынэу лӀы къыгъотыгъ, илъэпкъ ипэщэнэу Зиусхьаным ащ унашъо фишӀыгъ, сыда пӀомэ Зиусхьаным къыпфишӀыгъэ унашъор о бгъэцэкӀагъэп». 15ЕтӀанэ Самуел Гъылгъал къыбгыни Бынямин хэкум ит къалэу ГъыбӀэ кӀуагъэ#13:15 Мы чӀыпӀэр урымыбзэкӀэ зэрадзэкӀыгъэ Ӏэпэрытхым зэритым техыгъэу урыс синодальнэ Библием щызэдзэкӀыгъ: «Хэмылъэдэжьыгъэ цӀыфхэр Саул гъусэ фэхъухи, къязэонэу къакӀощтыгъэ пыидзэм пэгъокӀынхэу Гъылгъал къыдэкӀхи, Бынямин хэкум ит къалэу ГъыбӀэ ылъэныкъокӀэ ежьагъэх»..

Саул игъусэхэр къызелъытэм нэбгырэ шъих Ӏэпэ-цыпэ хъоу къычӀэкӀыгъ. 16Саулрэ ыкъо Ионэтанрэ дзэкӀолӀэу ягъусэхэри Бынямин ит къалэу ГъыбӀэ къыщыуцугъэх. Адрэ фылистхэм къалэу Мыхмэс уцупӀэкӀэ хахыгъ. 17Арти фылистхэм яуцупӀэ дзэ купищ къыдэкӀыгъ апэ къифэрэ чӀыгур зэрапхъонэу. Зыр хэкоу ШыуӀал ит къалэу Ӏофрэ лъэныкъомкӀэ кӀорэ гъогум техьагъ, 18адрэ купым Бэтхъорэн екӀурэ гъогур хихыгъ, ящэнэрэм ЦыоӀим лъэгум игъунапкъэкӀэ щыӀэ шъофнэкӀым фигъэзагъ.

19А лъэхъаным зэрэ Израил хэгъэгоу гъукӀэхэр исыгъэхэп, сыда пӀомэ джуртхэм чатэхэмрэ пчыпыджынхэмрэ ашӀынэу фылистхэм къафадэщтыгъэп. 20ЯшӀуанэхэр, яотычхэр, ягъупчъэхэр алъынхэм пае джуртхэр зэкӀэ фылистхэм адэжь кӀонхэ фэягъ. 21Къэуцэкугъэ пхъэӀэшацэхэр, шӀонажэхэр зэрафалъхэрэм пае фылист гъукӀэхэм тыжьын ахъщэу грамми 8 фэдиз аӀахыщтыгъэ, Ӏэмэ-псымэ папцӀэхэмрэ отычхэмрэ ягъэлъын уасэу фашӀыщтыгъэр тыжьын ахъщэу грамми 4 фэдиз. 22Арти зэзаохэ зыхъукӀэ Саулрэ Ионэтанрэ ягъусэгъэ дзэкӀолӀхэм зэкӀэми чатэхэмрэ пчыпыджынхэмрэ аӀыгъщтыгъэхэп, Саулрэ ащ икӀалэу Ионэтанрэ ары ныӀэп Ӏашэхэр зиӀагъэхэр.

23ЕтӀанэ фылист дзэ купыр Мыхмэс зэпырыкӀыпӀэм къэсыгъ.

Currently Selected:

Апэрэ Самуел 13: АдыТГ

Highlight

Copy