Апэрэ Самуел 11

ЯпшӀыкӀузэнэрэ шъхьэр

Саул Ӏамон лъэпкъым зэрэтекӀуагъэр

1Ӏамон лъэпкъым щыщэу Нэхъащ ГъылыӀад хэкум ит къалэу Яощ къыдзыхьагъ. Арти Яощ дэс хъулъфыгъэхэм зэкӀэми Нэхъащ раӀуагъ: «Зэзэгъыныгъэ къыддэшӀи тыбготыщт, къулыкъуи пфэтшӀэщт». 2Арти Ӏамон лъэпкъым щыщэу Нэхъащым ахэм ариӀуагъ: «Зэзэгъыныгъэ къыжъудэсшӀыщт унашъо пылъэу: шъуащыщ пэпчъ ынэ джабгъу къискӀынышъ, зэрэ-Израилэу ынапэ тесхыщт». 3Арти Яощ дэс нахьыжъ упчӀэжьэгъухэм къыраӀожьыгъ: «Израил ичӀыпӀэ пстэуми тилӀыкӀохэр тӀофтэнхэм пае мэфибл къытэт, тыкъыдэзыщыжьын гори зытымыгъоткӀэ, тыкъыпфэкӀощт». 4Ащ ыуж лӀыкӀохэр агъэкӀуагъэх Саул зыдэс къалэу ГъыбӀэ, къэбарыр цӀыфхэм къызафаӀуатэм, ахэм куо-хьаушхо къаӀатыгъ, гъыныри къыхадзагъ.

5Ащ тефэу Саул губгъэм щыӀагъэти, цухэм ауж итэу къызыдэхьажьым къяупчӀыгъ: «Сыда цӀыфхэм къяхъулӀагъэр, сыда ахэр зыкӀэгъыхэрэр?» Арти Яощ къикӀыгъэхэм къахьыгъэ къэбарым ар щагъэгъозагъ. 6КъаӀорэр зэхэзыхыгъэ Саул Тхьэм и-Псэ куоу къыхахьи, лъэшэу къызэкӀигъанэу къэгубжыгъ. 7ЕтӀанэ цуитӀур пкъырыпкъэу зэхиупкӀэтагъэх, Саулрэ Самуелрэ ауж имыхьэхэрэм зэкӀэми яцухэм джащ фэдэу зэрадэзекӀощтхэр лӀыкӀоу къаӀофтагъэхэм ащ лъыпытэу Израилым ичӀыпӀэ пстэуми къэбарэу аригъэхьыжьыгъ. Арти Зиусхьаным къаришӀэн ылъэкӀыщтым цӀыфхэр зэкӀэ ыгъэщынагъэхэти, зэгурыӀохи, зыч-зыпчэгъоу заом зэдежьагъэх. 8КӀохэзэ, Бэзэкъ зынэсхэм ахэр Саул къызызэпеплъыхьэхэм, Израилым щыщхэр нэбгырэ мин шъищ, Ехъудэм щыщхэр нэбгырэ мин щэкӀ хъухэу къычӀэкӀыгъ. 9Арти лӀыкӀоу къэкӀуагъэхэм араӀуагъ: «ГъылыӀад ит къалэу Яощ дэсхэм макъэ яжъугъэӀужь: неущ тыгъэм къыгъэплъэу зыригъажьэкӀэ, ӀэпыӀэгъур къышъулъыӀэсыщт». ЛӀыкӀохэм къагъэзэжьи, Яощ дэсхэр къэбарым зыщагъэгъуазэхэм, адрэхэр лъэшэу гушӀуагъэх. 10Яощ дэсхэм Нэхъащ къэбар фарагъэхьыжьыгъ: неущ тыкъышъупэгъокӀыщтышъ, шъузыфаер къыташъушӀ. 11КъыкӀэлъыкӀорэ мафэм Саул ицӀыфхэр купищэу зэхидзи къежьэхи, тыгъэр къызэрэкъокӀэу Ӏамонхэм яуцупӀэ къэсыгъэх. Тыгъэнэстыр къэхъуфэ ахэр зэхакъутагъэх. Псэоу къэнагъэхэр пэкӀэ-пакӀэу зэбгырычъыжьыгъэх.

12Ащ ыуж цӀыфхэм Самуел къыраӀуагъ: «Тыдэ щыӀэха „Саула ыкӀи типачъыхьэщтыр?“ зыӀуагъэхэр? Ахэр къытӀэкӀэжъугъахьэхи, апсэ хэтхыщт». 13Ау Саул ар афидагъэп: «Мы мафэм зыми ыпсэ хэпх хъущтэп, сыда пӀомэ Зиусхьаным непэ Израил къыгъэнэжьыгъ».

14Ащ ыуж Самуел цӀыфхэм ариӀуагъ: «Гъылгъал тыкӀонышъ, пачъыхьэр зэрэтехьэрэр къэдгъэшъыпкъэжьыщт». 15Арти цӀыфхэр зэкӀэ зэрэзэхэтхэу Гъылгъал кӀохи, Зиусхьаныр ишыхьатэу Саул Гъылгъал ипачъыхьэу тырагъэхьагъ. ЕтӀанэ зэгурыӀоныгъэ къурмэнхэр Зиусхьаным пае ашӀхи, Саули израил цӀыфхэри зэкӀэ лъэшэу ащ щычэфыгъэх.

Currently Selected:

Апэрэ Самуел 11: АдыТГ

Highlight

Copy