Rooma 5

Yallaalih imaanah salaam yaalliinim

1Amaydo, nanu imaanah nitxiqqiqhek sarrah, ni Maddara kin Yeesus Masiix araxah Yallaalih salaam lino. 2Kaa araxah lel kado adde nisbiteh nanino nicmadde imaanah orobne. Yallih nabneh caagak lel falinna. 3Tayim bisa maki, amaa tsabaaba curtayyo bahtam gantah neerhegemhi sabbatah, ninni tsabaabah falinna. 4Curtayyi lel xibare baaha, xibari lel cag baaha. 5Tamaa noh yomxoye Quddus kin Ufayi araxah Yallih kaxani ni afcaadodde xarhitemhi sabbatah, amaa cag ni mixoolaysha.

6Nanu taaneenit kiinuk, Masiix tamaa farhshiisha waqhtedde Yallih mashshi hin marah rabe. 7Xaqqi-wannat idhdhadde rabati saxte kinni, mece tiyahi idhdhadde rabo yafdibeti laakin waytimo maki. 8Laakin, nanu zambi-wannun kiinuk, Masiix nottah rabe, Yalli nottah leya kaxano lel taginah yaybulluwe. 9Amaydo, kado nanu kaa biiloh nitxiqqiqhek sarrah, tayimko ziyaada thummutuh kaa araxah Yallih kuraako ayidhdha gargeerime lino! 10Nanu cangit kiinuk nineh yekkemko, kaa Barhahi rabih araxah Yallaalih wagarneh nane, wagarnek sarrah lel ayidhdha ziyaada thummutuh kaa aniinah gargeerimno kino? 11Tayim bisa maki, kaa sabbatah wagare akko geyne ni Maddara kin Yeesus Masiix araxah Yallah falinna.

Rabi Adamko, aniina Masiixko

12 # Erhedhdhö 2:17; 3:6 Amaydo, inki xiyawtohi araxah zambi caalamadde akah orobeekah, zambi araxah lel rabi akah temeeteekah, ummanti zambe abemhi sabbatah rabi umman tiyalle tillallabte. 13Sercat yomxoyemko basolle zambi ta caalamalle yine, sercat alle anniinnixelle laakin zambi zambedde miloyyiiminna. 14Rabi laakin Adamko Moosa fanah, tamaa Adam idhdha xinayyoh zambe abinnixe marahi bukalle gantah tingiseh tine. Adam lel yamaato luuk yine tiyahi caynaako wulim kuuk yine.

15Nicmat muttuxuwa kee umaani inketta maki. Inki xiyawtih umaanih mango xiyaw rabeenimko, Yallih nicma kee amaa inki xiyawto, Yeesus Masiix, nicmah temeete muttuxuwa, mango maralle ayidhdha temmengeh tane. 16Yallih muttuxuwa lel amaa inki xiyawtih sabbatah yemeete zambih mawco balih maki. Inki xiyawtih umaaniiko yemeete firdi qitscat katayshe. Mango umaanik sarrah tomxoye nicmat muttuxuwa laakin asxaqqaq katayishshe. 17Rabi inki xiyawtohi umaanit sabbatah tingisemko, rakha kin nicma kee amaa ginah tomxoye xaqqi muttuxuwa kabbaate mari, inki xiyawto Yeesus Masiix araxah sinni aniinalle ayidhdha yangasoona kinooni!

18Amaydo, inki xiyawtih umaani umman marahi qitscat akah katayishsheekah, inki xaqqi abitto umman marahi asxaqqaq kee aniina katayishsha. 19Inki xiyawtohi xinayyi mango marak zambi-wannun akko akah abeekah, amaye balih inki xiyawtohi maabbo lel mango marak xaqqi-wannun akko abto kinon. 20Sercat umaani yaymango ciloh yemeete, zambi alle yemmengelle lel nicma sasante. 21Amaydo, zambi raba baaheh akah yingiseekah, nicma lel amayim balih xaqqi araxah tangaso kinni. Tayim lel ni Maddara kin Yeesus Masiix araxah umman geedit aniina bahta.

Currently Selected:

Rooma 5: SCC

Highlight

Compare

Copy