Waxye 2

Efesosulle tane kaniisa fanah

1Efesosulle tane kaniisahi malaykattolle taginah alle uktub: “Tamaa ishi mizgi gabadde malxina xutukta yibbirheh, malxina dahab qandel-defeenahi fanadde gerhati tayim arhxuk yane:

2‘Anu ku abittot, ku xawal kee ku sabre, amayim balih uma maraalih tadaw mirhictam aarhige. Laakin, makinooni hanuk tamaa sinnek fartottit aba mara ten icikkineyaako, zirablit yekkiinih yoh sugen. 3Atu curtayyo litom kee yottah arhxituk niya cidekkah caggaboytem aarhige. 4Laakin tamaa erherhih luuk tinito kaxano xabtemih kolle ibbirheh aniyo. 5Amaydo, awlaako raddeh tanitom xunsus; totoobeyaako lel, tamaa erherhih abte abittot ab. Akke wayemko, atu lel atoobe waytemko, emeeteh tamaa ku qandel-defeena tee caraako asac-isho kiyo. 6Mecemih laakin takke lito: tamaa anu gantah nicibiyo Nikolawosti marahi abittot nicibto’. 7#Erhedhdhö 2:9; Waxye 22:2; Yexetsqeel 28:13; 31:8Cokka leti, tamaa Ufayi kanaayisik arhxuk yanem yaabboo. Tamaa yamlike tiyah lel Yallih jannadde tane aniinat xarhaako akah beetaakah akko abo kiyo.”

Simurnalle tane kaniisa fanah

8 # Isayas 44:6; 48:12; Waxye 1:17; 22:13 Simurnalle tane kaniisahi malaykattolle taginah alle uktub: “Tamaa rabeyaako aniinalle gaxe erhedhdho kee sarroorimti tayim arhxuk yane:

9‘Ku waaxelta kee ku baaxa aarhige. Atu laakin gaddaale kito! Tamaa makinooni hanuk zirabah “Yahuud kino” yarhxe Sheethan sunagoogi, koh waatimeenim aarhige. 10Kolle yakko le camazaako mimashshiitin. Taykinna, tattacakkanoona ciloh ibliis sinko garo xabshedde cido le. Tamana lellecih lel waaxelsittoona kitin. Atu raba fanah umun tik, anu lel aniinat bor koh axawo kiyo’. 11#Waxye 20:14; 21:8Cokka leti, tamaa Ufayi kanaayisik arhxuk yanem yaabboo. Tamaa yamliketi malammit rabah biyaakito maki.”

Bergamosulle tane kaniisa fanah

12Bergamosulle tane kaniisahi malaykattolle taginah alle uktub: “Lillig lamma af-le sef le ti tayim arhxuk yane:

13‘Atu awla martam aarhige, tamaa Sheethan nugus-kursi alle yanekke kinni. Laakin yi migac qath-ishsheh tibbirheh tanito, tamaa Sheethan alle maralle umun kin yi shaahid Antibas sin fanadde yigdifin maxadde gantah yottah yaaminiinim mixinito. 14#Cadad 22:5,7; Gabbaacime Sercat 23:4; Cadad 25:1-3Yakko kibah, dagum kolle ibbirheh aniyo: dago mari Balcaam darse kataytaya sinadde yanin. Usuk tamaa Israa-eel cindham andafisho ciloh, usun asnaamah tinsiddiqhe folo beetoona kee uma-xibar akah abaanaakah Balaak yuyduruse. 15Amayim balih Nikolawosti marahi darse kataa mari koolih yanin. 16Amaydo, otoob. Akke wayemko, anu akkanih kolle emeeteyaako, tamaa inni afhi sefih aalih dhibbaw kiyo.’ 17#Muuca 16:14-15; 16:33-34; Yohannis 6:48-50; Isayas 62:2; 65:15Cokka leti, tamaa Ufayi kanaayisik arhxuk yanem yaabboo. Tamaa yamlike tiyah lel sucutte mannaako wulim akah axawo kiyo, cado dhayitto lel akah axawo kiyo, ta cusub migac alle yunkuttube dhayitto lel kabbaate tiyaako bextih walaa inketti miyaarhige.”

Tiyateyralle tane kaniisa fanah

18Tiyateyralle tane kaniisahi malaykattolle taginah alle uktub: “Bololta girah iggidin intit le, kaa iboobi lel cebedisheenih qarcoyshen naxasah akko higgid Yallih Barhi tayim arhxuk yane.

19‘Ku abittot, kaxano, imaan, khidma, curtayyo, amayim balih sarroorim ku abittotko afti ku abittot mango. 20#1 Nuguusa 16:31; 2 Nuguusa 9:22,30Laakin tayim kolle ibbirheh aniyo: tamaa nabiita ishek abta Yezaabelille alle curte. Ishe ishi darseh abteh yi khaddamte uma-xibar aboona kee asnaamah tinsiddiqhe folo akah beetaanaakah ten doolabte. 21Anu tataabo caashir akah oxoyeh iniyo, ishe laakin ishi uma-xibarko tataabo xinte. 22Taykinna, teya laxuu caratalle tee cido kiyo. Tamaa teelih yazniye mara lel tee abittotko atoobe wayenimko, naba waaxeltadde ten cido kiyo. 23#Zaabur 7:9; Ermiyaas 17:10; Zaabur 62:12 Tee cindham lel umammaatih ten agdafo kiyo. Umbuka kanaayis lel anu xangal kee afcaado yaklule tiya kiyom yaarhagoona kinon. Umman sina lel sin-sin abittot balih sinah axawo kiyo. 24Sinko gari Tiyateyralle yaneyak, inkoh ta darse katayinnixe marak, tamaa gari, “Sheethan addahi gelo” akko yarhxiinim labcaade wayteyak, tahe sinak arhxe: “Aki cuuka sinalle hayo makiyo.” 25Anu amiitem fanah bisa tamaa litiinimille isbita. 26#Zaabur 2:8-9 Tamaa yamlikeyaako yi abittot abayshima fanah yabbirhe tiyah, umbuka wathunhi bukalle reeza akah axawo kiyo. 27Usuk lel tamaa anu inneh inni Abbaako reeza akah kabbaateeka balih, birti iloh ten yigziyeyaako, kallat citror balih ten yagaadalo kinni. 28Anu lel maaxi xutukta akah axawo kiyo.’ 29Cokka leti, tamaa Ufayi kanaayisik arhxuk yanem yaabboo.”

Currently Selected:

Waxye 2: SCC

Highlight

Copy

Compare