Filibbi 1

Salaamta

1 # Fartottit hi Abittot 16:12 Masiix kin Yeesus garuuza kin Bawlos kee Timoteyosko, tamaa Masiix kin Yeesus araxah yinqiddise mari sinni kaniisat bukalle macalso aba mara kee kaniisadde yakhdume mara Filibbille taneya fanah:

2Ni Abba kin Yalla kee Maddara kin Yeesus Masiixko nicma kee maaxiyo sinlih takkoo.

Xamdishitnan kee dhaaco

3Umman gedda sina xunsuusah inni Yalla xamdishita, 4umman gedda inkoh anu sinah abinnan umman dhaaco xedenak kinni abam. 5Amayim lel, erherhaako kado fanah atin mece warehi warroyishnanadde litin gabat aglehi sabbatah kinni. 6Tamaa sinadde mece abitto erherhisheti aykee Yeesus Masiix lellec fanah abaysho kinamah thummut kiyo. 7Atin inkoh yi afcaadodde taniinimhi sabbatah, umbuka sinah axeesebem rumma kinni. Amayim lel umudhdhuweh iniyo gedda kee mece wareh deeso kee aysabat abak iniyo gedda, atin inkoh ta nicmadde yottaalih gaba tessegelliinih tanin. 8Masiix kin Yeesus kaxanoolih inkoh aaginah sinah saanamah Yalli yi shaahid kinni. 9Sin kaxani irhga kee umbuka kaslih ziyaada ammanguk yammango dhaaco abak aniyo. 10Tayim lel, ummanimko tashshem dooritteenih Masiix lellecih tsitstsiyam kee cadale hin mara tekkiinih sugtenyaako, 11Yallih nabne kee faylah, tamaa Yeesus Masiix araxah geytimta xaqqi daroh temmeegiinih sugtoona ciloh kinni.

Mece warehi amfaddag

12Yi saculo, tamaa yottalle tekkem, rummah mece warehi amfaddagah timficeh tanem taarhagoona sinak farha. 13#Fartottit hi Abittot 28:30Amaymih, anu Masiixih arhxiyuk umudhdhuweh aniyom, tamaa umbuka naba nugus dhawudhdha caskar kee umbuka aki raace marah timidhdhigeh tane. 14Tamaa saculko mango mari lel, yi madhdhuwah Maddaradde imaan abiteenimhi sabbatah, ziyaada fidbeelih mashshi hinnim Yallih waanitta waanishak yanin.

15Gari rummah ashshiino kee xarasa, gari lel mece farhih Masiix warroyshak yanin. 16Sarrat mari, anu mece warehi deesoh tadde gaxeh aniyom yeerhegiinih, kaxanooko abaanam kinni. 17Tamaa afti mari laakin, madhdhuwi bukadde yi biyaakoona loonim yekkeliinih, rummah akkekkah sinni nabsih kaxanoh Masiix warroyshak yanin. 18Aymi haye? Zirabah yekkeh, rummah yekkeh, farhe ginah Masiix warreyak yane, anu lel amaymih xedena.

Aniina Masiix kinni

Yoo, xedeno kiyo, 19amayim lel, tayim sin dhaaco kee Yeesus Masiix Ufayehi xatoh, yi muucah yakko kinam aarhige. 20Tayim yi naba ilalta kee yi cag kinniyaako, farhemih xoolashshiito makiyo. Kado gantah umman gedda balih, mango fidbeelih, hido aniinah, hido lel rabih, Masiix yi nabsedde yanabo kinni. 21Amayim lel yottah aniina Masiix kinni, rabaanam lel maksab kinni. 22Anu xazottaalih maro ekkemko, fire-le ciyyo liyo yaanam kinni. Awlihim dooram laakin maarhige. 23Ta lamma gondohi fanadde inqirqireh aniyo. Fertoh meceetih yoh tashshem kinamhi sabbatah, yi farhi yadiinih Masiixlih yakkiinim kinni. 24Laakin anu wafaalih anniyem fertoh sina farhshishsham kinni. 25Tayimih thummut ekkeh lel, atin imaanah tanaboona kee xedentoona, wafaalih inniyeh sinlih akko kiyom, eerhegeh aniyo. 26Malammih sinalle amiite gedda, yi sabbatah Masiix kin Yeesusudde litin cafad sinah yammango kinni.

27Sin ablo amiite gedda, hido dherhille aniyuk, inki ufayelle tisbitiinih, mece warehi imaanah inki afcaadoh andufuluk taniinim aabbo ciloh, sin gerhegerh Masiix mece wareh missilam yakkoo. 28Farhinnannimih lel tamaa sin didde kin maraako mimashshiitina. Tayim tamaa Yallaako kin, tenah liya, sinah laakin gargerti cado ishaara kinni. 29Tamaa sinah tomxoyeh tane nicma lel, kayyah taamanoona bisa akkekkah, Masiixih arhxitin gantah waaxelsittoona kinni. 30Tamaa yottaalih tublin, kado lel yottaalih tanem akko taabbin inki gixlodde nanino.

Currently Selected:

Filibbi 1: SCC

Highlight

Copy

Compare