Galaatiya 3

Imaanaha, woole sercat yarhxem abaanamaha?

1Ko duudit kin Galaatiyaati xiyawo! Miyatti sin yeshsheerexe? Yeesus Masiix sinni nifille masqalak takarime tiya balih maka meceetih sinah caddoyisheh iniyom. 2Iski inkettä sin essero: Atin Ufaye kabbatteenim sercat yarhxem abteenih kuuk yine woole, toobbiinim teemeniinihi? 3Tayidhdha duudit kitiini warak? Ufayeh erherhishsheenih, kado xazottah abayishshoona farhak taniini? 4Tayidhdhale sinni curtayyok foyya akko abteeni? Rummah lel foyya kuuk yine? 5Usuk tamaa Ufaye sinah yaxayeh, sin fanadde bexsishsham abati atin sercat yarhxem abteenih kinni woole, toobbiinim teemeniinihi? 6#Erhedhdhö 15:6; Rooma 4:3Abraahim: “Yallah yeemene, amayim lel xaqqedde akah loyyimte” akah yarhxiiniika balih kinni.

7 # Rooma 4:16 Irhiga haye, Abraahim cindham kin mari tamaa imaan-le mara kinon. 8#Erhedhdhö 12:3Kutuub, Yalli Aki-mara imaanah ten yasxaqqaqho kuuk yinem yookomeh yubleh: “Umbuka diika ku araxah barakä yaalloona kinon” arhxuk mece ware Abraahimih warishe. 9Amaydo, tamaa imaan-le mari, imaan-le kin Abraahimlih barakä-le mara kinon.

Xaqqi-wanna imaanah maro kinni

10 # Gabbaacime Sercat 27:26 “Inkoh tamaa Sercat Kitaabadde tunkuttubeh tanemih inkoh yim-izzizeh abinnixeti, abaaro-le kinni” yarhxiinim tunkuttubeh akah taneekah, inkoh sercat yarhxem abaanamadde cikkishita mari abaarot geridde yanin. 11#Xabaqquq 2:4Kado: “Xaqqi-wanna imaanah maro kinni” akah yarhxeekah, Yallih nifille sercatah yitxiqqiqheti miyanem mudhdhug kinni. 12#Leewiiti Sheekhino 18:5Sercat imaanadde cikittem maki, laakin: “Amayim abati akah maro kinni.” 13#Gabbaacime Sercat 21:23“Xarhak takariminnanti abaaro-le kinni” yarhxiinim tunkuttubeh akah taneekah, Masiix nottah arhxuk abaaro-le yekkeyaako, sercat abaarooko ni wazo yekkeh yane. 14Amayim lel, Abraahim barakä Masiix kin Yeesus araxah Aki-maralle tamaato ciloh, nanu lel imaanah Ufayi wacde kabbatno ciloh kinni.

Sercat kee wacde

15Yi saculo, xiyaw waanih misaal sinah axawo: xiyaw aben cahdedde gantah, inki gedda abayshimek sarrah, adde osati hido akko kalati miyane. 16#Erhedhdhö 12:7Kado, Abraahim kee kaa zarattoh wacde akah sayenih yinin. Kutuub mango marak: “Kaa zaritih” maki yarhxem. Laakin inkettak: “Ku zarattoh” kinni lel yarhxem, amaati lel Masiix kinni. 17#Muuca 12:40Anu arhxo farham tayim kinni: 430 iggidiyak sarrah yemeete sercat, amaa wacdek foyya abo ciloh, yookomeh Yalli abayshe cahde miyaylaye. 18#Rooma 4:14Miiraas sercat araxah yemeetemko, wacdi araxah miyamiite. Yalli laakin Abraahimih wacdi araxah akah yoxoye.

19Sercat aymih yomxoye haye? Tamaa wacde akah sayen zaratti yamiitem fanah, uma abittot ayim kinam xiyaa yayshadhdhago ossiime tiya kinni. Malaykutti araxah lel amaa fanti tiyahi gabaako kinni yomxoyem. 20Amaa fantiti inkettaako ziyaada yable tiya kinni, Yalli laakin inketta kinni.

21Amaydo, sercat inkoh Yallih wacdehi didde kinni? Maale haye! Aniina yaxaw dhiica sercat yomxoyeh yineh yakkeedo, thummutuh xaqqi sercat araxah akke dhaarhe. 22Tamaa Yeesus Masiixih yaaminiinih geytima wacdi, tamaa yaamine marah yamxawo ciloh, Kutuub ummannim zambi geridde yurhuwe.

23Kado, imaan amiitekkah, nindhibbirheh aykee yamaatole imaan yambulluwendah, sercat geridde numudhdhuweh nine. 24Amaydo, imaanah natxaqqaqho ciloh, Masiix yamiitendah sercat ni dhawrheena kuuk yine. 25Kado laakin, imaan yemeetek sarrah, kamboh amaa dhawrheeni geridde minanino. 26Amayim lel, Masiix kin Yeesusudde imaan araxah inkoh Yallih dhaylo kitin. 27Tamaa inkoh Masiixidde yinthimmiqheh yane marak Masiix xibar hashshitteenih tanin. 28Yahuuddo, hido Giriikh barha, garuzza hido finjat-wanna, labtiya kee saytiya barhishekkah, inkoh Masiix kin Yeesusudde inketta kitin. 29#Rooma 4:13Masiix mara tekkiinimko lel, amaydo Abraahim zara kitin, wacde balih lel yawrishe mara kitin.

Currently Selected:

Galaatiya 3: SCC

Highlight

Copy

Compare