Fartottit hi Abittot 28

Bawlos Maltalle

1Sarrah, nagaadde baarho gufneh, amaa jaziirak Malta akko yarhxiinim neerhege. 2Amaa dikti mari lel mangum noh raxmateenih, rob rado erherhisheyaako gallaco tinemhi sabbatah, gira hadig-isheenih meceetih ni kabbaaten. 3Bawlos boxooko daga takkem yesketteh giradde hayak, datala amaa girat lacnahi sabbatah tewceyaako gaballe akko sawalimte. 4Amaa dikti mari lel amaa datala kaa gabaako zallaf-arhxuk yublin gedda: “Ta xiyawti rummah nabsi-wanna kinni. Badko yisillime haaki, xaqqe decsitta sayi yalla isheh usuk wafaalih maro kaa mixabinna” sittiyak yerhxin. 5Bawlos laakin amaa datala giradde urgufe, walaa inki biyak migeyinna. 6Usun laakin duddube kee ger-heeko radeh rabam akkaluk sugen. Dherh waqhte ilaaleenih walaa inkim geye waye gedda, sinni mablo yisqiyyiriinih: “Tati yalla kinni” yerhxin.

7Kado, amaa makaanoh wakalelle, amaa jaziirah manabotta yakke Bobliyos akko yarhxin xiyawtih dhage tine, usuk lel meceetih gerhah ni kabbaateyaako adooxa max ni yeyseese. 8Bobliyosti abba lel lacna kee wazanat-gaxnanah laxuuteh carhah yine. Bawlos lel adde orobeyaako duca akah abeyaako gabub alle hayeyaako kaa uruse. 9Tayim tekkek sarrah lel, aki laxuu lem gantah amaa jaziiralle tineya yemeetiinih uren. 10Usun mangum ni xishmateenih, doonikih nadaw ugunnak gantah farhshishsham noh yoxoynih ni sukuukuwen.

Bawlos Rooma gufa

11Adooxa alsak sarrah, amaa jaziiralle dhamxin waqhte tillaabishsheh tine Aleksaanderiyaati doonik ganga kin orriime yallit siile#28:11 ganga kin orriime yallit siile Kastor kee Bollukus akko yarhxin Roomaati yallit, badah gerha mara dhawudhdhaya kinon. h leyadde korneh ugunne. 12Amakkeeko Sirakuse gufneh, amalle adooxa lellec sugne. 13Amakkeeko tillabneh Reegiyon gufne. Inki lellecik sarrah, junuub xaaxatti uguteyaako, malammit lellec Botiyoloy gufne. 14Amalle sacul geyneyaako, tenlih amalle malxina lellec sugno ni esseren. Sarrah Roomalle nemeete. 15Amalle tine sacul ni ware yoobbin gedda, ni kabbaatoona Abbiyos Cadaaga kee Adooxa Dhintima fanah yemeetin. Ten yuble gedda, Bawlos Yalla cawwatoyshiteyaako niya abite. 16Rooma gufne gedda, Bawlos amaa kaa dhawrha caskartoolih ulah yakko izne geye.

Bawlos Roomalle

17Adooxa lellecik sarrah, amaa wakalih Yahuud makaabunlih akah deecimeyaako yekettin gedda: “Yi saculo, anu ni xiyaw yakko ni abbubhi caydahi didde kinam maabinniyo haaki, Yerusaalemko madhdhuwadde Roomaati xiyawhi gabadde yi hayen. 18Usun yi yimirmirinyaako, rabi akah missil cagab yodde migeyinnoonimhi sabbatah, yi dhirhiyoona farhen. 19#Fartottit hi Abittot 25:11Amayim Yahuud xinen gedda laakin, inni xiyaw akah aksisem maliyo hanuk, Roomaati naba nugusulle yigbaa-arhxo inqissibe. 20Tayimhi sabbatah kinni, amaydo, sin geyo kee sinlih waanisho sinah deecimem. Anu lel Israa-eel caghi sabbatah kinni ta katiinah umudhdhuweh aniyom” akko yerhxe. 21Usun lel: “Ku sabbatah Yahuudiyaako jawawub ni migufinna, saculko lel yemeeteh noh warisheti hido lel ku sabbatah umam nok yerhxeti miyane. 22Ta diin filci ummanille xammitimam naarhigek, tayimhi zacabah ku mablo ayim kinam kooko naabbo farhna” akko yerhxin.

23Sitta adde geyan lellec abeenih lel, tamaa usuk adde orobak yinelle mango mara yekkiinih alle yemeetin. Usuk lel dhaxiineeko kaso fanah inkoh Moosat Sercat kee Nobowaako mangum akah caddoyshak, Yeesus zacabah ten yashshamano farheyaako lel, Yallih nigsinnah zacabah akah yishhide. 24Gari usuk yerhxemih yeemenin, gari laakin maamaninnooni. 25Bawlos ta katayta abayshimat waani yerhxek sarrah, sinne-sinneh yenzeegexiinih sittiyaako barhsimen: “Quddus kin Ufayi nabii Isayas araxah abeh tayim arhxuk sin abbublih waanishe gedda meceetih yine:

26 # Isayas 6:9-10 ‘Ta xiyawalle alle aduwaaki:

“Rummah taabboona kitin laakin caduruh tafhamoona makitiini,

rummah tabloona kitin laakin caduruh macalsittoona makitiini”’

akko erhex.

27‘Ta xiyawhi afcaado daabba tekkeh tane,

ten cokkakalle lel maabbo alle siriya,

sinni intit lel alifeenih yanin.

Tayim akke waytaado,

sinni intitih yubliinih,

sinni cokkakah lel yoobbiinih,

sinni afcaadoh lel seleenih,

yottalle gaxe dhaarhen,

anu lel ten uruse dhaarhe.’

28Amaydo, ta Yallahi garger Aki-marah tedeeh tanem sinah tamadhdhago; usun lel kabbaatoona kinon.” [29Usuk tayim waanishe gedda, Yahuud sinne-sinneh ankeexeduk yedeyin].

30Bawlos amaa isheh yessekeere caredde lamma iggida kaamil suge, kayyalle amiituk yine mara lel inkoh kabbaatak yine. 31Yallih nigsinna warroyshak, Maddara kin Yeesus Masiix zacabah cadimbililih deeso maleh aydurusuk yine.

Currently Selected:

Fartottit hi Abittot 28: SCC

Highlight

Compare

Copy