Remarya 15
15
Djib tiro djipen i vavarenge oun gar touke kokres
1Mer, kay ham zorelo an o patsepen, hounte dikas ap kolende, kay hi gar zorelo an o patsepen, te hidjras mer lentsa, hoy lenge pharo hi. Mer hounte dikas gar ap mende kokres, te djal menge mishto. 2Hakeno mendar hounte djivell yaake, te dikell o vavar lačes ap leste oun vell zorleder an o patsepen. 3Ninna o Yezous Kristo dikas gar ap peste, te djal leske mishto. An o Debleskro lab hi činlo pral leste: O praasepen kol menshendar, kay o Debles praasan, peras ap leste.#15:3 dik: Debleskri gili 69:10
4Lauter kova, hoy an o phouro tsiro an o Debleskro lab činlo vas, vas činlo, te las mer nevi zoor dran o Debleskro lab, oun das maro patsepen gar pre, oun dikas ap ko lačepen, hoy o Devel men della, an ko tsiro hoy vella. 5Oun o Devel, koon dell i nevi zoor oun krell t'men zoreles, te denn t'maro patsepen gar pre, lestar mangau me, te vell t'men yek dji oun yek djipen, yaake har o Yezous Kristo kova t'mendar kamella. 6Palle nay sharenn t'mer o baro Debles halauter khetne. Yob hi o dad maro rayestar, o Yezous Kristestar.
Boud menshe ap i tseli phoub sharenn o Debles
7Yaake har hi o Yezous Kristes i dji t'menge, yaake hounte vell t'men i dji yek o vavareske! Palle vell o Devel sharedo. 8Oun me penau t'menge: O Yezous Kristo vas i biboldenge, te dikenn le, o Devel rikrell ap peskro lab, hoy das yob lengre phourende.
9Oun yob vas t'menge, kay han kek bibolde, te sikrell lo t'mende o Debleskro baro lačepen, yaake te sharenn t'mer o Debles. An o Debleskro lab hi činlo, har penell o Yezous Kristo ap o Debleste: Doleske sharau tout mank kolende, kay hi kek bibolde, oun givau gilya touke.
10Kote hi ninna činlo: T'mer, kay han kek bibolde, avenn barhteles khetne i biboldentsa. Yon hi kol menshe, kolen yob peske vin rodas! 11Oun ninna hi činlo: T'mer lauter, kay han kek bibolde, sharenn o Debles! T'mer, kay venna dran i tsele themma, givenn leske gilya! 12Oun o Debleskro rakepaskro, o Yesaya, penas glan i rah tsiro: Koy vell i morsh i menshendar, kolengro dad hi o Isay,#15:12a O Isay hi o Davideskro dad. kova vell o ray pral i menshende an i tsele themma. Ap koleste dikenn le, te vell lo lenge lačes.#15:12b dik: Yesaya 11:10
13Oun o Devel, kolestar o tselo lačepen vella, ap koleste dikah, lestar mangah, te venn t'mer čalo i barhtyatar an o dji dran t'maro patsepen, yaake te djinenn t'mer: Ko lačepen, hoy dell men o Devel an o tsiro, hoy vella, kova vell čačepah. Oun o Debleskro Dourho dell t'men i zoor, te dikenn boud oun boudeder ap o Debleste.
O Pauleskri boudi
14Mire phrala, me djinau čačepah, t'maro dji hi pherdo lačepen. Oun t'mer djinenn lauter, hoy o Devel t'mendar kamella. Yaake nay sikrell ko yek o vavareste o čačo drom. 15Ninna te djinau kova, činom t'menge pral boud koova an kava liil. Me činom zorele labentsa, te bistrenn kova gar. Koy boudi das man o Devel an peskro lačepen. 16Yob bičras man, te boudrap o Yezous Kristeske oun te djap pash kolende, kay kek bibolde hi, te sikrap len o Debleskro drom. Yaake hom har i rashay, kay anell kol menshen, kay kek bibolde hi, pash o Debleste. Oun o Devel dell len peskro Dourho, te venn le leskro. Oun yob dikell lačes ap lende.
17O Yezous Kristo das man kay boudi. Doleske ladjap gar, te rakrap pral kova, hoy krau o Debleske. 18Me kamau gar te rakrap pral vavar koova har pral kova, hoy kras o Yezous Kristo mank kolende, kay kek bibolde hi. Dran maro rakepen oun mari boudi anas o Yezous Kristo len pash peste, te shounenn le ap leste. 19Oun yob sikras peskri zoor, har kras o Debleskro Dourho baro koova, hoy kek vavar nay krella. Yaake penom o lačo lab o Yezous Kristestar an o tselo them troul o foro Yerusalem bis an o them Illirikum. 20Ap o tselo drom penom ko lab kokres kote, kay o Yezous Kristo gar prindjedo his, yaake te penell kek ap mande: “Tou boudreh kote, kay i vavar glan toute boudras.”
21Yaake krom kova, hoy an o Debleskro lab činlo hi: Kolenge či lestar penlo vas, kolla prindjrenn les kanna. Kolla, kay lestar či shounan, kolla hayvenn kanna.
O Paulo kamell an o foro Rom te vell
22Doleske his man kek tsiro te vap pash t'mende. 23Kanna hi miri boudi an kol themma kerdo. Oun me nay vau pash t'mende. Yaake kamom me kova glan boud bersha te krap. 24Ap miro drom an o them Spania, kamoms te dikap t'men, oun te ačap i tikno tsiro pash t'mende. Te hom t'mentsa khetne, lau nevi zoor. Palle djau doureder, oun t'mer nay denn man lauter, hoy man hounte vell ap o drom.
25-26Glan kova, kay vau pash t'mende hounte djap an o foro Yerusalem, te anap kote i čorvele patslenge kol love, hoy i patsle an i themma Macedonia oun Akaya kolenge khetne čivan. 27Kol love dan le pengro tselo djiyestar. I patsle an o foro Yerusalem penan o Debleskro lačo lab kolenge, kay kek bibolde hi. Yaake hounte denn i patsle, kay kek bibolde hi, i biboldende lauter kova, hoy hounte vell len djipaske. Koya hi lengri siyaan. 28Te dom i patslen an o foro Yerusalem kol tsele love, palle kamau ap o drom an o them Spania pash t'mende te vell. 29Oun me djinau, te vau pash t'mende, anau t'menge i tseli barht, hoy vella o Yezous Kristestar.
30Mire phrala, mangau t'mendar an o lab maro rayestar o Yezous Kristestar, oun an o kamlepen, hoy o Debleskro Dourho men das: Mangenn mantsa khetne o Debles o tselo djiyeha, 31te vap me gar dino an i vasta kolendar, kay patsenn gar ap o Debleste an o them Youdea. Mangenn les ninna, te lenn kol patsle an o foro Yerusalem kol love lačes pre, hoy anau lenge. 32Palle nay vau barhteles pash t'mende, yaake har kamell o Devel, te lap nevi zoor pash t'mende.
33O Devel djal t'mentsa lauterentsa oun dell t'men peskri barht an o dji! Amen.
Currently Selected:
Remarya 15: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
