Remarya 14
14
Ma rake djoungeles pral o vavareskro patsepen!
1Lenn ninna koles lačes pre, kay hi gar zorelo an o patsepen. Ma čingrenn leha pral o patsepen! 2Ko yek patsell, kek rhapen hi pale-čiddo. Ko vavar, kay hi gar zorelo an o patsepen, kova patsell, te nay rhal lo kek mass.
3Kova, kay rhal o mass, hounte rikrell pes gar feteder har ko vavar, kay rhal kek mass.
Kova, kay rhal kek mass, hounte penell ko vavareske gar: “Kova, hoy tou kreh, hi pale-čiddo koova.”
O Devel čivas hake douyen an o čačepen. 4Kova hi gar tiro koova, te peneh pral i vavareskro boudepaskro: “Kova, hoy yob kras, hi gar mishto.”
Leskro ray kokres nay penell: “Kova hi mishto, kova hi gar mishto.”
Oun maro ray, o Yezous Kristo, les hi i zoor, te rikrell lo les pash peste, yaake te ačell lo tardo an o patsepen.
5Yekeske hi yek dives i Debleskro dives, ko vavareske hi lo kova gar. Hakeno hounte djinella peske, kova, hoy yob krella, hi čačo oun lačo. 6Koon rikrell o Debleskro dives bareder har i vavar divessa, krell kova o Debleske. Koon patsell, te nay rhal lo lauter, krell kova o Debleske oun parkrell pes pash leste. Koon patsell, te nay rhal lo gar lauter, kova krell les ninna o Debleske, oun sharell o Debles ninna.
7Kek mendar djivell peske kokres, oun kek mendar merell peske kokres. 8Te djivah, djivah o Debleske. Te merah, merah o Debleske. Hako tsiro ham mer leskro, – an o djipen har an o merepen. 9O Yezous Kristo meras, oun vas pale djido, te vell lo o ray pral kolende, kay moulo hi, oun pral kolende, kay djido hi.
10Kek t'mendar hounte penell pral i vavar patsleste: “Kova djal gar mishto ap o Debleskro drom.”
Kek t'mendar hounte dikell tele ap i vavar patsleste. Ko dives vella, kay rakrell o Devel pral hakeneste mendar o čačepen vin.
11An o Debleskro lab hi činlo: O Devel penell: Yaake har čačo hi, te djivau, yaake perell hakeno glan mande tele, te sharell lo man. Oun hakeno penella: Tou hal o baro Devel.#14:11 dik: Yesaya 45:23-24
12Ap ko dives vell hakeno mendar glan o Debleste oun hounte penell leske, hoy yob kras oun hoske yob kova kras.
O tikno oun o baro patsepen
13Doleske hounte penell kek mendar ap o vavareste: “Tou djal gar mishto ap o Debleskro drom.”
Denn yak, te čivenn t'mer i vavar patsleske či an o drom, yaake te djinell lo bouder gar, har te djal lo ap o Debleskro drom. 14Me djinau zoreles, – maro ray Yezous sikras man kova: Dell či, hoy hi pale-čiddo an peste. Kova kokres, kay patsell, te krell čomone les pale-čiddo, koleske hi kova pale-čiddo. 15Te dikell tiro phraal, te rhah tou halauter, oun kova doukell les an peskro dji, palle kameh tou les gar o djiyestar. O Yezous Kristo meras ninna koleske. Doleske de yak, te anell savo tikno koova les gar o Debleskro dromestar tele. 16Krenn či, te rakrenn i vavar djoungeles pral kova, ninna te hi kova, hoy t'mer krenn, mishto an t'mare yaka! 17Kolla, kay o Devel o ray pral lende hi, kolla čingrenn gar pral kova, hoy yon rhana oun hoy yon piyenna. Na-a. Yon djivenn pal o čačepen, hoy o Deblestar vella oun čingrenn gar, oun o Debleskro Dourho dell len barht an o dji.
18Koon yaake djivella, kova sharell o Yezous Kristes. Ap leste dikell o Devel lačes. Oun pash i menshende hi lo an-diklo.
19Kanna kras lauter, te vell kek čingepen mank mende. Kras kova, hoy krell men lauter zoreles an o patsepen. 20Ma krenn kova paash, hoy o Devel kras! Ninna te hi kek rhapen pale-čiddo an peste, nay vell yekes i pharo dji, te rhal lo čomone, hoy leske pale-čiddo hi. Oun kova hi gar mishto. 21Hi feteder, te rhah tou kek mass oun te piyeh tou kek mool oun kreh či, hoy anell tiro phrales o Debleskro dromestar tele.
22Kova, hoy tou patseh an kava koova, djineh tou oun o Devel kokres. Tou hounte sikress les lende gar. Barhtelo hal tou, te kreh lauter yaake, te hounte peness touke gar: Kova, hoy krom, his gar mishto. 23Koon rhal čomone, oun leskro dji vell pharo koy pashel, kova kras čomone, hoy vas gar dran o patsepen. Doleske anas lo doosh ap peste. Kova, hoy vell gar dran o patsepen, anell doosh ap mende.
Currently Selected:
Remarya 14: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
