Nahum 2
2
O foro Ninive djal tele
1T'mer menshe an Youda, dikenn:
Pral i berge vell i morsh,
kay anell i lačo lab.
Yob penell: O kourepaskro tsiro hi trouyel!
Rikrenn pale t'mare bare divessa oun avenn barhtelo koy dren!
Denn o Debleske kova, koleske t'men sovel dan.
Ko čilačo, kay halauter paash das,
vell bouder gar an t'maro them.
Yob hi bouder gar koy.
2T'mer menshe an o foro Ninive,
kourepangre venna, te krenn le t'maro foro paash.
Denn garda ap o foreskri massouri!
Rikrenn i dromma an i yak!
Lenn i rhare an o vast!
Anenn t'mare tsele lourden khetne!
3O Israel his har i shoukar drakengro them,
hoy i randepangre khetne stakran,
oun lengre drakengre kashta tele dan.
Kanna dell o baro Devel o Yakobeskre čavende pengro barepen pale pale.
4Kol lourde venna, te kourenn le pen touha, Ninive!
I kourepangre hidjrenn lole shilte oun lole gada.
O saster ap i kourepangre vourdya dikell vin har yag.
Oun i graya nashenn sik.
5Har divyes oulerenn i vourdya ap i dromma!
Yek hi sikeder har o vavar.
Yon dikenn vin har yag,
oun hi sik har koy yag, hoy har i karepen ap o bolepen pre oun tele djal.
6I pralstoune lourde venn khetne gole dino.
Yaake sik nashenn le, te perenn le pral pengre pire.
Pash o foreskri massouri nashenn le,
oun čivenn pengro zorelo khatepen pre.
7Kol voudya pash i panya venn pre kerdo.
Oun i daar taprell halauteren an o baro rayeskro kheer.
8Koy rani vell pandles krik anlo.
Lakre djouvyengre boudepangre rovenn har i taube,
oun denn penge ap pengro beč.
9Halauter nashenn dran o foro Ninive
har pani, hoy dre-pandlo his, vin nashell, te vell o voudar pre kerdo.
Ačenn tardo! Ačenn tardo! denn le gole pal lende.
Kek rissrell pes!
10T'mer lourde, randenn roup, randenn sonakay!
O foro hi pherdo bravlepen,
pherdo kouč koova!
11Khetne stakedo oun vi-čoredo vell o foro.
Halauteren hi darene djia,
lengre herya trissenn i daryatar.
Yon djan bango i doukatar,
lenge mouya hi parno.
12Hoy vas kanna dran o foro Ninive?
O foro his har i khatepen,
kay o levo oun i levetsa pengre ternentsa trouyel nashan,
oun kek koy his, kay lenge kote nay daar krals.
13O levo randas oun tapras yaake boud firhen,
te van leskre čave oun leskre romya čalo.
Leskro khatepen kras lo pherdo koleha, hoy lo randas oun maras.
14Dik, penell o baro Devel, ko ray pral o bolepen oun i phoub,
me djau ap toute,
oun rhačrau tire kourepangre vourdya.
Oun o rharo marell tire čaven.
Tou aneh bouder gar randedo koova khere.
An kek tsiro bičreh tou bouder bičepangren vin,
kay penenn i menshende an vavar themma,
hoy te krenn le.
Currently Selected:
Nahum 2: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
