Nahum 1
1
1Kava hi ko liil, kay činlo hi, hoy rakras o baro Devel pral o foro Ninive. Yob sikras kova peskro rakepaskreste, o Nahoum. Kova vas dran ko gab Elkosh.
O baro Devel hi rhoyedo pral o foro Ninive
2O baro Devel hi i Devel, kay kamell, te mangenn i menshe kek vavar debles an har les kokres.
Leskri rholi vell pral kolende, kay hadenn pen pral leste.
Kolen, kay kamenn lestar či te djinell, dell yob i phagi.
Oun bistrell gar, hoy yon ap leste kran.
3O baro Devel vell gar sik rhoyedo.
Les hi bari zoor,
oun čačepah, hakeneste, kay doosh ap peste anas, dell yob peskri phagi.
Kote, kay o baro Devel djal, phourdell i zorelo dourho.
Oun i volke hi har koy čik, hoy leskre pire pre vitsrenn.
4Yob čingrell ap o baro pani, oun o pani djal krik.
Oun kol lengste panya nashenn bouder gar.
O zenlepen an o them Bashan oun i rouka ap i berga Karmel merenn tele.
Ninna i bloume ap i berga Libanon merenn.
5I bare berge trissenn glan leste,
oun kol tikne berge perenn khetne.
Yob te vell, palle hadell pes i phoub glan leste,
oun kolla, kay ap late djivenna, trissenna.
6Koon nay ačell tardo glan leskri rholi?
Koon nay ačell djido, te vell lo rhoyedo?
Leskri rholi rhačell har i yag.
Ninna i berge phagenn an kotya glan leste.
7Kamles hi o baro Devel.
Yob prindjrell kolen, kay ap leste dikenna.
Yon nay khatrenn pen pash leste an phare tsirya.
8I baro zorelo panyeha khossell lo o foro krik kolendar, kay hadan pen pral leste.
Oun an i kali rat tradell lo len.
9T'mer hadenn t'men pral o baro Debleste. Hoske?
Yob dell t'men yek dap, te merenn halauter.
Koy bibarht vell gar i douyto kopo.
10T'mer han či har soubyengre kashta, hoy či-moldo hi,
oun hoy an i yag vitsedo venn,
oun pre-rhačenn har trouk phouss, te ačell či lendar pral.
11Dran toute, Ninive, vas ko morsh, kay hadas pes pral o baro Debleste,
oun koles čilačepen an o shero his.
12Kava penell o baro Devel ap peskre menshende:
Ninna te hi kol kourepangre boud oun zorelo,
kay venn, te kourenn le pen t'mentsa,
yon venn khetne dino oun merenna.
T'mende dom i phagi – kanna hi doha!
Kanna krau me kova gar bouder.
13Kanna phagau koy zoor, hoy i Assiryen pral t'mende hi,
– koy zoor, hoy har ko kasht hi, hoy i groumyat troul peskri meen hi.
Oun kol shelle, hoy pandenn t'men, činau paash.
14Ap i menshende an o them Assour penell o baro Devel:
Kek čave venn t'men, kay t'mare familyengre laba doureder hidjrenn.
Dran i khera t'mare deblendar vitsrau i tsele figure vin.
Me krau t'menge i grufta,
t'maro djipen his čičeske.
Currently Selected:
Nahum 1: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
