Mika 1
1
O Devel anell i phagi pral o them Israel
1Kava hi i lab o baro Deblestar, hoy penas lo ap o Mika dran Moreshet an ko tsiro, kay o Yotam, o Ahas oun Hiskiya i bare raya pral o them Youda his. An ko tsiro sikras les o baro Devel, hoy pral Samaria oun Yerusalem vella.
2Shounenn t'mer tsele themma!
Denn yak, t'mer ap i tseli phoub!
O baro Devel, maro ray an o bolepen,
kamell t'mentsa te rakrell pral kova, hoy kran!
3Dikenn, o baro Devel djal vin dran peskro kheer,
oun vell tele oun djal pral i berge ap kay phoub.
4Tel leskre pire venn i berge tikno
har i momeli, hoy tele rhačell,
oun perenn tele an i tala,
yaake har o pani i berga tele nashell.
5Kova halauter vell dran o čilačepen, hoy o Yakobeskre čave kran.
O kheer Israel djas peskro Debleskro dromestar tele.
Koon anas i Israelitarya yaake dour, te moukan le pengro Debleskro drom?
Kova his o foro Samaria!
Koon anas o kheer Youda yaake dour, te mangan le vavar deblen an?
Kova his o foro Yerusalem!
6Doleske krell o baro Devel, te vell o foro Samaria khetne dino bis ap i telstoune barra.
Lestar ačell či pral har barra.
Kolen vitsrell lo an i tala.
Kote kay o foro tardo his, venn drakengre rouka an i phoub čiddo.
7I tsele figure, hoy i menshe an-mangan, venn an kotya phagedo.
Ava, kol rhorhene debla venn paash dino.
Oun kova, hoy anan i menshe an i khera kol rhorhene deblendar, vell rhačedo.
I menshe an Samaria nashan vavar deblenge palla har i loubni i morshenge palla nashell.
Yaake lan le kava tselo koova khetne.
Kolla, kay venn oun randenn len vin, lenn kava koova pentsa khere,
oun anenn les an pengre deblengre khera.
O Mika rovell pral i forya an o them Youda
8Pral kova halauter hounte dap i bari gole oun hounte rovap,
me nashau pirkenes oun nanges, te sikrap har miro dji rovella.
Har i divyo djouklo dau gole,
oun rovau har ko čirklo, hoy kharell straussa.
9O doukepen o forestar Samaria nay vell gar sasto.
Koy bibarht vell ninna an o them Youda,
oun taprell o foro Yerusalem,
ko foro mire menshendar.
10T'mer menshe an Youda,
penenn kolestar či an o them Gat, kay i Filistarya djivenn!
Ma moukenn t'maro ropen kote te shounell!
Čivenn t'men an i čik an Bet-Leafra, te sikrenn t'maro djiyeskro douk!
11T'mer, kay djivenn an o foro Shafir,
djan an o pandepen, nanges oun an ladj.
I menshe an o foro Zaanan
djan gar vin dran lengro foro.
An o foro Bet-Ezel vell baro ropen shounlo.
Kote hi t'menge kek khatepen.
12Kolla, kay djivenn an o foro Marot,
rodenn pal yekeste, kay penell lenge lače laba.
Savo vell gar.
I bibarht o baro Deblestar vella,
oun hi tardo glan i voudya o forestar Yerusalem.
13T'mer an o foro Lakish,
lenn t'menge graya oun čivenn len glan i vourdya, oun nashenn t'menge!
T'mer anan i menshen dran o foro Sion ap o čilačo drom!
An t'maro foro vell savo čilačepen kerdo har an o them Israel.
14T'mer menshe an o them Youda hounte denn ninna o foro Moreshet-Gat pre.
I raya dran Israel patsenn, te vell lenge o foro Aksib ap i rig.
Yaake vell kova gar.
Kava foro vell lenge har i brounna, an kolate kek pani hi.
15T'mer, kay djivenn an o gab Maresha,
me anau koles pral t'mende, kay ninna t'maro foro dren lell.
Oun i bare oun an-dikle morsha an Israel nashenn penge, oun khatrenn pen pash o foro Adullam.
16Tou, Youda, mouk touke i balla tele te činell,
te ačenn touke kek balla ap o shero.
Tire čave, kolen tou yaake kameh, venn pandlo oun toutar krik anlo.
Currently Selected:
Mika 1: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Mika 1
1
O Devel anell i phagi pral o them Israel
1Kava hi i lab o baro Deblestar, hoy penas lo ap o Mika dran Moreshet an ko tsiro, kay o Yotam, o Ahas oun Hiskiya i bare raya pral o them Youda his. An ko tsiro sikras les o baro Devel, hoy pral Samaria oun Yerusalem vella.
2Shounenn t'mer tsele themma!
Denn yak, t'mer ap i tseli phoub!
O baro Devel, maro ray an o bolepen,
kamell t'mentsa te rakrell pral kova, hoy kran!
3Dikenn, o baro Devel djal vin dran peskro kheer,
oun vell tele oun djal pral i berge ap kay phoub.
4Tel leskre pire venn i berge tikno
har i momeli, hoy tele rhačell,
oun perenn tele an i tala,
yaake har o pani i berga tele nashell.
5Kova halauter vell dran o čilačepen, hoy o Yakobeskre čave kran.
O kheer Israel djas peskro Debleskro dromestar tele.
Koon anas i Israelitarya yaake dour, te moukan le pengro Debleskro drom?
Kova his o foro Samaria!
Koon anas o kheer Youda yaake dour, te mangan le vavar deblen an?
Kova his o foro Yerusalem!
6Doleske krell o baro Devel, te vell o foro Samaria khetne dino bis ap i telstoune barra.
Lestar ačell či pral har barra.
Kolen vitsrell lo an i tala.
Kote kay o foro tardo his, venn drakengre rouka an i phoub čiddo.
7I tsele figure, hoy i menshe an-mangan, venn an kotya phagedo.
Ava, kol rhorhene debla venn paash dino.
Oun kova, hoy anan i menshe an i khera kol rhorhene deblendar, vell rhačedo.
I menshe an Samaria nashan vavar deblenge palla har i loubni i morshenge palla nashell.
Yaake lan le kava tselo koova khetne.
Kolla, kay venn oun randenn len vin, lenn kava koova pentsa khere,
oun anenn les an pengre deblengre khera.
O Mika rovell pral i forya an o them Youda
8Pral kova halauter hounte dap i bari gole oun hounte rovap,
me nashau pirkenes oun nanges, te sikrap har miro dji rovella.
Har i divyo djouklo dau gole,
oun rovau har ko čirklo, hoy kharell straussa.
9O doukepen o forestar Samaria nay vell gar sasto.
Koy bibarht vell ninna an o them Youda,
oun taprell o foro Yerusalem,
ko foro mire menshendar.
10T'mer menshe an Youda,
penenn kolestar či an o them Gat, kay i Filistarya djivenn!
Ma moukenn t'maro ropen kote te shounell!
Čivenn t'men an i čik an Bet-Leafra, te sikrenn t'maro djiyeskro douk!
11T'mer, kay djivenn an o foro Shafir,
djan an o pandepen, nanges oun an ladj.
I menshe an o foro Zaanan
djan gar vin dran lengro foro.
An o foro Bet-Ezel vell baro ropen shounlo.
Kote hi t'menge kek khatepen.
12Kolla, kay djivenn an o foro Marot,
rodenn pal yekeste, kay penell lenge lače laba.
Savo vell gar.
I bibarht o baro Deblestar vella,
oun hi tardo glan i voudya o forestar Yerusalem.
13T'mer an o foro Lakish,
lenn t'menge graya oun čivenn len glan i vourdya, oun nashenn t'menge!
T'mer anan i menshen dran o foro Sion ap o čilačo drom!
An t'maro foro vell savo čilačepen kerdo har an o them Israel.
14T'mer menshe an o them Youda hounte denn ninna o foro Moreshet-Gat pre.
I raya dran Israel patsenn, te vell lenge o foro Aksib ap i rig.
Yaake vell kova gar.
Kava foro vell lenge har i brounna, an kolate kek pani hi.
15T'mer, kay djivenn an o gab Maresha,
me anau koles pral t'mende, kay ninna t'maro foro dren lell.
Oun i bare oun an-dikle morsha an Israel nashenn penge, oun khatrenn pen pash o foro Adullam.
16Tou, Youda, mouk touke i balla tele te činell,
te ačenn touke kek balla ap o shero.
Tire čave, kolen tou yaake kameh, venn pandlo oun toutar krik anlo.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.