3. Mose 6
6
Kava hounte vell kerdo i firheha, koleskro tselo mass rhačedo vell
1Oun o baro Devel penas ap o Mose: 2Pen ap o Aron oun leskre morsh čavende: Yaake hounte krenn t'mer o firheha, koleskro tselo mass mange rhačedo vell: Ko mass ačell ap i rhačepaskri koy tseli rat, bis te vell o nevo dives. Oun koy yag ap i rhačepaskri hounte rhačell i tseli rat oun djal gar vin. 3O rashay rivell peskro layntikro gad an, oun ninna kol layntikre rholopya. Yob lell i yagakri čik krik, hoy vell ko firhestar, koleskro tselo mass rhačedo vas. Oun yob čorell koy čik vin pash i rhačepaskri. 4Palle rivell lo peskre koola vin oun vavar koola an, oun hidjrell koy yagakri čik vin dran koy platsa, kay i menshe hi, ap i platsa, hoy hi djoudjo o Debleske. 5Oun koy yag ap i rhačepaskri rhačell doureder, oun djal ko tselo tsiro gar vin. Haki taysarla čivell o rashay kasht pre, oun koy pre ko mass ko firhestar, hoy vell tseles rhačedo, ninna kol kotya thulepen ko firhestar, hoy i menshe khetne rhan. Oun o rashay moukell lauter pre te rhačrell. 6Koy yag ap i rhačepaskri hounte rhačell hako tsiro, oun hounte djal gar vin.
Kava hounte vell kerdo o yarreha, hoy o Debleske anlo vas
7Oun yaake hounte vell kerdo o yarreha, hoy o baro Debleske dino vell. I rashaya dran o kheer Aron anenn les glan o baro Debleste pash koy rhačepaskri. 8Yek lendar lell kolestar i vast pherdo yarro, kay djet dren hi, ninna ko tselo soungepaskro koova, hoy pral o yarro čiddo hi, oun moukell kova ap o Debleskri rhačepaskri pre te rhačrell. Yaake sikrell lo, te hi ko tselo rhapen o baro Debleske. Oun ko lačo soungepen, hoy vell vin, soungell mishto o baro Debleske. 9-10Ko yarro oun ko djet, hoy pral ačell, kova hi o Aroneske oun leskre morsh čavenge. Te krenn le pengro maro kolestar, hounte čivenn le kek shoutlo yarro dren. Ap koy platsa glan o Debleskro plarhteno kheer hounte rhan le les. Kaya hi i Debleskri platsa. Kava rhapen dell o baro Devel lenge kolestar, hoy i menshe leske anan. Kova hi i Debleskro rhapen. Doleske nay rhan les kokres i rashaya, yaake har ninna ko mass kol firhendar, hoy venn maredo, te vell i doosh oun o pale-čiddo koova krik lino, oun o mass kol firhendar, hoy venn maredo, te vell i doosh pale mishto. 11Kokres kol morsh čave, kay venn o Aronestar, nay rhan kolestar. Kova hi hako tsireske lengro kotar kolestar, hoy i menshe o baro Debleske anenna. Hako vavar, kay taprell kova an, lell peskri phagi.
12Oun o baro Devel penas ap o Mose: 13Ap ko dives, kay vell yek dran o kheer Aron an peskri boudi dren čiddo, te vell lo miro rashay, hounte anell lo mange i khoro#6:13a yaake yek-te-paash kilogramme lačo yarro – yaake boud har ko rhapaske lino vell, hoy hako dives o baro Debleske anlo vell#6:13b ou bien: Kova krell lo palle hako dives. . Ko yek paash anell lo leske taysarlakro oun ko vavar paash rati.
14An o sasterno čaro vell o yarro khetne kerdo o djeteha, palle peklo, an kotya phagedo oun o baro Debleske rhačedo. Oun ko lačo soungepen, hoy vell vin, soungell mishto o baro Debleske. 15Oun ko rashay dran o kheer Aron, kay pal Aroneskro merepen o pralstouno rashay vell, kava krell kova, oun rhačrell ko tselo rhapen ap i rhačepaskri. Yaake hounte vell kava kerdo o baro Debleske hako tsireske.
16Hako kopo, kay anell i rashay peske i rhapen dran djob o baro Debleske, hounte vell ko tselo rhapen rhačedo. Kek rhal les.
Kava hounte vell kerdo i firheha, hoy i doshake maredo vell
17Oun o baro Devel penas ap o Moseste: 18Pen o Aroneske oun leskre morsh čavenge, har i firheha kerdo vell, hoy i menshe o baro Debleske anenn, te vell lengri doosh krik lino. Glan o baro Debleskro kheer, ap koy platsa, kay vell ninna ko firho maredo, koleskro tselo mass rhačedo vell, ap kay platsa maress tou ninna ko firhes, hoy hounte merell, te vell i doosh krik lino. O mass sau firhestar, hoy o Debleske anlo vas, nay rhan kokres i rashaya oun kek vavar. 19Ko rashay, kay leskre feteder kotya o Debleske rhačrell, rhal o mass ap i glanstouni platsa glan o Debleskro plarhteno kheer. Kaya hi i Debleskri platsa. 20Hako vavar, kay ko mass an-taprell, lell peskri phagi. Te vell čomone ko ratestar ap yekeskre koola, palle hounte thovell lo ko kotar ap i platsa, hoy djoudjo hi o Debleske. 21Te vas ko mass keredo an i piri, hoy dran čik kerdo vas, hounte vell koy piri an kotya phagedo. Te vas ko mass an i sasterni piri keredo, palle vell li zoryah oun panyeha vin thodo.
22I tsele morsha oun morsh čave an i rashayengre familye nay rhan kava mass. Yon kokres doleske, kay kava mass ko firhestar vas, hoy o baro Debleske anlo vas. 23Te vas o rat sau firhestar an o Debleskro kheer dren lino, te vell lauter pale mishto mank i menshende oun o baro Debleste, palle hounte rhal kek leskro mass. Kava mass vell an i yag rhačedo.
Currently Selected:
3. Mose 6: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
