Yona 4
4
O Yona rhoyrell pes pral o Debleskro lačepen
1Kova rhoyras o Yones oun rhačas an leste. 2Kote rakras lo ap o baro Debleste oun penas: “Ah, baro Devel, kova hi, hoy penom an ko tsiro, har khere homs. Doleske kamom sik an o them Tarsis krik te nashell. Me djinom, kay tou i lačo Devel hal, oun tout i baro dji hi. Tou veh gar sik rhoyedo. Oun tiro lačepen hi baro. Oun koy bibarht, kolah i menshen trad deh, khaytell tout pal kova. 3Oun kanna, baro Devel, le miro djipen mandar! Miro merepen hi mange mishto, boudeder har te djivap!”
4Oun o baro Devel poučas: “Havo čačepen hi tout, te rhoyress tout yaake?”
O Devel sikrell o Yoneste, kones lendar an o čačepen hi
5Oun o Yona djas vin dran o foro ap koy rig, kay o kham pre djala, oun kras peske i dacha dran patria, oun beshas pes koy tel, te dell les o kham gar čourye. Kote ačas lo, te dikell lo, hoy o foreha vella.
6Oun o baro Devel, maro ray, moukas i bour bare patyentsa dran i phoub bares te vell kote, kay o Yona beshdo his, te dell les o kham gar čourye, oun te djal leske feteder. Oun o Yona his boud barhtelo pral ko bour. 7O vavar dives, har o kham pre djal, moukas o Devel i kirmo te vell. Kova das ko bour čourye, kay meras lo tele. 8Oun har o kham ap o bolepen tardo his, moukas o baro Devel i tato phourdepen dran o moulo them te vell, oun o kham das yaake čourye ap o Yoneskro shero, te nashras lo peskri zoor. Oun yob kamas te merell oun penas: “Miro merepen hi mange mishto, boudeder har te djivap!”
9Oun o Devel penas ap o Yona: “Havo čačepen hi tout, te rhoyress tout yaake pral ko bour, hoy tele meras?”
Oun yob penas: “Čačepah, mange hi yaake čačo, te rhoyrap man, te kamau te merell.”
10Oun o baro Devel penas: “Tout khaytell ko bour, koleske či kral, te vell lo baro. Leske maral tout gar tele. An yek rat vas lo baro oun an yek rat meras lo tele! 11Oun man te khaytenn gar kol tsele menshe an o foro Ninive? Kate djivenn boudeder har 120.000 (sheel-te-biish-zerya) menshe, kay gar djinenna, hoy lačo oun čilačo hi#4:11 ap hebretikes: hoy čačes oun serves hi, oun koy pashel boud firhe!”
Currently Selected:
Yona 4: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
