Galatarya 4
4
Mer ham o Debleskre čave
1Me penau t'menge: O čavo, kay lell yek dives lauter peskro dadestar, koles hi či penepaske pral peskro bravlepen, yaake rah har yob tikno hi. Yob hi har i boudepaskro, ninna te hi ko tselo bravlepen leskro. 2Yob hi an i vasta kolendar, kay denn garda ap leste, bis te vell ko tsiro, kay leskro dad penas, te lell yob ko bravlepen.
3Yaake djas menge kova ninna. An ko tsiro, har gomme gar patslo hams, hams har tikne čave oun hams tel i zoor kolendar tardo, kay hi i raya pral kay phoub, oun hams ap lende pandlo. 4Har ko čačo tsiro vas, bičras o Devel peskro čaves. Kova vas i mensho, oun pandlo ap o Moseskre laba. 5Yob vas, te lell lo kolen vin, kay hi pandlo ap o Moseskre laba, yaake te vas mer o Debleskre čave.
6Kanna ham leskre čave. Doleske das o Devel peskro čaveskro Dourho an mare djia. Kova dell gole: Tata, miro dad!
7Kanna hal tou bouder gar har i boudepaskro, kay les či hi. Tou hal kanna o Debleskro čavo. Oun doleske leh tou ninna kova, hoy o Devel peskre čavende della.
Ma djan bouder ap o phouro drom!
8An ko tsiro, kay prindjran t'mer o Debles gar, hans vavarenge koy, har te vans le o Devel. 9Kanna prindjrenn t'mer o Debles. Feteder hi, te penau me: O Devel prindjrell t'men. Har nay čivenn t'mer t'men pale tel kol zorya, ap kolende i menshe pandlo hi? T'mer shounenn pale ap laba, hoy či moldo hi, oun an lende kek zoor hi. 10T'mer denn yak ap divessa, čonna, bersha oun bare tsirya oun rikrenn len dren. 11Me trashau t'menge, kay miri boudi pash t'mende čičeske his.
12Mire phrala, me mangau t'men, venn yaake, har me hom! Me vom ninna yaake har t'mer, vom yek, kay hi gar pandlo ap o Moseskre laba. Hans t'mer čilačo ap mande, 13har me o ersto kopo pash t'mende homs? Na-a, kova hans gar. T'mer djinenna, har me t'menge o Debleskro lačo lab penom, koy djas mange gar mishto. 14Ninna te his miro nasslepen t'menge gar shoukar, dikan t'mer gar tele ap mande, vitar gar bičran man t'mendar krik. Na-a! T'mer lan man pre, har te voms o Debleskro bolepaskro, har te voms o Yezous Kristo kokres.
15T'mer hans yaake barhtelo ap ko tsiro! Kay ačas t'mari barht? Ap ko tsiro lans t'mare yaka vin oun dans len mande.
16Kanna, kay penau t'menge o čačepen, han t'mer čilačo ap mande?
17Kova hi gar mishto, hoy kol menshe krenna, kay nashenn t'menge palla, te shounenn t'mer ap lende. Yon kamenn t'men mandar krik te lell, te nashenn t'mer lenge palla. 18Me penau t'menge: Nashenn kova palla, hoy lačo hi! Krenn kova hako tsiro, ninna te hom me gar pash t'mende!
19Mire phrala! Me kamau t'men o djiyestar, har te vans mire čave. Yaake har i djouvyat douka hi, te lell li i ternepen, yaake hi man pale douka t'menge, bis te vell o Yezous Kristo diklo an t'mende. 20Me kamoms, te voms kanna nay pash t'mende oun te rakroms nay yaake, te djal kova an t'maro dji! Me hom kate tardo oun djinau gar, hoy te krap.
O Abrahameskre douy čave
21T'mer kamenn yaake te djivell har o Moseskre laba penenna. Djinenn t'mer gar, hoy kol laba penenna? 22Kote hi činlo: O Abrahames his douy čave. Ko yekeskri day his i boudepaskretsa, i Hagar. Oun ko vavareskri day his i rayetsa, i Sara. 23I boudepaskretsa las o čaves, har menshe kova kaman.
I rayetsa las o čaves, har o Devel kova penas.
24Kal douy djouvya hi har douy koova, hoy o Devel i menshentsa an Israel vin kras. Yek koova kras o Devel lentsa vin ap i berga Sinay. Kote lan i menshe o Moseskre laba. Kol laba hi o ray pral lende, yaake har his i ray pral i Hagar tardo.
25I Hagar hi har i berga Sinay an Arabia. Yaake har kote i menshe ap o Moseskre laba pandlo van, yaake hi kanna o foro Yerusalem peskre menshentsa ap o Moseskre laba pandlo.
26Hi ninna i foro Yerusalem an o bolepen. Ko Yerusalem hi har i rayetsa, i Sara. Lakre čave hi gar pandlo ap o Moseskre laba. Yoy hi mari day. 27Latar hi činlo: Ab barhtelo, ninna te nay lal tou kek čave! De gole i barhtyatar, ninna te vas toutar kek ternepen boldo! Kanna hi tout boudeder čave har koya, kay his o romeha khetne.#4:27 dik: Yesaya 54:1
28Mire phrala, t'mer han o Debleskre čave. T'mer van boldo, har o Devel kova kamas, yaake har o Isaak boldo vas, har o Devel kova penas. 29An ko phouro tsiro his yaake: Ko čavo, kay vas boldo, har i menshe kova kaman, kova las koles palla, kay vas boldo dran o Debleskri zoor. Kova hi kava dives ninna yaake. 30O Debleskro lab penell koy pral: Trade koy boudepaskretsa peskro čaveha toutar krik, te lell yob gar peskro dadeskro bravlepen. Ko bravlepen lell ko čavo, koleskri day i rayetsa hi.#4:30 dik: 1. Mose 21:10
31Mire phrala, mer ham gar i čave kolatar, kay hi i boudepaskretsa. Mer ham i čave kolatar, kay hi i rayetsa!
Currently Selected:
Galatarya 4: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
