2. Mose 8
8
1Oun o baro Devel penas ap o Mose: “Pen ap o Aron, te rikrell lo peskro kasht pral i tsele panya, kolla, hoy nashenna oun kolla, hoy tardo hi! Oun mouk i djambe pral o tselo them Egiptia pre te vell.”
2Kote rikras o Aron peskro vast pral i panya an o them Egiptia. Oun i djambe van pre, oun his yaake boud, te his o tselo them lentsa pherdo. 3Koy van i dourkepangre oun kran pengri zoryah ninna yaake, oun moukan ninna djambe pral o them Egiptia te vell.
4Kote moukas o Farao o Moses oun o Arones pash peste gole te dell oun penas: “Mangenn o baro Debles, te lell lo i djambe mandar oun mire menshendar krik! Palle moukau i Israelitaryen te djal, te nay denn le o baro Debleske firhen temerl.”
5Oun o Mose penas ap o Farao: “Tou nay peneh mange, kaana te mangap touke oun i pralstunenge an tiro kheer, oun tire menshenge, te hounte merenn i djambe pash toute oun an tiro kheer, te ačenn le kokres an o Nil.”
6Oun yob penas: “Taysar.”
Oun o Mose penas: “Yaake har tou penal, yaake te dikess oun hayvess, te hi kek vavar yaake, har maro baro Devel. 7Oun i djambe hounte djan penge toutar oun dran tiro kheer, ninna dran i khera kol pralstunendar oun tire tsele menshendar. Kokres an o Nil ačenn le pral.”
8Oun o Mose oun o Aron djan dran o Faraeskro kheer vin. Oun o Mose das o baro Debles gole oun mangas les, te lell lo i djambe krik, hoy yob pral o Farao anas. 9Oun o baro Devel kras yaake, har o Mose lestar mangas. Oun i djambe meran an i khera oun glan i khera oun ap lengri harhetikri phoub. 10Oun yon čoran kol boud djambe khetne. Oun o tselo them khandas lendar.
11Har dikas o Farao, te hi i bibarht lestar krik, yaake har leske penlo vas, kote pandas yob pale peskro dji oun shounas gar ap lende. Yaake vas, hoy o baro Devel penas.
I triinti phagi: I matsille venn pral o them
12Oun o baro Devel penas ap o Mose: “Pen ap o Aron: Hade tiro kasht pre oun de an i čik ap i phoub! Palle vell koy čik an o tselo them Egiptia matsille, kay denn čourye.”
13Oun yaake kran le kova: O Aron hadas peskro kasht, oun das an i čik ap i phoub. Kote van i matsille pral i menshende oun firhende. I tseli čik vas matsille an o tselo them Egiptia. 14I dourkepangre kaman kova ninna pengri zoryah te krell. Oun yon hayvan les gar. Oun i matsille his ap i menshende oun ap i firhende.
15Kote penan i dourkepangre ap o Farao: “Kava hi o Debleskro vast!” Ninna kanna rikras o Farao peskro dji pandlo oun shounas gar ap lende. Yaake vas, hoy o baro Devel penas.
I starti phagi: Vavar matsille, hoy čourye denn, venna
16Oun o baro Devel penas ap o Mose: “Taysarla, te djal o Farao pash o pani Nil, dja pash leste oun pen ap leste: Kava penell o baro Devel: Mouk mire menshen te djal, te mangenn le man an! 17Te moukeh tou mire menshen gar te djal, palle moukau me vavar matsille te vell, hoy čourye denn. Yon venna pral toute oun tire pralstunende oun tire tsele menshende. T'mare khera venna pherdo matsille, hoy čourye denn. Ninna i phoub, kay i Egiptarya djivenna, vella pherdo lendar. 18Ap ko dives krau kova an ko them Gosen, kay mire menshe djivenna, vavarčandes. Kote venn kek matsille, hoy čourye denn. Yaake te dikess oun te hayvess, te hom me o baro Devel kate an kava them. 19Oun tou dikess, te hi vavarčandes pash mire menshende har pash tire menshende. Ko baro koova vell taysar pral t'mende.”
20Oun o baro Devel kras kova yaake. Oun i matsille, hoy čourye denn, van an o Faraeskro kheer oun an i khera kol pralstunendar oun an o tselo them Egiptia. Yaake vas kova i bari bibarht o tselo themeske.
21Kote moukas o Farao o Moses oun o Arones gole te dell oun penas ap lende: “Djan oun marenn kate an o them firhen t'maro Debleske!”
22O Mose penas: “Kova djal gar. Kol firhen, hoy mer maro baro Debleske marah, hi pale-čiddo pash i Egiptarya. Te marah mer kol firhen kote, kay i Egiptarya nay dikenn men, palle hadenn yon barra pre oun vitsrenn men lentsa moules. 23Triin divessa kamah mer te nashell dour an o moulo tato them dren, oun kote kamah mer maro baro Debleske firhen te marell, yaake har yob menge penas, te hounte kras kova.”
24Kote penas o Farao: “Me moukau t'men te djal, te nay marenn firhen leske an o moulo tato them. Ma djan yaake dour krik! Oun mangenn t'maro Debles mange!”
25Oun o Mose penas: “Ava, te djom me toutar vin, palle mangau o baro Deblestar, te djan i matsille, hoy čourye denn, taysar penge t'mendar lauterendar: toutar, o Farao, ninna tire pralstunendar oun tire tsele menshendar. Yek koova penau touke: Rike tiro lab! Ma pen pale, te moukals men te djal, te nay marah mer firhen o baro Debleske. – Oun palle moukeh tou men gar te djal.”
26Oun o Mose djas vin dran o Faraeskro kheer oun mangas o baro Debles leske. 27Oun o baro Devel kras yaake har o Mose lestar mangas, oun las i tsele matsille, hoy čourye denn, krik o Faraestar oun leskre pralstunendar, ninna leskre tsele menshendar, yaake te ačas gar yek pral. 28Oun ninna kava kopo pandas o Farao peskro dji oun moukas i Israelitarya gar te djal.
Currently Selected:
2. Mose 8: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
