Amos 6
6
I doosh i pralstunendar
1Djungeles djal kolenge, kay djivenn i shoukar djipen ap i berga Sion!
Djungeles djal kolenge, kay djivenn an o foro Samaria,
oun krenn pen kek shero!
Djungeles djal t'menge, kay han i raya pral Israel – koy an-dikli natsyona,
pash kolende i Israelitarya venna!
2[T'mer penenn ap i menshende:]
Djan an o foro Kalne! Oun dikenn, har ko foro hi!
Oun kotar djan doureder pash o baro foro Hamat!
Palle djan tele pash i Filistarya an o foro Gat!
Hi le zorleder har kal themma Youda oun Israel?
Hi lengro them bareder har t'maro them? Na-a!
3T'mer patsenn, kay hi o čilačo dives dour krik t'mendar.
Djinenn: Kova, hoy krenn,
moukell ko dives sikeder te vell,
kay čilače raya pral t'mende venn.
4Har djoungeles djal t'menge,
kay han kanna čiddo ap čibya shoukar kerde i dandentsa foun i elefante,
oun moukenn t'menge koy lačes te djal.
T'mer denn t'men o per pherdo o masseha i tikne bakrendar oun terne thoulle groumyendar,
5oun bashenn ap i harfa oun krenn gilya har o David.
6Mool piyenn t'mer dran khore,
oun makenn t'men dren o feteder djeteha.
Oun t'men hi gar ropaske pral o kheer Yosef, hoy paash dino vell.
O foro Samaria vell paash dino
7Doleske venn t'mer i glanstoune kolendar, kay venn pandles krik anlo.
T'maro shoukar djipen oun pipaskro tsiro hi trouyel.
8O baro oun zorelo Devel, ko ray pral o bolepen oun i phoub, das pes sovel pash peskro djipen oun penas:
Me hom rhoyedo pral o pre-phourdepen o Yakobeskre čavendar,
oun nay dikau lengre shoukar khera bouder gar glan i yaka.
Doleske dau o foro#6:8 Kova hi o foro Samaria. oun lauter, hoy koy dren hi, an i vasta vavar menshendar.
9Ninna te ačenn deesh morsha djido an yek kheer, hounte merenn le. 10Te vell palle o kako yekestar lendar, oun lell les, te paskrell lo les, oun dell gole an o kheer: Hi gomme yek an o kheer? Oun te hi i vavar khatedo kote, penell lo: Na-a! Kek, kokres me. Palle penell o kako: Ač, mer hounte rakras gar o baro Debleskro lab vin!
11Djinenn: O baro Devel, te penell yob:
O baro kheer hounte perell khetne,
palle perell lo khetne.
Oun te penell yob:
O tikno kheer hounte perell an kotya,
palle perell lo an kotya.
12Nashenn i graya ap i bare barra? Na-a!
Nashte boudrenn i harhe koy pre i groumyentsa? Na-a!
T'mer rissrenn o čačepaskre laba yaake, te venn le har čomone, hoy marell,
oun o čačo drom yaake, te hi lo har i shoutlo pipen!
13T'mer phourdenn t'men pre pral o foro Lo-Dabar, oun penenn: Mari zoryah lam o foro Karnayim dren. 14“Doleske”, penell o baro Devel, ko ray pral o bolepen oun i phoub, “bičrau i natsyona, hoy djal ap t'mende, kay han dran o kheer Israel. Kolla menshe lenn t'maro them dren foun Lebo-Hamat bis pash o lengsto pani an o telstouno them.” #6:14 ou bien: bis pash o Londo Baro Pani
Currently Selected:
Amos 6: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
