Bičepangre 12
12
O Yakobo vell maredo, oun o Petro vell stildo
1An ko tsiro moukas o baro ray Herodes i patslen te stilell, oun moukas len dava te dell. 2Yob maras o Yohanneskro phrales, o Yakobes, o rhareha. 3Har o Herodes hayvas, kay kova mishto his an i biboldengre yaka, moukas yob ninna o Petres te taprell. Kova his an ko tsiro, kay rhan i bibolde kek shoutlo maro.
4Har yon les tapran, vitsran le les an o stilepen. Oun o Herodes penas, te denn star kope star lourde yak ap leste. Star lourde dan i paash dives yak ap leste. Oun pal i paash dives dan vavar star lourde yak ap leste. Oun ninna yaake djas kova ratsyakro.
Pal kol divessa, kay Passa kharenna, kamas o Herodes les glan i menshende te anell, te dell lo les glan lende i phagi.
5Har o Petro an o stilepen his, mangan i tsele patsle pengro tselo djiyeha o Debles leske ap i rati oun ap o dives.
O Petro vella dran o stilepen vin
6An i rat glan ko dives, kay kamas o Herodes les vin anell, te dell lo les i phagi, sovas o Petro mashkral douy lourdende. Yob his pandlo douy sasterne shellentsa, oun douy lourde dan yak glan o voudar.
7Ap yek kopo his an ko stilepen i zoreli momeli, oun o Debleskro bolepaskro his koy tardo, oun das o Petres an i rig, djangras les pre, oun penas: “Ste sik pre!”
Oun kol sasterne shelle peran leskre vastendar tele.
8Oun ko bolepaskro penas ap leste: “Čip tiri dori troul tiro ripen, oun rib tire kirrha, oun čip tiri plaashka troul toute, oun am mantsa!”
Oun yob kras kova.
9Oun o Petro djas leha dran o stilepen vin. Yob djinas gar, kay kova lauter čačepen hi. Yob patsas, te dell lo souni. 10Douy kope djan le pash kol lourdende pashel, kay yak dan. Oun kolla dikan len gar. Oun yaake van yon pash i baro sasterno voudar. Kova his ko voudar, hoy djas an o foro. Ko voudar djas kokres pre. Yon djan vin, oun van ap o drom. Har djan le i kotar drom, his ap yek kopo ko bolepaskro gar bouder koy.
11Kanna djinas o Petro, kay kova kek souni his, oun yob penas: “Kanna djinau čačepah, kay bičras o ray Yezous peskro bolepaskres mange. Oun kova las man dran o Herodeskre vasta vin, ninna dran halauter, hoy kaman i bibolde mantsa te krell.”
12Har kova an leskro shero vas, djas yob pash i Mariakro kheer. Lakro čavo his o Yohanni, kay ninna Marko kharedo vella. Kote his boud patsle khetne oun mangan o Debles. 13O Petro das o vasteha ap o voudar, oun i boudepaskretsa vas. Lakro lab his Roda. Yoy kamas te shounell, koon koy hi. 14Oun har yoy shounas, kay kova o Petro hi, kras li i barhtyatar o voudar gar pre, nashas pale oun penas: “O Petro hi glan o voudar tardo.”
15Koy penan yon ap late: “Hal tou dinelo?” Yoy ačas koy pashel, kay kova yaake hi. Koy penan yon: “Kova hi o bolepaskro, kay dell yak ap leste.”
16O Petro moukas gar tele, te dell lo ap o voudar. Har yon kanna pre kran, dikan yon les. Koy ačas lenge o mouy pre. 17I vastentsa sikras lo len, te denn le kek gole, oun penas lenge, har o ray Yezous les dran o stilepen vin las. Oun ninna penas o Petro lenge: “Penenn kova o Yakobeske, oun kol vavar phralenge!”
Palle djas yob vin, oun djas peske an i vavar foro.
18Taysarlake dikan i lourde, kay his o Petro bouder gar an o stilepen oun poučan pendar, hoy leha djas. Oun i bari daar vas ap lende. 19Har o Herodes penas, te vell o Petro vin anlo, oun yob bouder gar koy his, moukas lo les te rodell. Oun yon hatsan les gar. Koy poučas lo i lourdendar, kay dan yak glan o voudar, har vas nay o Petro vin. Oun palle moukas yob kolen te marell.
Palle djas o Herodes dran o them Youdea, oun vas an o foro Cesarea, oun ačas i tsiro kote.
O Herodes merella
20O Herodes vas rhoyemen ap i menshende an i forya Tirus oun Sidon. Kolla lan pengro rhapen dran o Herodeskro them. Doleske bičran le khetne morshen pash leste, te vell lo pale lačo lenge. Kolla rakran koleha, kay das yak ap o Herodeskro kheer, leskro lab his Blasto, oun penan leske, te kamenn le bouder kek čingepen, oun mangan lestar, te penell yob kova o Herodeske.
21I dives vas vin kerdo, kay kamas o Herodes lentsa te rakrell. Ap ko dives rivas o Herodes peskre rayengre koola an, beshas pes ap peskro raylo beshepaskro, oun rakras i baro rakepen. 22Kol menshe dan gole: “Yaake rakrell kek mensho. Yaake rakrell i devel!”
23Yaake moukas pes o Herodes i menshendar te sharell, har te vals yob o Devel. Oun har yob kova kras, das les o Debleskro bolepaskro i nasslepen, te rhan i kirme les pre, oun yob meras.
24An boud gaba oun forya vas o Debleskro lab penlo. Oun boudeder oun boudeder menshe patsan ap o ray Yezouseste.
25O Barnabas oun o Saulo anan kol love i patslenge an o foro Yerusalem. Palle van le pale an o foro Antiochia. Lentsa djas o Yohanni Marko.
Currently Selected:
Bičepangre 12: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
