2. Korintarya 12
12
O Devel hi zorelo – mer ham gar zorelo
1T'mer kamenn, te sharap man, ninna te molell kova či. Yaake kamau te rakrap pral o bolepaskro koova, hoy o Yezous Kristo i menshes moukell te dikell. 2Me prindjrau i menshes, kay djivell o Yezous Kristeha. Kova vas glan deesh-te-star bersha an o triinto bolepen dren anlo. His lo čačepah koy pral? Me djinau les gar. Dikas lo kova an i souni? Me djinau les gar. Kova djinell o Devel kokres. 3-4Me djinau, ko mensho vas hadedo an o Debleskri shoukar baar, oun shounas save shoukar laba, hoy nay penell kek mensho. His lo čačepah koy pral? Me djinau les gar. Dikas lo kova an i souni? Me djinau les gar. O Devel djinell kova. 5Ko menshes sharau me. Me sharau man gar. Te sharau man, sharau kova, hoy sikrella, kay hi man kek zoor. 6Ninna te sharoms me man, rakroms kek dinelo koova. Kova, hoy penoms, vals o čačepen. Kamau gar, te rikrenn i menshe boudeder mandar har kova, hoy dikenn le oun shounenn le mandar. Doleske sharau me man gar.
7O Devel kamella, te vap gar pre-phourdo pral ko baro bolepaskro koova, hoy moukas lo man te dikell. Doleske moukas o Devel čomone ap mande te vell, hoy doukrell man har i soubyengro kasht an miro mass. Kova hi har te dals man i bengeskro kourepaskro dava, te vap gar pre-phourdo. 8Triin kope mangom me o Yezousestar, maro rayestar, te vell kova mandar krik lino. 9Oun yob penas ap mande: “Mouk touke miro lačepen doha te vell! Miri zoor hi bari an kolende, kay gar zorelo hi.”
Oun me, o Paulo, penau t'menge: Doleske kamau man me te sharell, kay hi man kek zoor. Yaake nay dikell hakeno, o Yezous Kristo peskri zoryah hi pash mande. 10Doleske hom gar bibarhtelo, te hi man kek zoor, te lau dava, te vell pharo koova ap mande, te lenn yon man palla, te vell i traash ap mande. Kova lau o Yezous Kristeske ap mande. Me djinau, te hi man kek zoor, palle dell man o Yezous Kristo zoor.
O Paules hi i baro dji i patslenge
11T'mer kran, te rakrom har i dinelo. Me hounte sharoms man gar. Na-a, t'mer hounte sharans man. Ninna te voms me či, voms me yaake boud moldo har kol bare rakepangre pash t'mende, kay penenn, te hi le bičedo o Yezous Kristestar. 12Har homs pash t'mende, nay dikan t'mer, kay o Yezous Kristo bičras man. Me boudrom mank t'mende, oun dom gar pre. Me krom baro koova an o Debleskri zoor, yaake te kran i menshe bare yaka. 13Me krom t'menge yaake boud, har krom ninna i vavar patslenge, kay an vavar forya khetne venna. Yek koova hi vavarčandes: T'mendar lom kek love. Te his kova i doosh, mangau t'mendar, bistrenn koy doosh! 14Me vau kanna o triinto kopo pash t'mende. Ninna kava kopo kamau či t'mendar te lell. Me kamau t'men oun gar t'mare love. O dad oun i day denn pengre čaven te rhal, oun gar i čave pengro dades oun pengri dat. 15T'menge doms me lauter, hoy man hi, ninna miro djipen. Miro dji hi baro t'menge. Hi t'men doleske kek kamlepen mange? 16T'mer djinenna, me djivom gar dran t'mari possita. Kanna penenn mange: Taprom t'men oun rhorhrom t'men? Na-a! 17Kolla, kay pash t'mende bičrom, čoran kolla t'mare love? Na-a!
18Me mangom o Tites, te djal lo pash t'mende, oun bičrom i vavar phrales leha. Nay penenn t'mer, kay o Tito t'mendar čomone čoras? Na-a! O Tites hi o emligo baro dji t'menge har man. Mer douy djah ninna ko emligo drom. 19Patsenn t'mer, te rodah mer maro čačepen glan t'mende? Kova hi gar yaake. Mer djivah o Yezous Kristeha oun djinah, o Devel shounell, hoy mer rakrah. Mire phrala oun phenya, mer rakrah yaake, te vell t'maro patsepen zoreles.
20Me trashau, te vau pash t'mende, dikau savo koova pash t'mende, hoy kamau gar. Palle hom me vitar gar yaake har t'mer kamenna. Me trashau te dikau čingepen mank t'mende, ninna zilvepen, rholi, praasepen, djoungelo rakepen pral o vavareste, pre-phourdepen, bipandlo djipen, oun yek kamell feteder te vell har ko vavar. 21Me trashau te ladjap man t'menge glan o Debleste ap ko dives, kay vau pale pash t'mende, oun te vell mange ropaske pral boudende, kay kamenn pengro phouro djipen gar pre te dell, oun djivenn an djoungelo oun vi-ladjedo koova oun loubrenn pen trouyel yaake har kran le an ko tsiro, har yon gomme gar patslo his.
Currently Selected:
2. Korintarya 12: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
