2. Korintarya 13
13
Dikenn ap t'mende, har t'mer an o patsepen tardo han!
1Kova hi o triinto kopo, kay vau pash t'mende. Ma bistrenn, hoy činlo hi: Te kamell yek i doosh ap i vavareste pre te čivell, hounte venn douy, triin koy pashel, kay penenn vin, hoy yon djinenna. 2Te vau kava kopo, rikrau man gar pale, te dap kolen i phagi, kay kran čilačo koova. Kova penom, har homs o douyto kopo pash t'mende, oun kanna, kay hom dour t'mendar krik, penau les pale t'menge. 3Palle dikenn t'mer mishto, te vas miro rakepen o Yezous Kristestar. Yob hi zorelo pash t'mende, oun sikrell t'men peskri bari zoor. 4Har yob ap o troushel dino vas, his yob gar zorelo. Kanna djivell yob dran o Debleskri zoor. Yaake har o Yezous Kristo ap o troushel gar zorelo his, ham mer vitar gar zorelo. Oun yaake har yob djido vas, ham mer leha ninna djido oun zorelo dran o Debleskri zoor. Kova nay dikenn, te hom pash t'mende!
5Dikenn ap t'mende, har t'mer an o patsepen tardo han! Hi t'maro patsepen čačo? Djivell o Yezous Kristo mank t'mende? Te hayvenn t'mer gar, te hi lo mank t'mende, palle hi t'maro patsepen či moldo. 6Me kamoms, te dikenn t'mer, kay mari boudi o Debleske mishto hi.
7Mer mangah o Deblestar, te krenn t'mer kek čilačo koova. Kova mangah lestar gar, te sikras, har mishto mari boudi kram. Na-a, mer kamah, te krenn t'mer o lačepen, ninna te vell mendar penlo, kay mari boudi či moldo hi. 8Mer nay krah kokres savo koova, hoy krell, te shounenn le o Debleskro čačepen oun dikenn les. Oun mer nay krah či, hoy rikrell o čačepen pale. 9Ninna te ham mer gar zorelo, ham barhtelo, te han t'mer zorelo. Mer kamah, te venn t'mer an o čačepen glan o Debleste tardo, oun kova mangah lestar. 10Kava činau me t'menge kanna, kay hom dour krik t'mendar. Te vau pash t'mende, kamau gar te čingrell t'mentsa i zoryah, hoy das man maro ray Yezous. Kay zoor das lo man, te krap t'men zoreles, gar te krap t'men paash.
11Kanna, mire phrala, avenn barhteles, oun avenn pale pale ap o čačo drom! Shounenn ap kol laba, hoy me t'menge penom. Rikrenn khetne oun čingrenn t'men gar! Oun o Devel, kay dell kamlepen oun barht an o dji, vell t'mentsa! 12Taprenn t'men trouyel, oun denn t'men i čoum! Kova sikrella hakeneste, t'mer han phrala oun phenya an o patsepen. I tsele patsle penenn t'menge. “Ačenn maro Debleha!” 13O lačepen maro rayestar, o Yezous Kristestar, djal t'mentsa! Oun o Debleskro kamlepen vell an t'mende! Oun o Debleskro Dourho ačell pash t'mende!
Currently Selected:
2. Korintarya 13: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
