1. Timoteo 1
1
Lačo Timoteo
1Me, o Paulo, činau kava liil. Me hom o Yezous Kristeskro bičepaskro, te penap i menshenge leskro lab. Yaake kamell kova o Devel, kay lell men dran o čilačepen vin, oun o Yezous Kristo, ap koleste patsah. 2Me činau kava liil ap toute, Timoteo. Tou hal mange har miro čavo an o patsepen. Lačepen, kamlepen oun barht touke! Kova dell tout o Devel, maro dad, oun o Yezous Kristo, maro ray, an o dji!
I rhorhene sikepangre
3Tou djineh, har me touke penom, te ačess an o foro Efesus. Kova mangom toutar, har me an o them Macedonia djom. An o foro Efesus hi menshe, kay sikrenn i patslende i rhorheno drom, hoy anell len gar pash o Debleste. Kolenge peness, te moukenn le kova. 4Pen lenge, te rodenn yon gar o čačepen an i parmisse, vitar gar an kol bare lila, kay i phourengre laba činlo hi. Kova anell čingepen, oun anell men gar ap o Debleskro drom doureder. 5Lauter, hoy peneh tou lenge pral o patsepen, hounte sikrell lende, te vell lengro kamlepen dran i djoudjo dji, oun te vell len i patsepen, an koleste kek rhorhepen hi, oun te krenn le lauter yaake, har lengro dji lenge penella. 6Kol menshe, kay penenn vavar koova, moukan o Debleskro drom, oun rikrenn pen kanna ap kolla laba, hoy či molenna.
7Yon kamenn sikepangre te vell, kay penenn i menshenge, har te djivenn le. Oun yon hayvenn gar, hoy yon penenna oun zoreles rakrenna.
8Mer djinah, kay o Moseskre laba mishto hi, te venn le i menshende yaake penlo, har čačo hi.
9Mer djinah, o Moseskre laba van gar činlo kolenge, kay pal o čačepen djivenna. Kol laba van činlo kolenge,
kay gar pal o čačepen djivenna,
oun kay gar ap o Debleste shounenna.
Kol laba van činlo kolenge,
kay gar ap o Debleste patsenna,
oun krenna, hoy yob gar kamella.
Kol laba van činlo kolenge,
kay lengro dji djoungelo hi,
oun kolenge, kay praasenn o Debles.
Kol laba van činlo kolenge,
kay marenn o dades oun i da,
oun ninna vavar menshen.
10O Moseskre laba van činlo
kol morshenge,
kay sovenn vavar djouvyentsa,
oun kol djouvyenge,
kay sovenn vavar morshentsa.
Kol laba van ninna činlo
kol morshenge,
kay sovenn i morshentsa oun čaventsa.
Kol laba van činlo kolenge,
kay čorenn menshen oun bikrenn len,
oun kolenge, kay penenn o rhorhepen,
oun kolenge, kay denn pen rhorhenes sovel.
Oun te dell vavar koova, kay o Debleskro lab lestar penella, te kras mer kova gar, palle van o Moseskre laba kolenge činlo, kay kova krenna. 11Yaake penell menge o lačo lab, hoy das o Devel an mire vasta, te penap kova i menshenge. Ko lab sikrell men o Debleskro raylepen. Lestar vell o tselo lačepen.
O Debleskro baro lačepen
12Me parkrau man pash maro rayeste, o Yezous Kristeste, kay das man i zoor, te boudrap leske. Yob patsas ap mande, oun čivas man an koy boudi, te vap leske koy. 13His i tsiro, kay rakrom djoungeles pral leste, oun lom i patslen palla, te marap len. An ko tsiro prindjrom les gar, oun djinom gar, hoy me krom. Yob kras mange peskro dji pre, oun las man dran o čilačepen vin. 14Yaake lačo his o Yezous Kristo mange, te das lo man ninna o patsepen ap leste oun o kamlepen i vavarenge.
15Hi čačo, hoy kanna penau. Oun t'mer nay patsenn man: Maro ray, o Yezous Kristo, vas ap kay phoub, te anell lo kolen ap o drom pash o Debleste, kay dour lestar an o čilačepen djivenna. Kolendar hom me o djoungleder. 16Me krom bareder čilačepen har hako vavar. Oun ninna man las o Devel dran miro čilačo djipen vin, te nay sikrell o Yezous Kristo ap mande, har boud yob i menshen kamella, yaake, te patsenn i menshe ap leste, oun lenna ko djipen, hoy gar pre-herella#1:16 Kova hi o Debleskro djipen..
17Me sharau o Debles, koles, kay hako tsiro o baro ray hi; kova, kay merella gar, oun kay nay dikell les kek. Kova kokres hi o Devel. Leskro raylepen ačell hako tsireske. Amen.
18Miro čavo Timoteo, kova penau touke, te rikress tou kova an tiro dji. Ma biste kol laba, hoy glan i tsiro pral toute glan-vi penlo van! Kolla laba denn tout i zoor, te moukess gar tele te krell o Debleskri boudi, yaake har i lačo kourepaskro gar pre dell an o kourepen. 19Rike ap o patsepen ap o Yezous Kristeste! Kre, hoy tiro dji touke penella! Hi menshe, kay shounan gar ap pengro dji, oun kran gar, hoy mishto hi. Oun yon peran o Debleskro dromestar tele. 20Douy lendar hi o Himeneo oun o Alexandro. Kolen dom an o bengeskro vast, te rakrenn le bouder gar djoungeles pral o Debleste.
Currently Selected:
1. Timoteo 1: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
