2. Tessalonikarya 3
3
Mangenn o Debles menge!
1Ninna mangau t'mendar, mire phrala: Mangenn o Yezousestar, maro rayestar, menge, te nay penah leskro lab an boud vavar forya, te vell lo kote yaake sharedo, har pash t'mende. 2Mangenn lestar ninna, te dell lo garda ap mende, te nay krenn men kol midjak oun čilače menshe kek čilačepen. Gar hakeno patsell ap o Yezous Kristeste.
3Maro ray Yezous moukell t'men gar. Yob dell t'men zoor, oun dell garda ap t'mende, te vell kek čilačo koova ap t'mende. 4Yob hi maro oun t'maro ray. Doleske djinah, t'mer krenn, hoy mer t'menge penah, kanna oun an ko tsiro, hoy glan mende hi.
5Maro rayestar, o Yezousestar, mangah, te krell lo t'mare djia pre, te dikenn t'mer, har baro o Debleskro kamlepen t'menge hi. Oun lestar mangah ninna, te denn t'maro patsepen gar pre, ninna te vell t'maro djipen pharo, yaake har o Yezous Kristo gar pre das.
Koon kamell gar te boudrell, kova hounte rhal gar
6Mire phrala, an o lab maro rayestar, o Yezous Kristestar, penah t'menge zoreles: Rikrenn t'men kol phralendar krik, kay kamenn gar te boudrell! Yon djivenn gar yaake, har mer t'menge penam. 7T'mer djinenna, har te djivenn. Djivenn yaake, har mer djivam, har hams pash t'mende! Mer kram mari boudi, 8rham pash kekeste čičeske. O dives oun i rati boudram, te djivas mer gar t'mare lovendar. 9Mer mangams nay t'mendar kova, hoy men hounte vals djipaske, oun kram kova gar. Mer kamam, te dikenn ap maro djipen, har te djivenn. 10Ninna har pash t'mende hams, penam t'menge: Kova, kay kamell gar te boudrell, kova hounte rhal vitar gar.
11Mer shounam, mashkral t'mende hi menshe, kolla kamenn gar te boudrell. Či boudrenn le, oun kova, hoy či moldo hi, krenn le. 12Kolenge penah mer an o lab maro rayestar, o Yezous Kristestar, te boudrenn le, te nay ginenn le penge, hoy len hounte vell djipaske. 13T'mer, mire phrala, ma avenn khino te krenn kova, hoy lačo hi!
14Yek te krell kova gar, hoy mer an kava liil činam, penenn kova i vavar patslenge, oun rikrenn t'men lestar pale, te vell i ladj pral leste! 15Ma dikenn ap leste har ap yekeste, kay kras t'menge čilačo koova. Na-a, yob hi t'maro phraal. Penenn leske, hoy yob gar mishto kras, te vell lo pale ap o čačo drom!
Ačenn o Debleha!
16Maro ray Yezous, kolestar vella i tseli barht, kolestar mangau, te dell lo t'men hako tsiro peskri barht an o dji, kote, kay t'mer han. Maro ray Yezous djal t'mentsa lauterentsa!
17Kal laba činau miro vasteha: Ačenn o Debleha! Yaake činau an mire tsele lila. Kova sikrell t'men, kava liil vell mandar.
18O lačepen maro rayestar, o Yezous Kristestar, djal t'mentsa lauterentsa!
Currently Selected:
2. Tessalonikarya 3: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
